Ji̱ Ɛ-pɛ-thäth 4 - RUAC KUƆTH IN RƐL RƆ

Mat pua̱a̱ny

¹ Ɣän ram mi ca yian kɛ kui̱ Kua̱r ni Yecu, la̱ŋä yɛ kɛ ɣöö bia cieŋ kɛ ciaŋ mi ro̱ŋ kɛ ciöt ëë cɔalkɛ yɛ.

² Ni ciaŋ jakni rɔ kä muɔ̱l, kä jakni rɔ kä wut pa̱ny, kɛ li̱ep bitdä, kä nhɔakɛ rɔ̱ kamnikun rɛy nho̱kä,

³ kä la̱tdɛ ti diaal kɛ ɣöö bia mat Yieekä rɔm ni ciaŋ rɛy malä.

⁴ Tëëkɛ puɔ̱ny kɛl, kɛnɛ Yiëë kɛl, ce̱tkɛ mëë ca yɛ cɔal kä ŋa̱th kɛl min ca yɛ cɔal thi̱n.

⁵ Tëëkɛ Kuäär kɛl, kɛ ŋa̱th kɛl, kɛ la̱k kɛl,

⁶ kɛ Kuoth kɛl in la Gua̱n nɛɛni diaal, mi te wi̱i̱ kä ti diaal, kä lätdɛ kɛ ti diaal, kä tëë rɛy kä ti diaal.

⁷ Kä duundɛ ɣöö ca ram ɔ ka̱m mucdɛ kä puɔ̱th Kuɔth, ce̱tkɛ pek theemä mucä Kritho.

⁸ Kɛ kui̱ ɛmɔ ca jɛ lar i̱, “Jɛn mëë cɛ wä ni nhial, cuɛ pɛ̈ɛ̈c ti ŋuan naŋ kɛ jɛ kɛɛl, kä cuɛ naath moc kɛ muc.”

⁹ Kä min wëë i̱, “Cɛ wä nhial,” lotdɛ ni ɣöö? Jɛn lotdɛ ni ɣöö cɛ wä piny muɔ̱ɔ̱n guäth jɔɔkni?

¹⁰ Jɛn ram in ci wä piny ɛ jɛn ram min ci wä nhial wi̱i̱ pua̱a̱ri diaal, kɛ ɣöö bɛ ti diaal thiäŋ.

¹¹ Kä muc tin cɛ ŋun ɛ ɣöö bi tha̱a̱ŋ nath a jaak, bi tha̱a̱ŋkiɛn a göök, kä bi tha̱a̱ŋkiɛn a da̱a̱k ruac Kuɔth, bi tha̱a̱ŋkiɛn a bööth palä kɛnɛ ŋi̱eec.

¹² Cɛ nɔmɔ la̱t kɛ ɣöö bɛ nɛɛ Kuɔth diaal rialikä kɛ ɣöö bikɛ la̱t la̱t, kɛ ɣöö ba puɔ̱ny Kritho jakä bum.

¹³ Kä bɛ wee wä amäni mi ci kɔn diaal ben kä ŋa̱th kɛl, kɛnɛ ɣöö banɛ Gat Kuɔth ŋa̱c. Kä bi kɔn cop ŋäcä ce̱tnikɛ Kritho.

¹⁴ Kä /canɛ bi ce̱tkɛ gaat tin la rietkɛ cärkiɛn kɛ ŋi̱i̱cni ti gööl, kɛ pɛl nɛɛni ti ji̱ mɛɛtdä ti ji̱ ca̱a̱pni.

¹⁵ Kä duundɛ ɣöö banɛ thuɔ̱k dhil lat rɛy nho̱kä, banɛ piith kɛ dup diaal rɛy Kritho min la bo̱o̱th.

¹⁶ Kä jɛ ɛn puɔ̱ny kɛɛliw ca jɛ mat kä ca jɛ yiɛn kɛ ra̱a̱l kɛɛl. Kä mi ci cuɔ̱ɔ̱ŋ pua̱a̱ny lät agɔaa, dee puɔ̱ny kɛɛliw piith a bɛ buɔ̱m rɛy nho̱kä.

