Ɛth-ter 4 - RUAC KUƆTH IN RƐL RƆ

Thiec Mɔr-da-kay kɛ luäk kä Ɛth-ter

¹ Mëë ci Mɔr-da-kay tëë diaal tëë ca la̱t ŋa̱c, cuɛ bieynikɛ rɛ̈t, kä cuɛ la̱th ni bieyni cuali, kä cuɛ rɔ buk kɛ ŋɛ̈th cuɛ rɛy wec jäl kɛ wiee kɛ jɔw mi di̱i̱t.

² Cuɛ wä amäni thok kal dhɔaar kua̱r, kɛ ɣöö /ci raan dee coth rɛy kal dhɔaar kua̱r kɛ bieyni cuali, /kenɛ wä rɛy kal.

³ Rɛy wi̱i̱ni diaal tin ci ruac in ci kuäär ɛ lat cop thi̱n, cuɛ tekɛ pa̱r mi di̱i̱t ɛlɔ̱ŋ kä ji̱ Juudh. Cukɛ mi̱eth thɛk, wieekɛ kä pärkɛ, kä cu ri̱wdiɛn la̱th ni bieyni cuali kä cukɛ rɔ̱ buk kɛ ŋɛ̈th.

⁴ Mëë ci nyier läätdä Ɛth-ter kɛnɛ jio̱w in la lät jɛ ikä ben, cukɛ jɛ ben la̱r Ɛth-ter, cu ciek kua̱r lɔcdɛ jiath ɛlɔ̱ŋ. Cuɛ bieyni ti ba wä la̱th ɛ Mɔr-da-kay ja̱k, kɛ ɣöö bɛ bieyni cuali tin te puɔ̱ɔ̱nydɛ woc. Duundɛ ɣöö, /ken Mɔr-da-kay kɛ nhɔk.

⁵ Kɛ kɔrɛ cu Ɛth-ter ram kɛl kä jiöwni kua̱r mi cɔal ciötdɛ i̱ Ɣä-thɔk mi ca kuany kɛ ɣöö bɛ jɛ lät ikä cɔl. Kä cuɛ jɛ jäk kä Mɔr-da-kay kɛ ɣöö bɛ min ci tuɔɔk ŋa̱c, kä bɛ wä ŋa̱c ɛŋu tuɔɔk kɛ nɔmɔ.

⁶ Kä cu Ɣä-thɔk wä kä Mɔr-da-kay dɛɛkä wec in te thok kal dhɔaar kua̱r.

⁷ Kä cu Mɔr-da-kay Ɣä-thɔk la̱t tin diaal tin ci tuɔɔk, amäni pek yio̱o̱ni tëë ci Ɣa-man kɛ lat ɛn ɣöö derɛ la̱th guäth tɔ̱wä yio̱o̱ni kua̱r kɛ kui̱ da̱k ji̱ Juudh.

⁸ Kä cu Mɔr-da-kay jɛ ka̱m kui̱c warɛgakä mëë ca lat däär wec Cu-cɛ̈n in di̱i̱t kɛ kui̱ däkä ji̱ Juudh, kɛ ɣöö bɛ kɛ wä nyuɔ̱th Ɛth-ter. Kä bɛ luɔtdiɛn wä la̱t jɛ, kä bɛ jɛ wä la̱r ɣöö bɛ wä kä kuäär, bɛ wä wiee nhiam kua̱r kä bɛ kuäär wä läŋ kɛ kui̱ nɛɛnikɛ.

⁹ Kä cu Ɣä-thɔk wä kä Ɛth-ter cuɛ jɛ wä la̱t ŋɔak diaal tëë ci Mɔr-da-kay kɛ lat.

¹⁰ Inɔ, cu Ɛth-ter ruac kɛ Ɣä-thɔk, cuɛ jɛ gɔ̱a̱r warɛgak kɛ kui̱ Mɔr-da-kay wëë i̱,

¹¹ “La̱a̱t kua̱r diaal kɛnɛ nɛy diaal tin cieŋ wi̱i̱ni kua̱r diaal ŋäc kɛn ɛ ɛn ɣöö /ci wut kiɛ ciek dee wä ni rɛy duëël in cieŋ kuäär thi̱n, a /kenɛ jɛ cɔl. Mi cɛ wä kä /ka̱n jɛ cɔl ba jɛ näk. Kɛ ɣöö mɛmɛ ɛ ŋut mi te thi̱n kɛ kui̱ nɛɛni diaal a päär. Mi deri kään ɛ /ca ji̱ näk ɛni mi ci kuäär kɛɛt dääpädɛ kap nhial kɛ kui̱du, ɛ jɛn deri kään ɔ. Ɣän puɔ̱nydä /ka̱n ɣä ni cɔal rɛc ɛ kuäär kɛ ni̱n ti jiɛn diɔ̱k.”

¹² Kä mëë cikɛ Mɔr-da-kay la̱t ruac Ɛth-ter ëë cɛ lat,

¹³ cu Mɔr-da-kay kɛ la̱t ɣöö bikɛ Ɛth-ter wä jiök i̱, “/Cu jɛ car ɛn ɣöö /ci min ba lät kä ji̱ Juudh bi cop kä ji̱ a cäŋɛ mɔ cieŋi dhɔr kua̱r ɔ.

¹⁴ Kɛ ɣöö mi wi̱i̱ wä biɛt kɛ gua̱a̱th rikä mi ce̱tkɛ nɛ, ŋotdɛ bi min bi ji̱ Juudh kän ben kɛ duɔ̱ɔ̱p mi dɔ̱ŋ. Duundɛ ɣöö, ji̱n yɛnɛ dhɔr guur bia li̱w. Ɛŋa mi ŋäc jɛ? Kä dɔ̱ŋ min no̱o̱ŋ ji̱ dhɔr kua̱r kɛ jɛn gua̱a̱th rikä mɛmɛ, ɛ jɛn riɛk ɛ took rɔ mi?”

¹⁵ Kɛ kɔrɛ, cu Ɛth-ter ruac Mɔr-da-kay loc wëë i̱,

¹⁶ “Wër däär wec Cu-cɛ̈n in di̱i̱t, wër doli ji̱ Juudh tin te thi̱n guäth kɛl, wiaa thëk ɛ kɛ kui̱dä, /cuarɛ mi̱th kä /cuarɛ mäth kɛ kɔaŋ kɛ ni̱n da̱ŋ diɔ̱k kɛ wäär kɛnɛ cäŋdäär. Ɣän kɔnɛ nyier läätädä bakɔ mi̱th thɛk bä ce̱tkɛ mɔ lät yɛn ɛ mɔ. Kä kɛ kɔrɛ, ɣän bä cu wä kä kuäär, a cäŋ ɛmɔ /ciɛ ŋuut ɔ bä. Mi bä wä li̱w, kä a wa̱a̱ li̱w.”

¹⁷ Kä cu Mɔr-da-kay wä dupdɛ, kä cuɛ ŋɔak diaal wä la̱t ce̱tnikɛ min ci Ɛth-ter ɛ la̱t jɛ.