Ɛth-ter 5 - RUAC KUƆTH IN RƐL RƆ

Cio̱l Ɛth-ter Kuäär kɛnɛ Ɣa-man mi̱eth

¹ Kɛ diɔ̱ɔ̱k ni̱ni tëë thɛɛk Ɛth-ter ɛ ni mi̱th, cuɛ bieyni kuäärädɛ la̱th, cuɛ ben cuɔ̱ŋ ni rɛy duëël in cieŋ kuäär thi̱n in te rɛy dhɔaar kua̱r. Kä jɛn kuäär tëë nyuurä rɛc i̱ cɛ wi̱cdɛ riet thok kal dhɔaar ɛ.

² Kä mëë ci kuäär Ciëk Kua̱r ni Ɛth-ter nɛn tëë cuŋä, inɔ kɛ pɛ̈th cu lɔcdɛ tɛɛth kɛ jɛ, kä cuɛ kɛɛt dääpädɛ kap Nhial kɛ kui̱dɛ. Kä cu Ɛth-ter ben, cuɛ wi̱c kɛɛtdä ben thiap.

³ Kä cu kuäär jɛ jiök i̱, “Ɛ leŋu lö Ciëk Kua̱r ni Ɛth-ter? Ɛŋu mi go̱o̱ri? Ɣän bä jɛ ka̱m ji̱ a cäŋɛ tha̱a̱ŋ kuäärädä bä, bä jɛ ka̱m ji̱.”

⁴ Kɛ kɔrɛ cu Ɛth-ter ruac wëë i̱, “Mi dee kuäär ɛ nhɔk, dee kuäär kɛnɛ Ɣa-man ben ɛn walɛ kɛ kui̱ mi̱eth in cä rialikä kɛ kui̱ kua̱r.”

⁵ Inɔ, cu kuäär ruac kɛ pɛ̈th wëë i̱, “Nööŋɛ Ɣa-man kɛ pɛ̈th, kɛ ɣöö dee nɛy lät ce̱tnikɛ min go̱o̱r Ɛth-ter ɛ.” Ɛ jɛn cu kuäär kɛnɛ Ɣa-man ben mi̱th kɛ mi̱eth in ci Ɛth-ter ɛ rialikä.

⁶ Kä mëë mäthkɛ kɛ kɔaŋ, cu kuäär Ɛth-ter thiec i̱, “Ɛŋu mi go̱o̱ri? Ba jɛ ka̱m ji̱, kä min bi thiec, a cäŋɛ tha̱a̱ŋ kuäärädä, bä jɛ ka̱m ji̱.”

⁷ Kɛ kɔrɛ, cu Ɛth-ter wee i̱, “Mɛmɛ ɛ jɛn min göörä,

⁸ ɛn ɣöö mi ci kuäär lɔcdɛ tɛɛth kɛ ɣä, kɛnɛ mi ci kuäär ɛ nhɔk ɛn ɣöö bɛ min göörä ka̱m ɣä, a kuäär kɛnɛ Ɣa-man bä ben mi̱th kɛ mi̱th tin bä rialikä kɛ kui̱diɛn, kä bä min ci kuäär ɛ thiec cu la̱t.”

Go̱r Ɣa-man kɛ näk Mɔr-da-kay

⁹ Kɛ jɛn cäŋ ɛmɔ, cu Ɣa-man wä kɛ tɛ̈th lɔaac. Duundɛ ɣöö mëë ci Ɣa-man Mɔr-da-kay jek thok kal dhɔaar kua̱r, cuɛ Mɔr-da-kay nɛn ɛn ɣöö /ken ɛ rɔɔdɛ jiɛc kä /ken ɛ jɛ lath nhiam Ɣa-man, cu Ɣa-man ŋɛ̈ɛ̈ny ɛlɔ̱ŋ kɛ Mɔr-da-kay.

¹⁰ Kuɛ la ɣöö cu Ɣa-man rɔɔdɛ kur, cu wä ni jɛn dhɔrɛ. Kä cuɛ naath ja̱k kɛ ɣöö ba mäthnikɛ kɛnɛ ciekdɛ ni Dhɛ-rɛc wä cɔl.

¹¹ Kä cu Ɣa-man kɛ la̱t ria̱ŋdɛ min gɔaa, kɛnɛ pek gankɛ kɛ gua̱th lätni diaal tëë la kuäär jɛ a kuany thi̱n kɛ kui̱ gɔɔyädɛ amäni min ci kuäär ɛ jakä ram min di̱t ni jɛn kä ruëëc kɛnɛ mädhi̱i̱ri kua̱r diaal.

¹² Kä cu Ɣa-man lɛni ruac bäkɛ kui̱ Ɛth-ter wëë i̱, “A cäŋɛ ni Ciëk Kua̱r ni Ɛth-ter thilɛ ram mi dɔ̱ŋ mi cɛ cɔal guäth mi̱eth in cɛ rialikä kɛɛl kɛ kuäär. Iruun bä cɛ ɣä cɔal guäth mi̱eth, kɛɛl kɛ kuäär.

¹³ Kä ŋotdɛ kɛn, ti̱ti̱ thilɛ mi gɔaa mi bä jek thi̱n, mi ŋotdɛ nɛ̈ɛ̈nä raan ji̱ Juudh ni Mɔr-da-kay nyuurä thok kal dhɔaar kua̱r.”

¹⁴ Kɛ kɔrɛ, cu ciekdɛ ni Dhɛ-rɛc kɛnɛ mäthnikɛ jɛ jiök i̱, “A gua̱a̱th ŋäpä mi bäär mi tekɛ jua̱th tetni ti jiɛn da̱ŋ dhieec la̱tkɛ. Kä kɛ runwaŋdɛ lär ni kuäär ɣöö a Mɔr-da-kay ŋapkɛ thi̱n. Inɔ, bia cu wä gua̱th mi̱eth kɛ tɛ̈th lɔaac.” Cu lɔc Ɣa-man tɛɛth kɛ ruac ɛmɔ, kä cuɛ gua̱a̱th ŋäpä jak kä la̱tkɛ.