Diit 92 - RUAC KUƆTH IN RƐL RƆ

Dit tɛthä lɔaac

(Dit kɛ kui̱ ca̱ŋ lɔ̱ŋä)

¹ Gɔaa ɛ ɛn ɣöö dëë Kuoth Nhial puany, kä kɛ̈tdä diit puɔnyä kɛ kui̱ cio̱tädu, lö Kuoth in Di̱t ni Jɛn.

² Kä bä nhökdu min thil pek lat kɛ runwaŋ, kä bä gɔɔydu latkɛ wäär ni ciaŋ,

³ kɛ jiööth thuɔmni, kɛnɛ jiööth kaaŋni.

⁴ Kɛ ɣöö ci ɣä moc tɛth lɔaac lö Kuoth Nhial kɛ lätku, ɣän bä diit tɛthä lɔaac kɛt kɛ kui̱ lätniku.

⁵ Kä ku lätku lɛ ŋuan i̱di lö Kuoth Nhial! Kä cärku nɔ̱a̱nkɛ ɛlɔ̱ŋ!

⁶ /Ci ram mi nyua̱n kɛ ŋäc, kä /ci ram mi dɔ̱a̱r ti̱ti̱ dëë ŋa̱c.

⁷ Ɛ cäŋ ku ji̱ nyuɔɔni piith ce̱tnikɛ juaac, kä ŋuan la̱a̱t jiäkni, duundiɛn ɣöö bikɛ da̱k amäni cäŋ kɛl.

⁸ Kä ji̱n lö Kuoth Nhial ji̱n ba ji̱ puany amäni cäŋ kɛl.

⁹ Kɛ kui̱ ji̱ tɛ̈ru lö Kuoth Nhial, kɛn ji̱ tɛ̈ru bikɛ duɔ̱p, kä ba la̱a̱t jiäkni diaal riaw dɔɔr.

¹⁰ Kä ɛ jɛn ci ɣä cu moc tuɔ̱ŋ ti bum ce̱tnikɛ tuɔ̱ŋ mök, kä ci ɣä wuɔ̱c liɛɛth puthä mi gɔaa ɛlɔ̱ŋ.

¹¹ Kɛ kui̱c ɛmɔ cä juɔ̱c ji̱ tɛ̈rä cu nɛn kɛ waŋdä, kä cä da̱k ji̱ nyuɔɔni liŋ kɛ ji̱thkä.

¹² Kä pith ji̱ cuŋni agɔaa ce̱tkɛ jiɛn nööri, kä pithnikɛn ce̱tkɛ jiɛn ŋuër rööl Lɛ-ba-nɔn.

¹³ Kä cakɛ pith ni rɛy luaak Kuɔth Nhial, kä gɔaa maandiɛn rɛy käli luaak Kuɔthdan.

¹⁴ Kä ŋotdɛ bikɛ dɛy kuir amäni dɔŋdiɛn, bikɛ ŋot wäkɛ nyak kä ku kɛ la tɔ̱ɔ̱c,

¹⁵ mi nyooth ni ɣöö Kuoth Nhial ɛ cuɔ̱ɔ̱ŋ, jɛn ɛ gääŋdä mi thil mi jiääk kä jɛ.