Ɛth-ter 3 - RUAC KUƆTH IN RƐL RƆ

Go̱r Ɣa-man kɛ näk ji̱ Juudh

¹ Kɛ kɔr ŋɔaani ti̱ti̱, cu Kuäär ni Ä-ɣɛ̈c-we-roc Ɣa-man gat Ɣɛ̈-mɛ-da-thɔ raan Ä-gag kap nhial. Cuɛ jɛ moc kɛ gua̱a̱th la̱t mi di̱i̱t, mi leny gua̱th ruëëcni diaal tëë te kɛɛl kɛ jɛ.

² Kä cu la̱a̱t kua̱r diaal tin la gaŋkɛ thok kal dhɔaar kua̱r rɔ̱ goŋ kä ka̱m kɛ rɔ̱ mua̱a̱l kɛ Ɣa-man. Kɛ ɣöö ci kuäär ruac lat inɔ kɛ kui̱dɛ. Duundɛ ɣöö, cu Mɔr-da-kay ɛ lo̱k /kenɛ rɔ goŋ kä /kenɛ rɔ ka̱m mua̱a̱l kɛ Ɣa-man.

³ Inɔ cu la̱a̱t kua̱r tin la gaŋkɛ thok kal dhɔr kua̱r Mɔr-da-kay jiök i̱, “Ɛŋu mɔ /ci ruac kua̱r luth ɔ?”

⁴ Kä mëë la ruackɛ kɛ Mɔr-da-kay inɔ ni̱ni diaal, kä lo̱k Mɔr-da-kay ruacdiɛn, cukɛ jɛ la̱r Ɣa-man kɛ ɣöö bɛ jɛ guic mi bɛ ruac Mɔr-da-kay luäŋ kɛ ruɔ̱t, kɛ ɣöö cɛ la̱rkɛ ɛn ɣöö ɛ raan ji̱ Juudh.

⁵ Kä mëë ci Ɣa-man Mɔr-da-kay nɛn lo̱kɛ guɔ̱ŋ kɛ rɔ kɛnɛ ɣöö bɛ rɔ ka̱m mua̱a̱l kɛ kuäär, cuɛ ŋɛ̈ɛ̈ny ɛlɔ̱ŋ.

⁶ /Kenɛ lɛ go̱r ni ɣöö bɛ Mɔr-da-kay moc riɛk kä rɔa. Kɛ ɣöö ŋäcɛ kar Mɔr-da-kay, Ɣa-man cuɛ jɛ go̱r ɛn ɣöö bɛ ji̱ Juudh tin la nɛɛ Mɔr-da-kay näk nikɛn diaal, rɛy kuäärä Ä-ɣɛ̈c-we-roc diaal.

⁷ Kä kɛ pay in jio̱l in cɔali Tio̱p thar pɛ̈t, kɛ ruɔ̱n jiath kɛl wi̱cdɛ rɛw ruëc Kua̱r ni Ä-ɣɛ̈c-we-roc, cukɛ gaakni yuɔr. Kä cukɛ jɛ la̱t nhiam Ɣa-man, kɛ ɣöö dëë cäŋ kɛnɛ pay in dee Ɣa-man ɛ näk ni ji̱ Juudh ŋa̱c. Kä cu yor gaakni pɛn kä cäŋ kä wäl wi̱cdɛ diɔ̱k kä pay wäl rɛw, (Tio̱p in di̱i̱t).

⁸ Ɛn wa̱nɔ cu Ɣa-man Kuäär ni Ä-ɣɛ̈c-we-roc jiök i̱, “Tëë kɛ do̱r mi ci rɔ riaw rɛy nɛɛniku wi̱i̱ni kuäärädu diaal, kä te ŋuɔ̱tkiɛn kɛ dääk kɛ nɛy diaal tin kɔ̱kiɛn. Kä /cikɛ ŋuɔ̱t kua̱r luth, kɛ kui̱c ɛmɔ /cɛ ro̱ŋ ɛn ɣöö dee kuäär ciaaŋdiɛn lɛ nhɔk.

⁹ Mi dee kuäär ɛ nhɔk, ɛ ruac latkɛ kɛ kui̱ däkädiɛn. Ɣän bä yio̱w ti ro̱ŋ kɛ ki̱luni la̱ŋ in bo̱r ti bathdɔɔri ti kur da̱ŋ diɔ̱k wi̱cdɛ jiɛn ŋuaan yuɔr piny kɛ kui̱ nɛɛni tin ba la̱t ɛmɛ la̱t, kä ba yio̱w ɛ tɔ̱ wä la̱th thandukä kua̱r.”

¹⁰ Inɔ, cu kuäär tiɛl yɛtdä min la thäny kɛ jɛ ka̱m raar yɛtädɛ, kä cuɛ ka̱m Ɣa-man, gat Ɣɛ̈-mɛ-da-thɔ min la raan Ä-gag, min la gua̱n tɛ̈r ji̱ Juudh.

¹¹ Kä cu kuäär Ɣa-man jiök i̱, “Yio̱w kɛnɛ naath kɛ nyinku, lätnikɛ kä min nhɔk lɔcdu jɛ.”

¹² Kɛ cäŋ kä wäl diɔ̱k kä pay in jio̱l (tio̱p thar pɛ̈t,) cua bulkamiini kua̱r diaal cɔl kɛ ɣöö bi kɛn ruaacni Ɣa-man diaal tëë cɛ lat ben gɔ̱r. Kä cua ruac lat ɛn ɣöö ba nɛy diaal gɔ̱a̱r warɛgak. Kä cua nɛɛ kua̱r diaal bööth kɛnɛ ruëëc wi̱i̱ni diaal, kɛ ruëëc kɛnɛ ji̱ wec diaal gɔ̱a̱r warɛgak, wec ɔ nikɛ gɔ̱a̱r in la gɔ̱r kɛ jɛ, kɛ do̱r ɔ nikɛ thok in la ruac kɛ kɛ. Kä cua jɛ gɔ̱r kɛ ciöt Kuäär ni Ä-ɣɛ̈c-we-roc, kä cua jɛ thany kɛ tiɛl yiɛtädɛ.

¹³ Cua warɛgakni thöp nɛy ti pual puaal ti wa kɛ dääkä naath rɛy wi̱i̱ni kua̱r diaal kɛ pɛ̈th, kä lat kɛn ruac kɛ kui̱ däkä, kɛnɛ näk ji̱ Juudh diaal. Ɛn ɣöö a ŋuɛ̈tni kɛnɛ dɔŋ kɛ män kɛ gaat na̱kɛ bäkɛ jɛn cäŋ ɔ kɛl ɔ, min la cäŋ kä wäl diɔ̱k kä pay wäl rɛw, (Tio̱p in di̱i̱t), kä a kuakiɛn diaal pɛ̈ckɛ.

¹⁴ Kä ba kui̱c warɛgakä min ci duɔth jakä ŋut wi̱i̱ni diaal tin thia̱k, kä ba naath diaal la̱r lär kɛ ɣöö bikɛ rɔ̱ rialikä kɛ kui̱ ca̱ŋ ɛmɔ.

¹⁵ Kä cu nɛy tin pual puaal wä kɛ pɛ̈th kɛ kui̱ ruac kua̱r. Kä cua ruac wä lat däär wec Cu-cɛ̈n in di̱i̱t. Kä ci kuäär kɛnɛ Ɣa-man nyuur mäthkɛ kɛ kɔaŋ, kä ca wec Cu-cɛ̈n ku thuŋ jakä nuɛ̈ɛ̈n inɔ.