Diit 81 - RUAC KUƆTH IN RƐL RƆ

Dit kɛ kui̱ ti̱mä

(Dit A-thap)

¹ Këtdɛ Kuoth in la buɔ̱mdan dit, puanyɛ Kuoth Je-kɔb kɛ tɛ̈th lɔaac!

² Kɛ̈tdɛ dit kɛ jɔw thuɔɔm, pua̱tdɛ thuɔmni kɛnɛ buɔ̱l.

³ Kuɔth ɛ kaaŋ kɛ tëth path, kɛnɛ bo̱o̱r kɛ cäŋ ti̱mädan.

⁴ Kɛ ɣöö ɛ ŋut kɛ kui̱ ji̱ I-thɛ-rɛl, ɛ ciaŋ ji̱ Kuɔth Je-kɔb.

⁵ Cuɛ jɛ lat ala ŋut kɛ Jo-thɛp, mëë cɛ gaak kɛ ji̱ I-jëp. Cua̱ jɔw mi /ka̱n ŋa̱c liŋ wëë i̱,

⁶ “Kä nɛ̈nɛ jɛ cä rik woc kä ji̱, cä ji̱ lony rɛy lätni ti bɛ̈c bɛ̈ɛ̈c.

⁷ Kä curi ɣä cɔl kɛ riɛkdu, kä cua̱ ji̱ kän, kä cua̱ ji̱ loc rɛy pua̱a̱ri ti ma̱a̱r, kä cua̱ ji̱ ɣɔ̱n guäth pi̱i̱ni Mɛ-ri-baa.

⁸ Liɛŋɛ jɛ lö nɛɛkä, ɣän bä yɛ luek! Mi dëë yɛn ɣä liŋ lö ji̱ I-thɛ-rɛl!

⁹ Ɛ rɛydun /ci tekɛ kuoth mi dɔ̱ŋ, kä /cuarɛ kuoth mi dɔ̱ŋ pal.

¹⁰ Ɛ ɣän Kuoth Nhial Kuothdun, mëë no̱o̱ŋ yɛ raar ro̱o̱l I-jëp. Lɛpɛ thukun, bä yɛ mi̱eeth.

¹¹ “Duundɛ ɣöö /ken nɛɛkä ruacdä liŋ, ji̱ I-thɛ-rɛl /cikɛ ɣä luth.

¹² Kɛ kui̱ ɛmɔ cä kɛ pa̱l buɔ̱m wecdiɛn, akɛ kua guɔ̱ɔ̱r ni cärkiɛn.

¹³ Duŋ mi liŋ nɛɛkä ɣä, ɛ dëë I-thɛ-rɛl guɔ̱ɔ̱r ni dupkä,

¹⁴ dëë ji̱ tɛ̈riɛn jak kä kuaany niɛ täämɛ, dëë ji̱ tɛ̈riɛn luɔ̱c tɛr.

¹⁵ Nɛy tin lökɛ Kuoth Nhial bikɛ rɔ goŋ nhiamdɛ, kä bikɛ da̱k amäni cäŋ kɛl.

¹⁶ Bä yɛ mi̱eeth kɛ bɛl tin gɔw ni kɛn, kä bä yɛ ro̱ŋ kɛ tuaar piny.”