Ji̱ Ɛ-pɛ-thäth 6 - RUAC KUƆTH IN RƐL RƆ

Gaat kɛnɛ diëëthkiɛn

¹ Yɛn gaat, luɔ̱thɛ diëëthkun rɛy Kua̱r ni Yecu, kɛ ɣöö nɛmɛ ɛ cuɔ̱ɔ̱ŋ.

² “Luthni guur kɛnɛ muɔɔr,” nɔmɔ ɛ jɛn luek in nhiam kɛ min ca lar,

³ “kɛ ɣöö dɔ̱ŋ bɛ gɔaa kɛ ji̱, kä bi tëkdu jääny wi̱i̱ muɔ̱ɔ̱n.”

⁴ Gua̱ni gan, /cuarɛ gaatkun ciɛŋ kɛ kɛ ciaaŋ mi bikɛ jakä gak, kä piɛthɛ kɛ rɛy luthä kɛnɛ ŋi̱i̱c Kua̱r ni Yecu.

Kuaany kɛnɛ kua̱r

⁵ Kuaany, luɔ̱thɛ kua̱rikun tin te wi̱i̱ muɔ̱ɔ̱n kɛ dual kɛnɛ lath, kɛ lɔc kɛl, ce̱tkɛ min luth yɛn Kritho.

⁶ La̱tdɛ nɛmɛ a /ci mɔ a ɣöö guɛckɛ yɛ, kɛ ɣöö bi yɛn lo̱ckiɛn jakä tɛth. Kä duundɛ ɣöö la̱tdɛ jɛ kɛ lo̱ckun ce̱tkɛ min go̱o̱r Kuoth ɛ, ce̱tkɛ nɛy ti luɔ̱thkɛ Kritho.

⁷ La̱tdɛ kɛ lo̱c ti gɔw ce̱tkɛ mi lät yɛn ni Kuäär ikä a /ci mɔ a naath.

⁸ Ŋa̱cnɛ ɣöö mɔ gɔaa ɔ banɛ la̱t ɔ, banɛ mi päär kɛ nyɔk kɛ jek kä Kuäär, mi cäŋ lapnɛ kuaany kiɛ lɔr kɔn.

⁹ Kua̱r, la̱tdɛ mi ce̱tkɛ min ci kɛn ɛ la̱t, kä pa̱lɛ dhietdiɛn, kɛ ɣöö ŋäc yɛn ɣöö te yɛn kɛ Kuäär kɛl min te nhial, kä jɛn ciɛŋɛ nɛy diaal a päär.

Ko̱t köör Kuɔth

¹⁰ Kɛ jɔak, buɔ̱mɛ rɛy Kua̱r ni Yecu kɛnɛ rɛy bumädɛ min di̱i̱t.

¹¹ La̱thɛ ko̱t köör Kuɔth kɛɛliw, kɛ ɣöö dërɛ rɔ̱ luäŋ kɛ cuɔ̱ŋ a bum, kɛ ko̱r kɛ gua̱n jiäkni.

¹² Kɛ ɣöö /ci kɔn ko̱r tɛr kɛ naath ti tekɛ ri̱ŋ kɛnɛ riɛm, kä duundɛ ɣöö ɛ tɛ̈r kɛ ruëëc, kɛnɛ lua̱ŋ, kɛ buɔ̱m kua̱ri muɔ̱th ɣɔaa ɛmɛ, kɛnɛ buɔ̱m yieeni tin te ro̱o̱l nhial.

¹³ Kɛ kui̱ ɛmɔ ka̱nɛ ko̱t Kuɔth kɛɛliw, kɛ ɣöö dërɛ rɔ̱ luäŋ kɛ cuɔ̱ŋ kɛ jɛn cäŋ ɛ jiääk ɛmɔ, kä kɛ kɔr köör ɛmɔ, bia ŋot cuŋä.

¹⁴ Cuɔ̱ŋɛ inɔ, kä yianɛ lɛ̈tdun kɛ thuɔ̱k ala la̱a̱k, kä bia kawdun kum kɛ ko̱t cuŋni.

¹⁵ Kɛ gua̱a̱th wa̱a̱rikun rialɛ ni rɔ̱ ikä kɛ ɣöö bia thuk malä ti gɔw wä lat.

¹⁶ Kɛɛl kɛ kɛn ti̱ti̱ diaal ka̱nɛ ko̱t ŋäthä, kɛ ɣöö kɛ jɛ bia bääri diaal tin ca dɔp kɛ mac kä ca yuɔr ɛ gua̱n jiäkni luäŋ kɛ yieny.

¹⁷ Kä ka̱nɛ kum känä, kɛnɛ thɛp Yieekä, min la ruac Kuɔth.

¹⁸ Palɛ rɛy Yieekä gua̱thni diaal, kɛ pali diaal kɛnɛ thiecni. Kɛ kui̱c ɛmɔ jiɛnɛ kä /cuarɛ rɔ̱ luär. Palɛ ni ciaŋ kɛ kui̱ nɛɛni diaal tin ci Kuoth kɛ lɛy.

¹⁹ Kä palɛ bä kɛ kui̱dä, kɛ ɣöö bi Kuoth ɣä ka̱m ruac thuɔk in cuääŋ naath. Kä palɛ kɛ ɣöö bä jɛ lat kɛ buɔ̱m lɔaac guäth ɔ bä gua̱a̱th jek thi̱n ɔ.

²⁰ Kɛ kui̱ thukni ti̱ti̱ lapä jääk ni rɛy yieenä. Palɛ kɛ ɣöö dee ɣän kɛ lat kɛ buɔ̱m lɔaac, ce̱tkɛ min dëë lat.

Ner in jɔak

²¹ Täämɛ, kɛ ɣöö bi yɛn ciaaŋdä kɛnɛ la̱tdä ŋa̱c, bi Ti-ki-käth, min la dämandan rɛy Kritho läät mi tekɛ ŋa̱th rɛy la̱t Kua̱r, yɛ wä la̱r ŋɔaani diaal.

²² Ɣän ja̱kä jɛ kä yɛ kɛ luɔt ɛmɛ, kɛ ɣöö bi yɛn ta̱a̱da ŋa̱c, kä jɛn bɛ lo̱ckun bum.

²³ A mal kɛnɛ nhök kɛɛl kɛ ŋa̱th tin bä kä Kuoth in la Gua̱a̱ra kɛnɛ Kuäär ni Yecu Kritho tekɛ yɛ.

²⁴ A puɔ̱th tekɛ nɛy diaal tin nhɔakɛ Kuääran ni Yecu Kritho kɛ nhök mi thil pek.