Diit 89 - RUAC KUƆTH IN RƐL RƆ

Mat ruac Kuɔth kɛnɛ Dee-bid

(Wɛ̈ɛ̈ E-than raan Ɛdhra)

¹ Ɣän bä dit kɛt kɛ kui̱ nho̱kä Kuɔth amäni cäŋ kɛl, ɣän bä gɔɔydu la̱t ri̱c diaal.

² Kä nhökdu bɛ te thi̱n amäni cäŋ kɛl, kä gɔɔydu thilɛ mi wany jɛ ce̱tdɛ nikɛ pua̱a̱r.

³ Kä curi ruac i̱, “Cä mat ruac la̱t kɔnɛ raandä min cä mɛk, cä guk lat kɛ ja̱ŋdä ni Dee-bid i̱,

⁴ ‘Bä kuayku jak kä te thi̱n amäni cäŋ kɛl, kä bä kuääru jak kä te thi̱n rɛy ri̱cni diaal.’ ”

⁵ Ɛ pua̱a̱r liak lätku tin ga̱ykɛ naath lö Kuoth Nhial, kä gɔɔydu latkɛ jɛ rɛy dolädu min rɛl rɔ!

⁶ Kä ɛŋa nhial dëë pa̱a̱r kɛ Kuoth Nhial ɔ? Ɛŋa kä nɛy diaal tin te puɔ̱ɔ̱rä cäätkɛ Kuoth Nhial ɔ?

⁷ Ɛn Kuoth Nhial luɔ̱thkɛ ni jɛ, ɛ buɔ̱n nɛɛni tin gɔw, luɔ̱thkɛ ni jɛ ɛlɔ̱ŋ kä tin diaal tin te gekädɛ?

⁸ Kä lö Kuoth Nhial in la Ruey Ɣɔaa, ɛŋa mi bum ce̱tkɛ ji̱n Kuoth Nhial? Kä gɔɔydu tëë ni gekädu.

⁹ Ji̱n ruaaci bar mi di̱i̱t, kä la muaŋdɛ a jak kä bit.

¹⁰ Curi Ra-ɣab däk ce̱tkɛ ram mi ca näk, kä curi ji̱ tɛ̈ru riaw kɛ buɔ̱mdu.

¹¹ Pua̱a̱r ɛ duŋdu amäni piny bä ɛ duŋdu, kä ci ɣɔw cak nikɛ tin diaal tin te thi̱n.

¹² Kä curi cam ɣɔaa kɛnɛ cuec ɣɔaa cak, kä cu päm Ta-bor kɛnɛ päm Ɛr-mon ciötdu puany kɛ dit.

¹³ Ti̱i̱kɛ buɔ̱m mi di̱i̱t, tetdu bumɛ, ɛn tet cuëëcdu.

¹⁴ Kä kuääru ɛ kuäär cuŋni kɛnɛ thuɔ̱ɔ̱k, kä nhök kɛnɛ gɔɔy te ni kɛn nhiamdu.

¹⁵ Tɛ̈th lɔaac akɛ nɛy tin ŋa̱ckɛ ji̱, nɛy tin jäl rɛy buɔyä nhiamdu lö Kuoth Nhial,

¹⁶ tin liakɛ ciötdu ni̱ni diaal, tin liakɛ ji̱ kɛ kui̱ cuŋniku.

¹⁷ Ɛ ji̱n la wuɔ̱tda mɔ kä buɔ̱mda, kä kɛ nhökdu cikɔ moc kɛ buɔ̱m.

¹⁸ Kɛ thuɔ̱k bo̱o̱thda ɛ duŋ Kuɔth Nhial, kä kuäära ɛ duŋ Kuɔth I-thɛ-rɛl.

¹⁹ Mëëdan curi ruac kɛ nyuuthni kɛ nɛɛku curi kɛ jiök i̱, “Ɣän cä buɔ̱m ka̱m wääth köör, ɣän cua̱ ram kɛl mi ca mɛk rɛy nath ka̱m liak.

²⁰ Ɣän cä ja̱ŋdä ni Dee-bid jek, kä cua̱ jɛ yi̱r kɛ liɛɛthdä min rɛl rɔ,

²¹ bi buɔ̱mdä te kɛɛl kɛ jɛ ni ciaŋ, kä bä jɛ moc buɔ̱m kɛ lua̱ŋdä.

²² /Ci ji̱ tɛ̈rɛ jɛ bi luäŋ kɛ puɔ̱t, kä /ci ji̱ nyuɔɔni jɛ bi ciɛŋ a jiäk.

²³ Ɣän bä ji̱ tɛ̈rɛ dup nhiamdɛ kä bä nɛy tin lökɛ jɛ to̱l kä piny.

²⁴ Kä bi nhökdä kɛnɛ gɔɔydä te kɛɛl kɛ jɛ, kä kɛ kui̱ cio̱tdä ba buɔ̱mdɛ liak.