Tëk mi pay tuɔɔk rɛy Kritho

¹⁷ Täämɛ ɣän la̱rä yɛ kä la̱tdä yɛ nɛmɛ kɛ ciöt Kua̱r ni Yecu, ɛn ɣöö /canɛ bi lɛ yi̱k ŋot kɛ ciaŋ mi ce̱tkɛ ciaaŋ Juri ala ciaŋ cärä wuɔ̱thnikiɛn mi baŋ.

¹⁸ Kɛn /ca ŋɔak ŋäc, kä thilɛ mi ŋäc kɛn ɛ, kä cakɛ woc rɛy teekä min ŋun Kuoth ɛ kɛ thil ŋäcä ŋɔaanidiɛn kɛnɛ buɔ̱m lo̱cnikiɛn.

¹⁹ Kɛn cikɛ po̱c, kä cikɛ rɔ̱ ka̱m ciaŋ riärä, a di̱t lo̱ckiɛn kɛ lätni ŋɔaani diaal ti jiäk.

²⁰ Kä mëë cia ŋa̱c kä Kritho /ciɛ jɛn ɛn nɔmɔ!

²¹ Kä ŋa̱cä jɛ ɛn ɣöö cia liɛŋ kui̱dɛ, kä ca yɛ ŋi̱eec kɛ thuɔ̱k in te rɛy Yecu.

²² Ca yɛ ŋi̱eec kɛ ɣöö bia ciaaŋdun ëëdan päl, puɔ̱nydun ëëdan cɛ jiääk, ca jɛ ya̱r ɛ tin go̱o̱rɛ i̱ bia la̱t.

²³ Kä ba yɛ jakä nɛy ti bi ciaŋ yieekä cärädun a mi gɔaa,

²⁴ kä bia pua̱nykun kum kɛ puɔ̱ny mi pay tuɔɔk, mi ca cak kɛ cät Kuɔth rɛy ciɛɛŋä thukä kɛnɛ ciaaŋ cuŋni kɛ ciaaŋ mi rɛl rɔ.

²⁵ Kɛ kui̱ ɛmɔ wuɔcɛ ciaŋ kacä. Kä kɔn diaal latnɛ ni thuɔ̱k kɛ ji̱ thieekädan, kɛ ɣöö lapnɛ ji̱ bunä kɛl ramɔ kä kɔn.

²⁶ Mi ci gaak, /cu duer lät, kä a cäŋ /ci kony a ŋot lɔcdu kɛ gak.

²⁷ Kä /cuarɛ gua̱n jiäkni moc gua̱a̱th rɛydun.

²⁸ A cueer pa̱lkɛ kuël, kä gɔaani ɣöö bikɛ lät, kɛ la̱t mi gɔaa kɛ tetkiɛn, kɛ ɣöö deekɛ tekɛ mi nyuaak kɛn ɛ kɛ nɛy tin dak nyinkiɛn.

²⁹ A thil ruac mi jiääk mi bä raar thokdun, kä latdɛ ni min gɔaa min luäk ni naath kä ŋun ni min görkɛ, kɛ ɣöö mɔ bia lar ɔ bɛ mi gɔaa lät kä nɛy tɔ̱ bi jɛ liŋ tɔ̱.

³⁰ Kä /cuarɛ Yiëë Kuɔth in Gɔaa in Rɛl Rɔ lɔcdɛ jakä jiɛth, kɛ ɣöö jɛn yiëë ɛ biɛl mi nyooth ɣöö kɛ yɛn nɛɛ Kuɔth kɛ cäŋ luël.

³¹ Wuɔcɛ ciɛŋ kɛcä lɔaac diaal kɛnɛ gakdu kɛ ŋaknɔm, kɛ guer kɛ la̱a̱t jiäkni diaal.

³² A lo̱ckun kɔ̱c kɛ rɔ̱ kä nhɔakɛ rɔ̱, pa̱lɛ rɔ̱ ikä, ce̱tkɛ min ci Kuoth yɛ pälikä rɛy Kritho.