Diit 86 - RUAC KUƆTH IN RƐL RƆ

Wiee kɛ kui̱ luäkä

(Pal Dee-bid)

¹ Liŋä lö Kuoth Nhial, kä loc ɣä, kɛ ɣöö ɛ ɣän can mi go̱o̱r ni duɔ̱ɔ̱r.

² Gaŋ tëkdä, kɛ ɣöö ŋa̱a̱thä ni ji̱, kän ja̱ŋdu min ŋääth ni ji̱. Ɛ ji̱n Kuothdä,

³ teni kɛ kɔ̱a̱c lɔaac kɛ ɣä lö Kuäär, kɛ ɣöö cɔalä ni ji̱ kɛ cäŋ kɛɛliw.

⁴ Jakni lɔc jäŋädu kä tɛth, kɛ ɣöö cä tëkdä ka̱m ji̱ lö Kuäär.

⁵ Kɛ ɣöö ɛ ji̱n ram mi gɔaa kä tekɛ pälikä, moc nɛy tin cɔalkɛ ji̱ kɛ nhökdu min thil pek.

⁶ Liŋ palä lö Kuoth Nhial, liŋ wieedä min la̱ŋä ni ji̱.

⁷ Kä bä cɔl ni ji̱ kɛ cäŋ rikädä, kɛ ɣöö la loci ɣä.

⁸ Kä thilɛ ram mi päär kɛ ji̱ rɛy kuthni lö Kuäär, kä thilɛ lät ti päär kɛ lätku.

⁹ Kä bi döör diaal tin ci cak ben pal nhiamdu lö Kuäär, kä bikɛ ciötdu puany.

¹⁰ Ɛ ji̱n Kuoth mi bum mi lät ti ga̱ŋkɛ naath, ɛ ji̱n ni kärɔa la Kuoth ɔ.

¹¹ Nyuthni ɣä duɔ̱ɔ̱pdu lö Kuoth Nhial, kɛ ɣöö bä ja̱l rɛy thukädu, amäni mi cä ciötdu luɔ̱th.

¹² Ɣän la̱rä ji̱ tɛ̈th lɔaac lö Kuäärä ni Kuoth kɛ lɔcdä kɛɛliw, bä ciötdu liak amäni cäŋ kɛl.

¹³ Kɛ ɣöö di̱t nhökdu min thil pek kɛ ɣä, curi tëkdä kän li̱th.

¹⁴ Kä lö Kuoth ci nɛy ti jiäk rɔ̱ luɔ̱c ɣä, nɛy ti thil pälikä görkɛ näkdä, nɛy ti thil ca̱r kɛ kui̱du.

¹⁵ Duundɛ ɣöö ɛ ji̱n Kuoth mi gɔaa kä tekɛ pälikä, Kuoth mi kuiy gakdɛ kä tekɛ nhök mi di̱i̱t mi thil pek kɛnɛ ŋa̱th.

¹⁶ Lunyni kä ɣä, kä teni kɛ kɔ̱a̱c lɔaac kɛ ɣä, kämni buɔ̱mdu ja̱ŋdu, kän gat nya läätädu.

¹⁷ Mocä kɛ nyuuth gɔɔyädu, mi ba nɛn ɛ nɛy tin lökɛ ɣä bikɛ cu pöc, kɛ ɣöö ci ɣä luäk lö Kuoth Nhial, kä ci ɣä bum.