Diit 96 - RUAC KUƆTH IN RƐL RƆ

Liakɛ Kuoth in bëë kɛ luk

¹ Ki̱etdɛ Kuoth Nhial dit mi pay cak, ki̱etdɛ Kuoth Nhial diit yɛn ji̱ wec muɔ̱ɔ̱n diaal.

² Ki̱etdɛ Kuoth Nhial diit kä puanyɛ ciötdɛ, latdɛ jɛ ni ciaŋ ɛn ɣöö ɛ kään.

³ La̱tdɛ döör diaal buɔ̱mdɛ, la̱tdɛ lätkɛ tin ga̱ykɛ naath rɛy nɛɛni diaal.

⁴ Kɛ ɣöö bum Kuoth Nhial ɛlɔ̱ŋ, kä ro̱ŋ ni jɛn kɛ liak mi di̱i̱t, kä ba luɔ̱th ni jɛ kä kuth diaal.

⁵ Kɛ ɣöö kuth dööri diaal kɛ guäy, duundɛ ɣöö Kuoth Nhial ɛ jɛn cak pua̱a̱r ɔ.

⁶ Kä luth kɛnɛ wuɔ̱t tekɛ nhiamdɛ, kä buɔ̱m kɛnɛ maan tekɛ rɛy luaakdɛ.

⁷ Liakɛ Kuoth Nhial yɛn ji̱ wec muɔ̱ɔ̱n diaal, liakɛ wuɔ̱t Kuɔth Nhial kɛnɛ buɔ̱mdɛ.

⁸ Liakɛ gɔɔy cio̱tädä Kuɔth Nhial, Nöŋɛ jɛ muc, kä bia rɛy kal luaakdɛ.

⁹ Palɛ Kuoth Nhial rɛy gɔɔyädɛ min rɛl rɔ, guɔŋɛ rɔ̱ nhiamdɛ yɛn ji̱ wec muɔ̱ɔ̱n diaal.

¹⁰ Kä la̱rɛ jɛ döör i̱, “Kuoth Nhial ɛ Kuäär! Kä ɣɔw ca jɛ la̱t a bum, thilɛ mi bi jɛ wany. Kä bɛ nɛy diaal luk ɛ päär.”

¹¹ A nhial kɛnɛ piny lo̱ckiɛn tɛth, kä a yier rɔal kɛnɛ tin diaal tin te thi̱n,

¹² kä a ka̱a̱k lo̱ckiɛn tɛth kɛnɛ nyinkiɛn diaal. Kä a jiɛn ruɔ̱ɔ̱p diaal kiɛtkɛ diit tɛthä lɔaac,

¹³ nhiam Kuɔth Nhial kɛ ɣöö bëë kɛ, bëë kɛ ɣöö bɛ wi̱c muɔ̱ɔ̱n ben luk. Bɛ ɣɔw ben luk kɛ cuŋ, kä bɛ naath ben luk kɛ thuɔ̱ɔ̱k.