²⁵ Ɣän bä kuäärɛ jak kä räth ɛ känɛ jɛ ni yieer a wä ni kiir.

²⁶ Kä bɛ ɣä cɔl wëë i̱, ‘Ɛ ji̱n gua̱a̱r, kä Kuothdä, kä Päm känädä.’

²⁷ Ɣän bä jɛ cu jak kä kɛ̱̈ɛ̱̈, kä bi di̱t ni jɛn kä kua̱r wec muɔ̱ɔ̱n.

²⁸ Kä bä nhökdä min thil pek tit, kɛ kui̱dɛ amäni cäŋ kɛl, kä bi mat ruacdä tekɛ jɛ thilɛ mi bi jɛ wany.

²⁹ Kä bä kuaykɛ jak kä te wan ɔ amäni cäŋ kɛl, kä bi kuäärɛ te thi̱n ce̱tnikɛ pua̱a̱r.

³⁰ Kä mi wä gaatkɛ ŋuɔ̱tkä wä pa̱l ruëëc, ɛ /ca bi guɔ̱ɔ̱r ni luëëkä,

³¹ mi ca ciɛŋkä päl, kä /ci kɛn luëëkä tit.

³² Ɣän bä kɛ duäc kɛ kɛɛt kɛ kui̱ dueerikiɛn, kä bä duäc kɛ waat kɛ kui̱ jiäkiɛn.

³³ Duundɛ ɣöö /cä nhökdä bi woc kä kɛ, kä /cä ŋa̱thdä bi päl.

³⁴ Kä ɣän /cä mat ruacdä bi päl, kiɛ bä ri̱et in cä lar päl.

³⁵ Ɣän cä rɔ yac nikɛ ciötdä min rɛl rɔ, ɣän /cä Dee-bid bi ka̱c kac.

³⁶ Bi kuaykɛ te thi̱n amäni cäŋ kɛl, kä bi kuäärɛ te wa̱nɛ ce̱tnikɛ cäŋ nhiamdä.

³⁷ Bɛ te thi̱n ala do̱raar ce̱tnikɛ pay, ɛn neen puɔ̱ɔ̱rä min thuɔ̱k.”

³⁸ Kä täämɛ ci kuäär in ci kuany lo̱k kä ci jɛ yiäk, kä ci gaak kɛ jɛ ɛn ram in ci mɛk.

³⁹ Kä ci mat ruac jay kɛ ja̱ŋdu, kä ci kum kuäärädɛ yuɔr ni rɛy tupä.

⁴⁰ Kä ci pa̱nynikɛ diaal däk, kä ci wi̱i̱kɛ tin buɔ̱m buɔ̱ɔ̱m riɔ̱r.

⁴¹ Kä nɛy diaal tin ret kɛ kutdɛ la mackɛ jɛ, kä cɛ cua̱ cäät kä ji̱ thieekädɛ.

⁴² Kä ci ji̱ tɛ̈rɛ moc kɛ buɔ̱m, ci ji̱ gaakdɛ diaal jak kä tɛth lo̱ckiɛn.

⁴³ Ci mutdɛ cu jak kä thil luɔt, kä /keni jɛ luäk ko̱o̱r.

⁴⁴ Kä ci kɛɛt kuäärä woc tetkädɛ, kä ci kɔm kuäärädɛ yuɔr piny.

⁴⁵ Kä ci ni̱n ŋuɛɛtädɛ jak kä ciɛk, kä ci jɛ kum kɛ pöc.

⁴⁶ Ɛ biku mäni nɛy lö Kuoth Nhial, bi rɔ tɛ̱̈ɛ̱̈ amäni cäŋ kɛl ɔ? Kä bi mäni nɛy bi ŋɛ̈ɛ̈nydu dɔap ce̱tkɛ mac ɔ?

⁴⁷ Kä timɛ lö Kuoth Nhial, ɛn ɣöö ciɛk tëkdä, ŋäcni jɛ ɛn ɣöö ci nɛy diaal cak ɛla naath!

⁴⁸ Tëë kɛ ram mi dëë tëk a /cɛ bi li̱w? Kä ɛŋa dëë tëkdɛ gaŋɔ kä buɔ̱m li̱eth?

⁴⁹ Kuäär, kä nhökdu mëë wal ëë thil pek, mëë ci la̱r Dee-bid kɛ gɔɔydu a nikä?

⁵⁰ Carɛ Kuäär ɛn ɣöö ca ja̱ŋdu dɔl, ɣän ruɔ̱ɔ̱tdä kuethni dööri kɛ lɔcdä,

⁵¹ kuethni tin kuëthkɛ ni ɣä ɛ ji̱ tɛ̈ru lö Kuoth Nhial, tin dɔalkɛ lät randu diaal in ci mɛk.

⁵² Ɛ liak wä kä Kuoth Nhial amäni cäŋ kɛl! Inɔnɔ.