Diit 98 - RUAC KUƆTH IN RƐL RƆ

Liak ɛ Ruey Ɣɔaa

(Ɛ dit)

¹ Ki̱etdɛ Kuoth Nhial dit mi pay cak, kɛ ɣöö cɛ ti ga̱ykɛ naath la̱t. Tet cuëëcdɛ kɛnɛ wuɔ̱ɔ̱kdɛ min rɛl rɔ, cikɛ jɛ nöŋ juɔ̱c nath.

² Kä jɛn Kuoth Nhial cɛ juɔ̱cdɛ kɛ naath nyoth, kä jɛn cɛ cuŋkɛ nyuɔ̱th döör wec muɔ̱ɔ̱n diaal.

³ Kä jɛn cɛ nhökdɛ min thil pek tim kɛnɛ ŋa̱thdɛ min di̱i̱t, kɛ kui̱ thuɔk duëël ji̱ I-thɛ-rɛl. Kɛn pëk ɣɔaa diaal cikɛ juɔ̱c Kuɔthda nɛn.

⁴ Këtdɛ Kuoth Nhial diit tɛthä lɔaac, yɛn ji̱ wec muɔ̱ɔ̱n, rɔalɛ kɛ diit puɔnyä kä liakɛ jɛ.

⁵ Ki̱etdɛ Kuoth Nhial diit kɛ thuɔmni, puanyɛ jɛ kɛ thuɔmni kä liakɛ jɛ kɛ diit.

⁶ Kuɔthɛ jɛ tuŋ kɛnɛ kaaŋ, rɔalɛ kɛ tɛ̈th lɔaac nhiam Kua̱r ni Kuoth Nhial.

⁷ Kä a yier wuɔ̱w kɛnɛ tin diaal tin te thi̱n, amäni ɣɔw kɛnɛ tin diaal tin cieŋ thi̱n.

⁸ Kä a kiɛr patkɛ tetkiɛn, kä a pääm kɛ̈tkɛ diit tɛ̈thä lɔaac kɛɛl,

⁹ nhiam Kuɔth Nhial, kɛ ɣöö bɛ ɣɔw ben luk. Kä jɛn bɛ ɣɔw ben luk kɛ cuɔ̱ɔ̱ŋ, kä bɛ naath ben luk a päär.