Ɛth-ter 2 - RUAC KUƆTH IN RƐL RƆ

Cu Ɛth-ter a ciek kua̱r

¹ Kɛ kɔr ŋɔaani ti̱ti̱ mëë ci ŋɛ̈ɛ̈ny Kua̱r ni Ä-ɣɛ̈c-we-roc thuɔ̱k, cuɛ Wac-ti tim. Kä cuɛ lätkɛ tëë cɛ la̱t tim. Kä cuɛ ruac ëë ca lat kɛ Wac-ti tim bä.

² Kä cu la̱a̱t kua̱r tin la la̱tkɛ jɛ ikä wee i̱, “A nyier ti guaar ti gɔw ti thil luɔ̱ɔ̱m görkɛ kɛ kui̱ kua̱r.

³ Kä a kuäär dol ruëëc wi̱i̱ni kuäärädɛ diaal. Kä a guaar nyieet diaal tin thilɛ luɔ̱ɔ̱m duɔlkɛ guäth in la cieŋ män kua̱r thi̱n, däär wec Cu-cɛ̈n in di̱i̱t. Kä akɛ la̱thkɛ tetdä Ɣe-gɛy in la jio̱w min la tiit män kua̱r. Kä akɛ ka̱mkɛ yio̱w pua̱a̱nydiɛn.

⁴ Kä a nyam ɔ bi kuäär ɛ nhɔkɔ la ciek kua̱r kɛ gua̱a̱th Wac-ti.” Kä cu kuäär ruac ɛmɔ nhɔk, kä cuɛ jɛ la̱t ni nɔ ɛnɔ.

⁵ Ɛn guäth ɛmɔ, tëë kɛ raan ji̱ Juudh mi te däär wec Cu-cɛ̈n in di̱i̱t mi cɔal kɛ ciötdɛ i̱ Mɔr-da-kay. Kä jɛn ɛ gat Ya-ir min mɔ gat Cimi in la gat Kic, mi mɔ raan thuɔk duëël Ben-ya-min.

⁶ Kic ɛmɔ ca jɛ kɔŋ naŋ ɛla pɛ̈c kä Jɛ-ru-tha-lɛm kɛɛl kɛ nɛy tëë pɛ̈ckɛ kɛɛl kɛ kuäär Juda ni Yɛ-kɔn-ya mëë cu kuäär Bɛ̈-bi-lɔn ni Nɛ-bu-kad-nɛ-dhar ɛ naŋ pɛɛcä.

⁷ Kä Mɔr-da-kay ɛmɛ cuɛ A-da-tha pith. A-da-tha ɛ jɛn Ɛth-ter. Kä ɛ nya gua̱nlen Mɔr-da-kay. Kä jɛn Ɛth-ter thilɛ jɛ gua̱n kä thilɛ jɛ man. Kä jɛn ɛ nyam mi tekɛ maan kä gɔaaɛ ɛlɔ̱ŋ. Kä mëë ci gua̱n kɛnɛ man li̱w, cu Mɔr-da-kay ɛ rɔm ɛla nyaadɛ.

⁸ Inɔ, mëë ca ruac lat, kä ca guaar nyieet diaal duɔl guäth kɛl däär wec Cu-cɛ̈n in di̱i̱t tetdä Ɣe-gɛy, cua Ɛth-ter naŋ dhɔr kua̱r bä, cua jɛ la̱th tetdä Ɣe-gɛy min la tiit män kua̱r.

⁹ Kä cu Ɣe-gɛy Ɛth-ter nhɔk kɛ pɛ̈th rɛy nyieet diaal. Kä cuɛ jɛ moc kɛ yio̱w pua̱a̱ny kɛnɛ wal tin kuɔ̱r kuɔ̱ɔ̱r. Kä cuɛ jɛ moc bäkɛ pek mi̱thnikɛ tin bɛ la camɛ. Kä cua jɛ moc kɛ nyier da̱ŋ bärɔw ti la̱tkɛ jɛ ikä ti nööŋkɛ dhɔr kua̱r. Kä cua jɛ wä la̱th ni guäth mään in gɔaa min te dhɔr mään kɛɛl kɛ nyier tin la̱tkɛ jɛ ikä.

¹⁰ Kä Ɛth-ter /ken ɛ karkɛ tëë bëë thi̱n lat, kɛ ɣöö ci Mɔr-da-kay jɛ gok ɛn ɣöö /cɛ rɔ bi lat.

¹¹ Ni ciaŋ, la Mɔr-da-kay a jäl kɛ thok kaac dhɔaar in cieŋ män kua̱r thi̱n, kɛ ɣöö bɛ ta̱a̱ in tekɛ Ɛth-ter ŋa̱c.

¹² Kä cu gua̱a̱th ben kɛ ɣöö bi nyam kɛl kä nyier a wä nhiam Kuäär ni Ä-ɣɛ̈c-we-roc kɛ kɔr kä min cɛ päth da̱ŋ wäl rɛw thuk, kɛ ɣöö ɛ ŋut kɛ kui̱ mään diaal. Ɛ ŋut kä män ɛn ɣöö bikɛ päth tɔ̱tɔ̱ thuk kɛ piek pua̱nynikiɛn kɛ yio̱w pua̱a̱ny. Bikɛ päth bäkɛl thuk kɛ tuŋ wa̱l in kɔp kɔp pua̱nynikiɛn. Kä bikɛ päth bäkɛl kɔ̱kiɛn thuk kɛ piek pua̱nynikiɛn kɛ yio̱w pua̱a̱ny. Kä bikɛ rɔ̱ yi̱r kɛ liɛth in kur kur.

