Diit 99 - RUAC KUƆTH IN RƐL RƆ

Liak ɛ Kuoth kɛ ɣöö rɛl gɔɔydɛ rɔ

¹ Kuoth Nhial ɛ kuäär, kä a naath diaal lathɛ kɛ dual! Kä jɛn cɛ nyuur wi̱i̱ kɔam kuäärädɛ, wi̱i̱ pua̱nyni ti tekɛ gɔ̱k, kä a piny kuɛ lath!

² Kuoth Nhial di̱tdɛ kä Dha-yɔn, kä liakɛ ni jɛ ɛ döör diaal.

³ Akɛ liak kɛ ciötdu min di̱i̱t in luɔ̱thkɛ, kɛ ɣöö rɛl gɔɔydɛ rɔ!

⁴ Kuäär mi bumɛ, kä ɛ nho̱o̱k cuŋni, ji̱n ci päär rialikä, ji̱n ci cuŋ kɛnɛ thuɔ̱ɔ̱k la̱t kɛ kui̱ thuɔk duëël Je-kɔb.

⁵ Liakɛ Kuoth Nhial ni Kuothdan. Pal ɛ jɛ luaakdɛ kɔm ciöknikɛ jɛn rɛl gɔɔydɛ rɔ!

⁶ Muthɛ kɛnɛ Ä-ron tekɛ rɛy bööthni palädu, kä Tha-muɛl tëë rɛy nɛɛni tëë ca ciötdɛ pal. Cukɛ Kuoth Nhial thiec, kä cuɛ kɛ loc.

⁷ Cuɛ ruac kɛ kɛ rɛy ciökä puɔ̱rä, kä cukɛ luëëkɛ tit, amäni ŋuɔ̱t tëë cɛ ka̱mkɛ.

⁸ Aɣ Kuoth Nhial ni Kuothda cikɛ loc, ɛ ji̱n Kuoth mi pälkɛ ikä, duundɛ ɣöö la duääci kɛ kɛ kui̱ jiäknikiɛn.

⁹ Liakɛ Kuoth Nhial ni Kuothdan, kä palɛ jɛ wi̱i̱ pa̱a̱mdɛ min rɛl gɔɔydɛ rɔ̱, kɛ ɣöö Kuoth Nhial ni Kuothdan rɛl gɔɔydɛ rɔ.