Diit 80 - RUAC KUƆTH IN RƐL RƆ

Pal kɛ kui̱ locä gɔɔyä I-thɛ-rɛl thi̱n

(Dit A-thap)

¹ Liŋkɔ lö yieen ji̱ I-thɛ-rɛl, ji̱n ram min buɔth Jo-thɛp ce̱tkɛ dɛl! Ji̱n ram in te kɔm kuäärädɛ wi̱i̱ pua̱nyni, ti ce̱tkɛ pua̱ny jaakni, nyuthni di̱tdu,

² ji̱ Ɛ-pa-rim kɛnɛ Ben-ya-min kɛ Ma-na-thɛ. A buɔ̱mdu jɔc, bër bɛ luäk nɛy!

³ Luucnikɔ jɔk lö Kuoth in la Ruey Ɣɔaa, nyuthnikɔ gɔɔydu, dɔ̱ŋ bakɔ kään.

⁴ Kä lö Kuoth Nhial ni Kuoth in la Ruey Ɣɔaa, bɛ ku amäni nɛy bi ŋɛ̈ɛ̈nyɔ kɛ pal nɛɛniku?

⁵ Ci mi̱eeth ni nɛɛku kɛ mi̱eth wi̱i̱kä, kä ci ma̱a̱thnikɛ kɛ mer jiɛthä lɔaac.

⁶ Ci nɛy cu jakä dɔalkɛ ɛ ji̱ thieekäda, kä lɛ̈ŋkɛ kɔ ɛ ji̱ tɛ̈ra.

⁷ Luucnikɔ jɔk lö Kuoth in la Ruey Ɣɔaa, nyuthnikɔ gɔɔydu, dɔ̱ŋ bakɔ kään.

⁸ Ji̱n curi dɔ jiaath ka̱n muun I-jëp, kä curi döör tuɔ̱k raar thi̱n kä curi jɛ cu pith.

⁹ Curi mundɛ pur, kä cuɛ ciökɛ yiath piny kä cuɛ mun thiäŋ.

¹⁰ Cu ti̱eepdɛ wä kum ni wuɔ̱th päämni, cuɛ kɛ wä kum amäni jiɛn luɔ̱ɔ̱ri tin di̱t amäni karkiɛn,

¹¹ kä cu karkɛ räth ni yie̱e̱r, kä cu ciökɛ pith ni Kiir Yu-pɛ-ree-tidh.

¹² Kuɛ la ŋu mɔ curi pänydɛ to̱l kä piny ɔ, puɔnkɛ dɛykɛ ɛ nɛy diaal tin ret kɛ duɔ̱ɔ̱p?

¹³ Jɛn ku kuɔ̱ɔ̱n dɔaar ɛ dɔny kä piny ɔ, kä ku ley dɔaar diaal ɛ cam.

¹⁴ Lunyni kä kɔ lö Kuoth in la Ruey Ɣɔaa, liecni ni nhial, kä bër nɛnɛ, titdɛ ɛn jiath ɛmɛ,

¹⁵ min ci pith nikɛ tet cuëëcdu, jɛn kaar in ci röm rɔ.

¹⁶ Cikɛ jɛ jɔap piny, kä ca jɛ waŋ kɛ mac, cikɛ mal lɛ thuuk kɛ kui̱ ŋɛɛnyädu kɛ kɛ.

¹⁷ Kämni luäkdu ram min te cueecdu, ɛn ram in bum min ci mëk rɔ.

¹⁸ Inɔ cakɔ bilɛ loc jɔk kɔɔru, kämnikɔ tëk kɛ ɣöö bakɔ ji̱ pal nikɛ ciötdu.

¹⁹ Luucnikɔ jɔk lö Kuoth in la Ruey Ɣɔaa, nyuthnikɔ gɔɔydu, dɔ̱ŋ bakɔ kään.