Diit 91 - RUAC KUƆTH IN RƐL RƆ

Kuoth ɛ gääŋdan

¹ Kä ram mi wä tëkdɛ lua̱k kä Kuoth in Di̱t ni Jɛn, jɛn ba jɛ gaŋ ɛ Kuoth in leny buɔ̱mdɛ ti diaal,

² kä bɛ Kuoth jiök i̱, “Ɛ ji̱n käändä kä gääŋdä, ɛ ji̱n Kuothdä min ŋa̱a̱thä.”

³ Kɛ ɣöö bɛ ji̱ gaŋ kä dhuur in ca tɛ̱̈ɛ̱̈, kä bɛ ji̱ gaŋ kä jua̱th tin na̱kɛ naath.

⁴ Kä jɛn bɛ ji̱ kum kɛ juätkɛ, kä bi ka̱n jek kä jɛ, kɛ thuɔ̱kdɛ bɛ la ko̱tdu kä gääŋdu.

⁵ Kä ci bi lɛ dual kɛ muth kɛ wäär, kiɛ nɛy ti makɛ ji̱ kɛ bääri kɛ cäŋdäär,

⁶ kiɛ jua̱th tin la ka̱pkɛ naath kɛ wäär, kiɛ da̱k mi bi ben kɛ cäŋdäär.

⁷ Kä dɔ̱ŋ de̱e̱ nɛy ti bathdɔɔr li̱w gekädu, kä de̱e̱ bathdɔɔri wäl kɔ̱kiɛn li̱w pe̱e̱k cuëëcdu, duundɛ ɣöö thilɛ mi bi ben thieekädu.

⁸ Bi guic ni ji̱n kɛ waŋdu, bi duäc in ba duäc nɛy tin la̱a̱t jiäkni nɛn.

⁹ Kä mi ci Kuoth Nhial jakä luääkdu, a ci Kuoth in Di̱t ni Jɛn jakä gääŋdu,

¹⁰ thilɛ mi jiääk mi bi ji̱ jek, thilɛ da̱k mi bi lɛ ben guäth cieŋdu.

¹¹ Kɛ ɣöö bɛ ja̱a̱kɛ jakä gaŋkɛ ji̱, bikɛ ji̱ yien duɔ̱pniku diaal.

¹² Kä bikɛ ji̱ thak kɛ tetkiɛn kɛ ɣöö /ci ciöku bi lɛ näk kɛ päm.

¹³ Kä bi dɔany ni loony kɛnɛ thɔ̱ɔ̱l, bi loony tin ŋɛ̈ny ŋɛ̈ɛ̈ny kɛnɛ thɔ̱ɔ̱l tin tekɛ lueŋ dɔny kä piny.

¹⁴ Kä cu Kuoth Nhial wee i̱, “Ɣän bä nɛy tin nhɔakɛ ɣä kän, kä bä nɛy tin ŋa̱ckɛ ciötdä gaŋ.

¹⁵ Kä mi wä kɛn ɣä cɔl, ɣän bä kɛ loc, kä bä tekɛ kɛ kɛɛl kɛ gua̱a̱th rikni, ɣän bä kɛ kän kä bäkɛ ka̱m luth.

¹⁶ Kä bäkɛ moc tëk mi bäär, kä bäkɛ nyuɔ̱th ka̱ndä.”