¹³ Mi wä nyal kä kuäär la ka̱mkɛ jɛ mɔ cɛ thiec ɔ. Kä bi nyal mɔmɔ naŋ kɛ jɛ kɛɛl jiɛɛndɛ guäth in cieŋ män kua̱r thi̱n, mi wëë dhɔr kua̱r.

¹⁴ Kɛ thiaŋ bɛ wä rɛc kä kuäär, kä kɛ runwaŋ bɛ loc dhɔr in rɛwdɛ in cieŋ män kuäär tin tiɛtkɛ ɛ Caac-gadh min la jio̱w in la tiit män kua̱r tin luɔɔm thi̱n. /Ci nyaa mɔ rɔ lɛ nyɔk kɛ loc kä kuäär, ɛni mi cɛ jɛ go̱r, kä bɛ jɛ cu cɔl cio̱tädɛ.

¹⁵ Kä cu gua̱a̱th in wä kɛ Ɛth-ter kä kuäär ben. Ɛth-ter ɛ nya Ä-bi-ɣa-yil min la gua̱nlen Mɔr-da-kay ëë piith Ɛth-ter kä cu jɛ rɔm ce̱tnikɛ nyaadɛ. Kä Ɛth-ter thilɛ mi cuɛ thiec kɛ kui̱ wäkädɛ, ɛni luek Ɣe-gɛy in la jio̱w min la tiit män kua̱r cuɛ liŋ ɔ. Kä ɛ jɛn, cua Ɛth-ter bɛc ɛ nɛy diaal tëë ca jɛ nɛn.

¹⁶ Kä mëë naŋkɛ Ɛth-ter rɛc kä Kuäär ni Ä-ɣɛ̈c-we-roc, ɛ pay in wäliɛn (laath buɔɔr), kɛ bärɔw runi rui̱cädɛ.

¹⁷ Cu kuäär nhɔk ni Ɛth-ter ɛlɔ̱ŋ rɛy mään diaal. Rɛy nyieet diaal tin thil luɔ̱ɔ̱m, cu kuäär Ɛth-ter bɛc ɛlɔ̱ŋ. Kä cuɛ kum kuäärä la̱th wi̱i̱dɛ, kä cuɛ jɛ jakä ciek kua̱r kɛ gua̱a̱th Wac-ti.

¹⁸ Kä cu kuäär ruëëc kɛnɛ mädhi̱i̱rikɛ lät kä mi̱th. “Mi̱th la̱tkɛ kɛ, kɛ kui̱ Ɛth-ter.” Kä cu kuäär naath moc lɔ̱a̱ŋ, rɛy wi̱i̱nikɛ diaal, kä cuɛ naath moc kɛ muc ti ŋuan, kɛ ciöt kuäärädɛ.

Ka̱n Mɔr-da-kay kɛ tëk kua̱r

¹⁹ Mëë ca nyier tin thil luɔ̱ɔ̱m duɔl guäth kɛl, te Mɔr-da-kay nyuurä thok kal dhɔaar kua̱r.

²⁰ Ɛn guäth ɛmɔ Ɛth-ter cuɛ karkɛ rur, /kenɛ rɔ lat ɛn ɣöö bëë ni̱kä, ce̱tnikɛ mëë ci Mɔr-da-kay ɛ guɔ̱k jɛ. Kɛ ɣöö Ɛth-ter luthɛ Mɔr-da-kay ɛlɔ̱ŋ ce̱tnikɛ ta̱a̱ ëë piith ɛ ni jɛ.

²¹ Kɛn ni̱ni tɔ̱tɔ̱ mëë te Mɔr-da-kay nyuurä thok kal dhɔaar kua̱r. Cu Big-than kɛnɛ Tɛ-rɛc tin la jio̱wni kua̱r da̱ŋ rɛw tin la yiënkɛ thok duëël kua̱r gaak. Kä cukɛ go̱r ni näk Kua̱r ni Ä-ɣɛ̈c-we-roc.

²² Duundɛ ɣöö, cua ruac ɛmɔ ŋa̱c ɛ Mɔr-da-kay kä cu Mɔr-da-kay jɛ la̱r Ciëk Kua̱r ni Ɛth-ter. Kä cu Ɛth-ter jɛ wä la̱r kuäär kɛ ciöt Mɔr-da-kay.

²³ Kä mëë wa ruac tharɛ go̱r, cua jɛ jek ɛn ɣöö ɛ thuɔ̱k. Cua kɛn wutni da̱ŋ rɛw ti̱ti̱ ŋap kɛɛl guäth ŋäpä. Kä cua ruac ɛmɔ gɔ̱a̱r piny rɛy buɔk ruëc, ɛ te kuäär ni thi̱n.