Diit 84 - RUAC KUƆTH IN RƐL RƆ

Pal tɛthä lɔaac rɛy luaak Kuɔth

(Dit gan Kora)

¹ Kua luaakdu lɛ nhɔk i̱di, lö Kuoth Nhial in la Ruey Ɣɔaa!

² Go̱o̱r lɔcdä wä rɛy kal Kuɔth, cu ti lɔcdä kɛnɛ ri̱ŋdä Kuoth in tëk go̱r.

³ Cu kɛ̈c rɔ̱ jëk ciëŋ, kä cu li̱k li̱k rɔ lät kä duel, gua̱a̱th mi bɛ dɛykɛ la di̱eethɛ thi̱n, gua̱a̱th mi thieek kɛ yi̱kdu, lö Kuoth Nhial in la Ruey Ɣɔaa lö Kuäärä kä Kuothdä.

⁴ Puɔ̱th akɛ nɛy tin cieŋ dhɔru, kä puanykɛ ji̱ ni ciaŋ!

⁵ Puɔ̱th akɛ nɛy tin te buɔ̱mdiɛn kɛ ji̱, nɛy tin go̱o̱r lɔcdiɛn ni duɔ̱ɔ̱p Dha-yɔn.

⁶ Kä min wäkɛ kɛ lo̱o̱l Baca cukɛ jɛ jak kä ce̱tkɛ waŋ pi̱i̱ni, mi ci nhiaal ruëël jɛ thiäŋ kɛnɛ wuɔ̱li pi̱i̱ni.

⁷ Wä nikɛn kɛ buɔ̱m min wä kɛ, amäni mi cikɛ cop nhiam Kuɔth kä Dha-yɔn.

⁸ Kä lö Kuoth Nhial ni Kuoth in la Ruey Ɣɔaa liŋ palä, liŋ ɣä lö Kuoth Je-kɔb!

⁹ Guic ko̱tda lö Kuoth, guic raandu min ci mɛk agɔaa!

¹⁰ Gɔaa ni ɣöö dëë raan cäŋ kɛl thuk rɛy kalu, kä ɣöö dëë raan ni̱n ti bathdɔɔr thuk guäth mi dɔ̱ŋ. Dëë gɔaa ni ɣöö dëë ɣän a gääŋ thuɔk kal Kuɔthdä, kä ɣöö dëë cieŋ rɛy kɛmɛkä gua̱n nyuɔɔni.

¹¹ Kɛ ɣöö Kuoth Nhial ni Kuoth ce̱tdɛ kɛ cäŋ kɛnɛ ko̱t, jɛn la ŋunɛ gɔɔy kɛnɛ luth. Thilɛ mi gɔaa mi la Kuoth Nhial jɛ a pen nɛy tin thil bɛ̈ɛ̈l.

¹² Aɣ Kuoth Nhial in leny buɔ̱mdɛ ti diaal, poth ram in ŋääth ni ji̱!