Diit 88 - RUAC KUƆTH IN RƐL RƆ

Wiee kɛ kui̱ lua̱k

(Dit ji̱ kɔaar Kora)

¹ Aɣ Kuoth Nhial ɛ ji̱n Kuoth känädä, ɣän bä cɔl ni ji̱ kɛ cäŋdäär kɛnɛ wäär.

² Ku palä mal ni liŋ, kä gäŋ ji̱thku kɛ wieedä.

³ Kɛ ɣöö ci tieeydä thiäŋ kɛ rik, kä ci tëkdä thia̱k nikɛ kɔ̱a̱k.

⁴ Ɣän ca ɣä kuɛn kɛɛl nikɛ nɛy tin bi wä kɔ̱k, ɣän cä cu ce̱tnikɛ ram mi thil luääk.

⁵ Ca ɣä päl ce̱tnikɛ ram mi ci li̱w, ce̱tnikɛ ram mi ca näk mi ca tɔa̱a̱c rɛy kɔ̱kä, cä ce̱tnikɛ nɛy ti ca pa̱l ruëëc, nɛy tin /ci lɛ yop.

⁶ Ci ɣä cu la̱th ni rɛy kɔ̱a̱k kunyä mi lue̱ŋ lue̱ŋ, ci ɣä la̱th ni guäth mi lue̱ŋ kä col.

⁷ Ci ŋɛ̈ɛ̈nydu thiak ɛlɔ̱ŋ kɛ ɣä, kä ci muaŋdu ɣä kum ɛ dur.

⁸ Ci ɣä jakä ba̱nykɛ piny ɛ mäthnikä, ci ɣä cu jak kä mi lökɛ ɛ kɛn. Ca ɣä cu ga̱k rɛc guäth mi /cä rɔ dëë met kual thi̱n,

⁹ Ci nyinkä lɛ nën kɛ kui̱ pärä. Kä ɣän la cɔalä ni ji̱ lö Kuoth Nhial ni ciaŋ, ɣän tarä tetkä nhial palä ji̱.

¹⁰ Ji̱n la nyuthi nɛy tin ci li̱w ti ga̱ykɛ naath? Kä dëë nɛy ti ci li̱w ji̱ puany?

¹¹ Ɛ dëë nhökdu min thil pek, ku lat rɛy kɔ̱a̱kni kunyä, kiɛ dëë ŋa̱thdu lat gua̱thni nɛɛni tin ci da̱k?

¹² Kä ba lätku tin ga̱ŋkɛ naath ku ŋa̱c rɛy muɔ̱th, kiɛ ba luäk känädu ŋa̱c muun nɛɛni tin ca pa̱l ruëëc?

¹³ Duundɛ ɣöö la thiëëcä ni ji̱ kɛ luak lö Kuoth Nhial, la palä ji̱ kɛ runwaŋ.

¹⁴ Kä ɛŋu mi yiäki ɣä lö Kuoth Nhial? Ɛŋu mɔ teyi rɔ mɔ kɛ ɣä?

¹⁵ Ɣän cä cuuc ɛlɔ̱ŋ ni ŋuɛɛtädä ɛ la thia̱k ni lia̱a̱dä, cä cuuc ɛlɔ̱ŋ kɛ duäcdu ɛ cä ŋɔa̱a̱ŋ.

¹⁶ Ci ŋɛ̈ɛ̈nydu ɣä nor, kä ci gakdu ɣä duɔ̱p ni piny.

¹⁷ La kɛn ɣä a go̱l piny kɛ cäŋ kɛɛliw ce̱tnikɛ nyɔc. Cikɛ ɣä go̱l kui̱ni diaal.

¹⁸ Ci ɣä jak kä ba̱nykɛ piny ɛ nhöökä kɛnɛ mäthnikä, muth cɛ cua̱ jɛn määthdä min thia̱k kɛ ɣä.