Ji̱ Ɛ-pɛ-thäth 2 - RUAC KUƆTH IN RƐL RƆ

Jiɛɛn li̱th kɛ wä teekä

¹ Cia li̱w kɛ kui̱ thil luthädun kɛnɛ dueer.

² Kɛ gua̱a̱th ëëdan cia guɔ̱ɔ̱r ni dup ɣɔaa ɛ jiääk ɛmɛ, kä guur yɛn ni buɔ̱m kua̱r jiɔam mi jiääk, ɛ jɛn yiëë in lät täämɛ rɛy nɛɛni tin /ca Kuoth luth.

³ Kɛ thuɔ̱k ce̱t kɔn diaal kɛ kɛ, ce̱tkɛ min go̱o̱r pua̱nykɔn ɛ, kä guur kɔn ni tin go̱o̱r puɔ̱nykɛ kɛnɛ ca̱r. Kä kɛ ta̱a̱ ciɛŋädan ce̱t kɔn kɛ nɛy tin kɔ̱kiɛn, bi kɔn waŋ lɔaac Kuɔth jek.

⁴ Kä Kuoth tëëkɛ kɔ̱a̱c lɔaac mi di̱i̱t kä nhökdɛ di̱tdɛ kɛ kɔn,

⁵ cäŋ ni mëë canɛ li̱w kɛ kui̱ dueeri, cɛ kɔn jakä tëk kɛ Kritho kɛɛl. Kä kɛ puɔ̱th baaŋ Kuɔth ca yɛ kän.

⁶ Kä cɛ kɔn jiɛc kɛ Kritho kɛɛl, kä cɛ kɔn jakä nyuur kɛ jɛ kɛɛl nhial rɛy Kritho Yecu.

⁷ Cɛ nɛmɛ la̱t kɛ ɣöö kɛ gua̱a̱th ɔ bi ben ɔ bɛ kɔn nyuɔ̱th ria̱ŋ puthädɛ min di̱i̱t kɛ gɔɔydɛ kɛ kɔn rɛy Kritho Yecu.

⁸ Kɛ ɣöö kɛ puɔ̱th baaŋ Kuɔth ca yɛ kän kɛ ŋa̱th. Kä mɛmɛ /ciɛ lät yɛn ɛ muc kä Kuoth.

⁹ /Ciɛ luɔt lätnikun, a thilɛ ram mi dee rɔ liak.

¹⁰ Kɛ ɣöö Kuoth cɛ kɔn la̱t kɛ ta̱a̱dan ɛmɛ, cakɛ kɔn rɛy Kritho Yecu kɛ kui̱ lätni ti gɔw, min ci Kuoth ɛ rialikä nikɛ nhiam, kɛ ɣöö ba duɔ̱ɔ̱p teekädan.

Kɛɛl kɛ Kritho

¹¹ Kɛ kui̱ ɛmɛ tiɛmɛ jɛ ɛn ɣöö mëëdan yɛn nɛy tin diëthkɛ ala Jur tin cɔalkɛ i̱ “nɛy ti /ka̱n cuɛl” ɛ nɛy tin “ca cuɛl”, min la̱tkɛ kä puɔ̱ny kɛ tet nath.

¹² Kä tiɛmɛ jɛ ɛn ɣöö mëëdan na̱n yɛn kɛ Kritho. Kä kɛ yɛn jur ti thil mat kɛ nɛɛ Kuɔth tin cɛ mɛk. Kä thilɛ yɛ gua̱a̱th rɛy matdä ruaacni, min bä kɛ ruac in ci Kuoth ɛ la̱r nɛɛkɛ, kä bia cieŋ rɛy ɣɔaa ɛmɛ a thil ŋa̱th kä thil Kuoth.

¹³ Kä täämɛ rɛy Kritho ca yɛn tin ci kɔn na̱n ɛlɔ̱ŋ, nöŋ thiäkä kɛ riɛm Kritho.

¹⁴ Kɛ ɣöö ɛ jɛn malan, mi ci kɔn mat ala kɛl ji̱ Juudh kɛnɛ Jur, kä cɛ päny ëë te kamdan min dääk naath töl piny.

¹⁵ Cuɛ ŋuɔ̱t kɛnɛ luëëk woc, kɛ ɣöö bɛ gua̱th nɛɛni da̱ŋ rɛw mat ala ram kɛl kɛ mat kɛ jɛ kɛɛl. Kɛ jɛn duɔ̱ɔ̱p ɛmɔ lätdɛ ni mal.

¹⁶ Kä kɛ lia̱a̱ Yecu wi̱c jiaath, cɛ tɛriɛn däk. Kɛ jɛn lia̱a̱ ɛmɔ wi̱c jiaath cɛ kɛn bun da̱ŋ rɛw mat ala kɛl. Kä cɛ kɛ luɔc maarä kɛ Kuoth.

¹⁷ Kä cuɛ ben lätdɛ mal kɛ yɛn nɛy tëë na̱n, kɛnɛ yɛn nɛy tin thia̱k.

¹⁸ Kɛ kui̱ Yecu te kɔn da̱ŋ rɛw kɛ gua̱a̱th mi banɛ cop ni nhiam Gua̱a̱ra in te nhial rɛy Yieekä kɛl.

¹⁹ Kɛ kui̱ ɛmɔ /ci yɛn ŋot ala Jur kiɛ ja̱a̱l, lapɛ ji̱ rööl kɛl kɛ nɛy tin ci Kuoth kɛ lɛy kä kɛ yɛn ji̱ dhɔaar Kuɔth.

²⁰ Kä yɛn bä ca yɛ cuŋ wi̱i̱ keŋni min ca la̱t ɛ jaak kɛnɛ göök, kä jɛn Yecu Kritho puɔ̱nydɛ ɛ päm gɔŋtɔtdä.

²¹ Kä rɛydɛ ca ti̱c kɛɛliw mat thi̱n, kä cuɛ piith ala luak Kuɔth in rɛl rɔ rɛy Kua̱r ni Yecu.

²² Kä yɛn bä rɛy Kritho, ca yɛ la̱t kɛɛl kɛ ji̱ Juudh guäth in cieŋ Kuoth thi̱n kɛ Yiëë.