Ji̱ Ɛ-pɛ-thäth 5 - RUAC KUƆTH IN RƐL RƆ

Ciaaŋ rɛy buɔyä

¹ Kɛ kui̱ ɛmɔ bia nyiath ni Kuoth, ce̱tkɛ gaat ti nhɔkɛ.

² Kä ciëŋɛ rɛy nho̱kä, ce̱tkɛ min ci Kritho kɔn nhɔk, kä cɛ tëkdɛ thöp kɛ kui̱dan, ala ŋuäny mi gɔaa kä muc mi tɛɛth lɔc Kuɔth.

³ Kä leer kɛnɛ nyuɔɔn diaal kiɛ di̱t lɔaac, akɛ /ca cak kɛk rɛydun, kɛ ɣöö jiäkɛ rɛy nɛɛni tin ci Kuoth kɛ lɛy.

⁴ Kä cɛ gɔaa ɛn ɣöö bi ruac mi jiääk lat, kiɛ kuëëth, kiɛ to̱k baaŋä, kä gɔaa ni ɣöö bia la̱t ni Kuoth tɛth lɔaac.

⁵ Kä ŋa̱cɛ nɛmɛ agɔaa, ɛn ɣöö thilɛ ram mi lät leer kiɛ mi jiääk kiɛ ram mi di̱t lɔc (mi pääl kuthni guääyni) mi bi tekɛ kui̱c rɛy Kuäärä Kritho kɛnɛ Kuoth.

⁶ A thil ram mi mɛɛt yɛ kɛ rieet ti thil luɔt, kɛ ɣöö kɛ kui̱ ŋɔaani ti̱ti̱ bä waŋ lɔaac Kuɔth wi̱i̱ nɛɛni ti thil luth.

⁷ Kɛ kui̱ ɛmɛ /cuarɛ rɔ̱ mat kɛ kɛ kɛɛl.

⁸ Kɛ ɣöö mëëdan lapɛ ji̱ muɔ̱th, kä täämɛ rɛy Kua̱r ni Yecu lapɛ ji̱ buɔyä. Ciëŋɛ ce̱tkɛ gaat buɔyä,

⁹ kɛ ɣöö dɛy buɔyä kɛ lät diaal ti gɔw kɛnɛ cuŋ kɛ thuɔ̱k.

¹⁰ Kä ɣɔ̱a̱nɛ jɛ ɛn ɣöö bia min tɛth lɔc Kua̱r ni Yecu ŋa̱c.

¹¹ A thil gua̱a̱th mi kän yɛn ɛ kä lät muɔ̱th ti thil gɔy, kä nööŋɛ nikɛ rɛy buɔyä.

¹² Kɛ ɣöö ɛ pöc, a cäŋ nyääl raan ni min ca lat ɛ nɛy ɛ tɔ̱ kɛ tɛ̱̈ɛ̱̈.

¹³ Kä ti diaal ti ca nööŋ rɛy buɔyä, kɛn cikɛ jɔɔc ɛ cakɛ nɛn.

¹⁴ Kä ti diaal tin ca nɛn agɔaa cikɛ a buay. Kɛ kui̱c ɛmɔ ca jɛ lar i̱, “Keri ji̱n ram in ni̱i̱n! Kä jiɛc rɔ li̱th, kä bi Kritho ji̱ mɛr.”

¹⁵ Niɛkɛ rɔ̱ kɛ ɣöö bia cieŋ i̱di. /Cuarɛ cieŋ ce̱tkɛ nɛy ti dɔa̱a̱r, duundɛ ɣöö ciëŋɛ ti pɛl.

¹⁶ La̱tdɛ agɔaa gua̱thni diaal kɛ ɣöö ni̱n ti̱ti̱ jiäkɛ.

¹⁷ Kä yɛn /cuarɛ bi a dɔa̱a̱r, kä duundɛ ɣöö ŋa̱cɛ min go̱o̱r Kuäär ni Yecu ɛ.

¹⁸ Kä /cuarɛ yɔ̱ŋ kɛ kɔaŋ, kɛ ɣöö nɔmɔ bɛ ya̱r ni yɛ, kä a thiäŋ ni yɛn kɛ Yiëë.

¹⁹ Ruacɛ kamnikun, kɛ diit puɔnyä kɛnɛ wɛ̈ɛ̈ni kɛ diit yieekä. Kietdɛ kä liakɛ Kuäär kɛ lo̱ckun.

²⁰ Ni ciaŋ la̱rɛ Kuoth in la Gua̱a̱ra tɛ̈th lɔaac kɛ ti diaal kɛ ciöt Kua̱ran ni Yecu Kritho.

Män kɛnɛ cɔwkiɛn

²¹ Kua rɔ̱ lua̱r rɔ̱ kɛ luth kɛ ɣöö luth yɛn Kritho.

²² Män lua̱rɛ rɔ̱ cɔwkun ce̱tkɛ min luɔ̱thɛ Kuäär ni Yecu.

²³ Kɛ ɣöö cɔw ɛ wi̱c ciëk, ce̱tkɛ min te Kritho ala wi̱c duëël Kuɔth, min la puɔ̱ny, kä Kritho la käändɛ.

²⁴ Ce̱tkɛ min ci duel Kuɔth rɔ lua̱r Kritho, inɔ bä a män lua̱rkɛ rɔ̱ cɔwkiɛn rɛy kä ti diaal bä.

²⁵ Wutni, nhɔakɛ mänkun ce̱tkɛ min nhɔk Kritho duel Kuɔth, kä cuɛ rɔ thöp kɛ kui̱dɛ,

²⁶ kɛ ɣöö derɛ jɛ jakä mi rɛl rɔ, kɛ la̱kdɛ kɛ pi̱ kɛ riet.

²⁷ Cɛ nɔmɔ la̱t kɛ ɣöö bi duel Kuɔth ben cuɔ̱ŋ nhiamdɛ kɛ gɔɔydɛ kɛɛliw, kɛ ɣöö bɛ a wic wic mi thil pia̱a̱r, kiɛ biɛl mi jiääk kiɛ duɔ̱ɔ̱r mi ce̱tkɛ nɔ, kɛ ɣöö derɛ a mi rɛl rɔ mi thil bɛ̈l.

²⁸ Kɛ duɔ̱ɔ̱p mi ce̱tkɛ ɛ nɔ, a bi wutni mänkiɛn dhil nhɔk ce̱tkɛ min nhɔakɛ pua̱nykiɛn. Kɛ ɣöö jɛn ram mi nhɔk ciekdɛ nhɔkɛ ni rɔɔdɛ.

²⁹ Kɛ ɣöö thilɛ ram mi ci puɔ̱nydɛ met lo̱k, la mi̱i̱thɛ jɛ, kä yoopɛ jɛ, ce̱tkɛ min yoop Kritho duel Kuɔth,

³⁰ kɛ ɣöö lapnɛ cuŋ pua̱a̱nydɛ.

³¹ Ce̱tkɛ min ci Ruac Kuɔth ɛ lät i̱, “Kɛ kui̱ lotdä nɛmɛ bi wut gua̱n kɛnɛ man ba̱ny piny, kä bakɛ mat kɛnɛ ciekdɛ, kä bi kɛn da̱ŋ rɛw cua kɛl.”

³² Nɛmɛ ɛ ruac mi cuäŋ naath, kä caarä jɛ ɛn ɣöö lotdɛ ni Kritho kɛnɛ duel Kuɔth.

³³ Kä a ramɔ kä yɛ nhɔk ciekdɛ ce̱tkɛ rɔɔdɛ, kä a ciek luth cɔwdɛ.