Ji̱ Ɛ-pɛ-thäth 1 - RUAC KUƆTH IN RƐL RƆ

¹ Ɣän Puɔl, jak Kritho Yecu kɛ ruac Kuɔth, gɔ̱a̱rä jɛ yɛ, yɛn nɛy tin ci Kuoth kɛ lɛy tin te kä Ɛ-pɛ-thäth, amäni nɛy tin tekɛ ŋa̱th rɛy Kritho Yecu.

² A puɔ̱th kɛnɛ mal in bä kä Gua̱a̱ra ni Kuoth kɛnɛ Kuäär ni Yecu Kritho tekɛ yɛ.

Puɔ̱th yieekä rɛy Kritho

³ A liak te kɛ Kuoth in la Gua̱n Kua̱ran ni Yecu Kritho, min ci kɔn poth rɛy Kritho kɛ nyin yieekä diaal tin te ro̱o̱l nhial.

⁴ Kä cɛ kɔn mɛk a /ka̱n ɣɔw ni cak rɛy Kritho kɛ ɣöö bi kɔn a nɛy ti rɛ̈l kɛ rɔ̱, ti thil bɛ̈l nhiamdɛ rɛy nho̱kä.

⁵ Jɛn cɛ kɔn rialikä rɛy nho̱kä ɛn ɣöö bi kɔn a gaatkɛ rɛy Kritho Yecu nikɛ tɛ̈th lɔaacdɛ min cɛ car.

⁶ Kä liak nɛ Kuoth kɛ kui̱ gɔɔyä puthädɛ, kɛ kui̱ mucä baaŋ min cɛ ka̱m kɔn kɛ Gatdɛ min nhɔkɛ.

⁷ Rɛy Yecu te kɔn kɛ ka̱n kɛ riɛmdɛ, min la päl dueerikɔn, ce̱tkɛ di̱t puthädɛ,

⁸ min cɛ ka̱m kɔn ɛlɔ̱ŋ. Kɛɛl kɛ pɛlɛ kɛnɛ ŋäc ŋɔaani

⁹ kɛ ɣöö cɛ kɔn nyuɔ̱th mi cuäŋ naath kɛ ruacdɛ ce̱tnikɛ gɔɔy lɔaacdɛ a min cɛ jakä jɔc rɛy Kritho.

¹⁰ Kä ca̱p ɛmɛ ba jɛ thuk mi wä gua̱a̱thdɛ wä cop, kɛ ɣöö ba ŋɔaani diaal mat kɛɛl tin te nhial kɛnɛ tin te piny bi Kritho ku la wi̱cdiɛn.

Mat nath rɛy Kritho

¹¹ Ŋɔak diaal cakɛ la̱t kɛ ca̱r Kuɔth kɛnɛ min cɛ lar. Kä Kuoth cɛ kɔn mɛk kɛ ɣöö bi kɔn a nɛɛkɛ kɛ matdan kɛ Kritho kɛ kui̱ kä min cɛ car. Kä nɛmɛ bëë kä ca̱rɛ nikɛ tukdɛ.

¹² Kɛ kui̱c ɛmɔ kɔn nɛy tin nhiam tin ci Kritho ŋäth, dënɛ tëk kɛ ɣöö liaknɛ buay Kuɔth.

¹³ Yɛn bä ca yɛ bil kɛ biɛl Yiëë in Gɔaa in Rɛl Rɔ min ca lar. Kä nɛmɛ cɛ tuɔɔk mëë ci yɛn ruac in thuɔ̱k liŋ, min la thuk ti gɔw kɛ kui̱ känädun. Kä cu yɛn ɛ ŋäth.

¹⁴ Jɛn Yiëë ɛmɔ ɛ jɛn läär in thuɔ̱k min banɛ jek min ci Kuoth ɛ la̱r nɛɛkɛ, kä nɔmɔ nyuthɛ jɛ kɔn ɛn ɣöö bi Kuoth ciaaŋ lɔrä ka̱m nɛɛkɛ. Kä bikɛ buaydɛ liak!

Pal Puɔl

¹⁵ Kɛ ɣöö cä ŋa̱thdun rɛy Kua̱r ni Kritho liŋ, kɛnɛ nhökdun kɛ nɛy tin ci Kuoth kɛ lɛy,

¹⁶ kä /ka̱n lär tɛthä lɔaac päl kɛ kui̱dun. Ɣän la tiɛɛmä yɛ ciaŋ rɛy palikä.

¹⁷ Ɣän la̱ŋä Kuoth Kua̱ran ni Yecu Kritho, min la Gua̱n buɔyä, ɛn ɣöö derɛ yɛ ka̱m yiëë pɛlä kɛnɛ nyuuth kɛ ɣöö bi yɛn ɛ ŋa̱c.

¹⁸ Kä ɣän thiëcä ɛn ɣöö bia jɛ ŋa̱c kɛ lo̱ckun kɛ ɣöö bi yɛn ŋa̱th in cɛ yɛ cɔal thi̱n ŋa̱c, kɛnɛ ria̱ŋ puthä min ci Kuoth ɛ la̱r nɛy tin cɛ lɛy,

¹⁹ kɛnɛ di̱t bumädɛ, min lät rɛydan kɔn nɛy tin ŋa̱th. Kä jɛn buɔ̱m ɛmɔ, ɛ jɛn buɔ̱m luäŋä mi di̱i̱t.

²⁰ Kä cu Kuoth buɔ̱m ɛmɛ la̱th lät kɛ Kritho, guäth ëë cɛ Yecu jiɛc li̱th, kä cuɛ jɛ nyuɔ̱ɔ̱r cueecdɛ ro̱o̱l ciëŋ nhial.

²¹ Cu Yecu a rueec mi te wi̱i̱ ruëëcni, wi̱i̱ luäŋni, kɛnɛ bum kɛ Kua̱r. Kä di̱tni ciötdɛ kä ciööt diaal tin ca cɔal, rɛy ɣɔaa ɛmɛ amäni rɛy ɣɔaa ɛ bi ben ɔ.

²² Kä cuɛ ŋɔak diaal la̱th ciöknikɛ, kä cuɛ jɛ jakä wi̱c ŋɔaani diaal kɛ kui̱ duëël Kuɔth.

²³ Kä duel Kuɔth ɛ puɔ̱nydɛ. Kä jɛn duel Kuɔth cɛ Kritho ro̱ŋ, kä jɛn Kritho cɛ ti diaal ro̱ŋ kɛ dup diaal.