Ji̱ Ɛ-pɛ-thäth 3 - RUAC KUƆTH IN RƐL RƆ

La̱t Puɔl kɛ Jur

¹ Kɛ kui̱ ɛmɔ, ɣän Puɔl, min la raan yieenä kɛ kui̱ Yecu Kritho, ka̱mä rɔ mua̱a̱l kɛ kui̱dun yɛn Jur.

² Kɛ thuɔ̱k cia jɛ liŋ ɛn ɣöö ci Kuoth ɣä ka̱m la̱t ɛmɔ kɛ puɔ̱thdɛ kɛ kui̱ gɔɔyädɛ.

³ Kä cɛ ruacdɛ min cuäŋ naath jakä ŋa̱cä jɛ kɛ ɣöö cɛ nyuɔ̱th ɣä. Ɣän cä mi tɔt gɔ̱r kɛ kui̱dɛ.

⁴ Kä mi cia min cä gɔ̱r kuɛn, dee yɛn ɛ nɛn kɛ thuɔ̱k ɛn ɣöö cä tɛ̱̈ɛ̱̈ ŋa̱c kɛ kui̱ Kritho.

⁵ Kä kɛ gua̱a̱th ëë ci wä /ka̱n raan kɔn nyuɔ̱th tɛ̱̈ɛ̱̈ ɛmɔ. Kä täämɛ ca nyuɔ̱th jaak tin rɛ̈l kɛ rɔ̱ kɛnɛ göök kɛ Yiëë.

⁶ Kä tɛ̱̈ɛ̱̈ ɛmɛ, ɛ ɣöö kɛ thuk ti gɔw nɛy tin /ci tɔ̱ a ji̱ Juudh bikɛ puɔ̱th Kuɔth nyuak kɛ ji̱ Juudh. Kɛn diaal kɛ ji̱ pua̱a̱ny ɔ kɛl ɔ, kä nyuaak kɛn min ca lar ɛ Kuoth kɛ Kritho Yecu.

⁷ Cu ɣän a läät thuɔk in gɔaa ɛmɛ kɛ muc puthä Kuɔth min cɛ ka̱m ɣä kɛ la̱t bumädɛ.

⁸ Ɣän kuiy ni ɣän kä nɛɛ Kuɔth diaal, kä duundɛ ɣöö ci Kuoth ɣä ka̱m muc kä ɣöö bä Jur la̱t thuk ti gɔw riäŋä Kritho.

⁹ Kä ci Kuoth ɣä ka̱m ɣöö bä nɛy diaal la̱t ca̱p ëë ca tɛ̱̈ɛ̱̈, min ci rɔ tɔ̱w rɛydɛ ni tukä jɛn Kuoth in cak ti diaal.

¹⁰ Kä min lotdɛ ɛ ɣöö kɛ duel Kuɔth bɛ kua̱r diaal kɛnɛ bum rööl nhial ɛn täämɛ bikɛ pɛl Kuɔth ŋa̱c kɛnɛ dupkɛ ti gööl.

¹¹ Cu Kuoth mɛmɛ la̱t kɛ ca̱rɛ mi do̱raar mi cuɛ la̱t kɛ Kritho Yecu Kuääran.

¹² Rɛy Kritho dënɛ ben nhiam Kuɔth a lɔr kä a thil dual. Kä dënɛ nɔmɔ la̱t kɛ ŋa̱th Kritho.

¹³ Kä ɛnɔ ɣän la̱ŋä yɛ ɛn ɣöö /ci lo̱ckun bi baath kɛ ɣöö cuɔ̱cä kɛ kui̱dun, ɛn cuɔ̱cdä ɛ kui̱ gɔɔyädun.

Nhök Kritho

¹⁴ Kɛ kui̱ ɛmɛ ka̱mä rɔ mua̱a̱l nhiam Gua̱a̱r in te nhial,

¹⁵ min ca ciötdɛ ka̱m dho̱r diaal tin te nhial kɛnɛ wi̱c muɔ̱ɔ̱n.

¹⁶ Ɣän palä Kuoth ɛn ɣöö rɛy riäŋädɛ derɛ yɛ moc kɛ buɔ̱m rɛy lo̱cnikun kɛ buɔ̱m Yieekädɛ.

¹⁷ Ɣän palä kɛ ɣöö dee Kritho cieŋ lo̱cnikun kɛ ŋa̱th. Kä palä bä kɛ ɣöö dee nhökdun buɔ̱m,

¹⁸ kɛ ɣöö dee yɛn tekɛ buɔ̱m kɛɛl kɛ nɛy diaal tin ci Kuoth kɛ lɛy, kɛ ɣöö dee yɛn ɣäp ɣääp kɛnɛ bär jɔakdɛ kɛ bärɛ nhial kɛnɛ luëŋ nho̱kä Kritho ŋa̱c ɛn ɣöö ɛŋu.

¹⁹ Kɛnɛ ɣöö bia nhök Kritho min leny ti diaal ŋa̱c, kɛ ɣöö dee yɛn ro̱ŋ kɛ pek tääkä Kuɔth kɛɛliw.

²⁰ Täämɛ jɛn ram in tekɛ lua̱ŋ in lät rɛydan, tëëkɛ lua̱ŋ mi lätdɛ ti ŋuan ɛlɔ̱ŋ ti leny ti diaal tin dënɛ thiec kɛnɛ tin dënɛ car.

²¹ A liak wä kä jɛ rɛy dueel Kuɔth kɛnɛ rɛy Kritho Yecu, kä ri̱c diaal a thil pek. Inɔnɔ.