Diit 9 - RUAC KUƆTH IN RƐL RƆ

Muc tɛthä lɔaac Kuɔth

(Ɛ dit kɛ kui̱ gatdä mi dho̱o̱l mi ci li̱w kä ɛ dit Dee-bid)

¹ Ɣän bä ji̱ puany lö Kuoth Nhial kɛ lɔcdä kɛɛliw. Ɣän bä lätku diaal tin ga̱ykɛ naath lat.

² Ɣän bä ki̱et kɛ tɛ̈th lɔaac kɛ kui̱du, ɣän bä ciötdu puany, lö Kuoth in Di̱t ni Jɛn.

³ Mɔ ci ji̱ tɛ̈rä luny jɔk ɔ, la tëthkɛ kä li̱wkɛ nhiamdu.

⁴ Kä ci cuɔ̱ɔ̱ŋdä kɛnɛ lukdä rɔm. Ci nyuur wi̱i̱ kɔamdu, latdi luɔ̱ɔ̱k kɛ cuŋ.

⁵ Ci döör luek, kä ci ji̱ nyuɔɔni däk, ci ciöötkiɛn woc amäni cäŋ kɛl.

⁶ Ci ji̱ tɛ̈r da̱k kɛ da̱k mi thil pek, kä ci wi̱i̱kiɛn däk, kä ci kɛ̈kdiɛn cu bath.

⁷ Kä bi Kuoth Nhial ruëc amäni cäŋ kɛl, cɛ kɔmdɛ rialikä kɛ kui̱ luɔ̱k.

⁸ Bɛ ɣɔw luk kɛ thuɔ̱k, kä bɛ naath ruac kɛ cuŋ.

⁹ Kuoth Nhial ɛ ko̱t raam mi ciaŋkɛ jiäk, kä ɛ gua̱a̱th känä kɛ gua̱a̱th rikä.

¹⁰ Nɛy tin ŋa̱ckɛ ciötdu ŋa̱thkɛ ni ji̱, kä /cu ram mi go̱o̱r ji̱ päl ruëëc lö Kuoth Nhial.

¹¹ Puanyɛ Kuoth Nhial lö nɛy tin cieŋ kä Dha-yɔn! Latdɛ lätkɛ rɛy dööri!

¹² Kɛ ɣöö caarɛ nɛy tin ca riɛm wuɔ̱th piny, kä /cɛ lul nɛɛni tin cuc bi pa̱l ruëëc.

¹³ Päli ɣä ikä lö Kuoth Nhial! Kä guic bɛ̈c bɛ̈ɛ̈c tin ruɔ̱ɔ̱tdä kä nɛy tin lökɛ ɣä, kä kän ɣä thok duëël li̱eth,

¹⁴ Kä bä puɔnyniku diaal nyɔk kɛ la̱t thukni käli Jɛ-ru-tha-lɛm, kä bi lɔcdä cu tɛɛth kɛ ɣöö ci ɣä kän.

¹⁵ Ci döör pɛn rɛy kɔ̱a̱k in ci kɛn ɛ tɛt, kä ca ciökiɛn käp ɛ cambak in ci kɛn ɛ tɛ̱̈ɛ̱̈.

¹⁶ Ci Kuoth Nhial rɔ jak kä ŋa̱ckɛ kɛ lukdɛ mi cuɔ̱ɔ̱ŋ, ca ji̱ nyuɔɔni käp ɛ lätkiɛn.

¹⁷ Bi ji̱ nyuɔɔni diaal wä jɔɔkni, kɛnɛ döör diaal tin ca Kuoth pa̱l ruëëc.

¹⁸ Kä /ca can bi pa̱l ruëëc ni ciaŋ, kä /ci min ŋa̱thkɛ ɛ ga̱y bi met thil amäni cäŋ kɛl.

¹⁹ Bër lö Kuoth Nhial! /Cu raan jak kä mi liakɛ rɔ, ɛ döör luɔ̱kɛ nhiamdu!

²⁰ Jak nikɛ kä dual, lö Kuoth Nhial! Jakni döör kä ŋa̱ckɛ jɛ ɛn ɣöö kɛ naath!