Diit 78 - RUAC KUƆTH IN RƐL RƆ

Ŋa̱th Kuɔth kɛ I-thɛ-rɛl mi thil ŋa̱th

(Dit A-thap)

¹ Liɛŋɛ ŋi̱i̱cdä lö nɛɛkä, pa̱lɛ ji̱thkun piny kɛ ruacdä!

² Ɣän latdä ruac cäätdä, bä rieet ti kui̱c yɛn kɛ kä te thi̱n ni wal lat,

³ rieet ti canɛ liŋ kä ŋa̱cnɛ, ti ca la̱tkɔn ɛ gua̱nikɔn.

⁴ /Canɛ kɛ bi teey kä gaatkiɛn, banɛ kɛ la̱t ri̱c tɔ̱ bi ben tɔ̱, kɛn lät Kuɔth tin gɔw kɛnɛ buɔ̱mdɛ, kɛ lätkɛ tin ga̱ŋkɛ naath.

⁵ Cuɛ luëëk la̱t ji̱ Je-kɔb, kä cuɛ ŋuɔ̱t la̱t ji̱ I-thɛ-rɛl, tëë cɛ la̱r gua̱nikɔn kɛ ɣöö bakɛ ŋi̱i̱cni gaatkiɛn.

⁶ Kɛ ɣöö bi ri̱c tin bi ben kɛ ŋa̱c, kɛn gaat tin ŋot ɛ /ka̱n ni dap, kä bikɛ kɛ lɛ la̱t gaatkiɛn.

⁷ Inɔ bikɛ ŋa̱thdiɛn la̱th kä Kuoth, kä /ca lät Kuɔth bi lɛ pa̱l ruëëc, kä ba cu tit ni luëëkɛ.

⁸ Kä /cikɛ bi ce̱tkɛ gua̱ni, ri̱c ëë bum wi̱cdiɛn kä ji̱ nyuɔɔni, ɛn ri̱c in /ci lɔcdiɛn cuŋ, kɛn nɛy tin /ci yiëëdiɛn ŋäth ni Kuoth.

⁹ Kä ji̱ Ɛ-pa-rim cikɛ rɔ̱ moc bääri, kä la barkɛ rɔ̱ kɛ cäŋ köör.

¹⁰ Kä /ci kɛn mat ruac Kuɔth tit, kä /ca guur ni ŋuɔ̱tkɛ.

¹¹ Kä cikɛ lätkɛ pa̱l ruëëc, kɛnɛ lät tin ga̱ykɛ naath tin cɛ la̱t.

¹² Cɛ ti ga̱ykɛ naath la̱t nhiam gua̱ni, rɛy rööl I-jëp kɛnɛ mun Dho-an.

¹³ Kä cuɛ bar da̱a̱k ni däär, kä cuɛ kɛ jak kä wä kɛ rɛydɛ, kä cuɛ pi̱w kek ce̱tnikɛ kek.

¹⁴ Kɛ cäŋdäär la kɛ a bo̱o̱thɛ kɛ pua̱r, kä kɛ wäär la bo̱o̱thɛ kɛ kɛ mac.

¹⁵ Kä cuɛ pääm wuth rɛy dɔaar, kä cuɛ kɛ moc pi̱w ti ŋuan ti ce̱tnikɛ pi̱w yiëër.

¹⁶ Kä cuɛ kɛ moc kɛ pi̱w rɛy pa̱a̱m, cuɛ pi̱w jak kä lo̱ny ce̱tnikɛ pi̱ kiɛri.

¹⁷ Kä cukɛ ŋot kɛ mi lät kɛnɛ kä duer, cukɛ rɔ̱ luɔ̱c Kuoth Nhial in Di̱t ni Jɛn rɛy dɔaar.

¹⁸ Kä cukɛ Kuoth ɣɔ̱n nikɛ lo̱ckiɛn kɛ thiecdiɛn kɛ mi̱eth in görkɛ.

¹⁹ Kä cukɛ Kuoth lat jɔ̱ɔ̱r wäkɛ i̱, “Dëë Kuoth mi̱eth ku ŋun rɛy dɔaar?

²⁰ Kä mëë cɛ päm yɔ̱t cu pi̱w ben raar, kä cu löli tööl kɛ pi̱w. Kä jɛn derɛ juray ŋun, kiɛ derɛ nɛɛkɛ moc kɛ ri̱ŋ?”

²¹ Kɛ kui̱c ɛmɔ mëë ci Kuoth Nhial ɛ liŋ, cuɛ gaak ɛlɔ̱ŋ, cuɛ mac jäk kä Je-kɔb, kä cu kɛ̈cdɛ ben kä I-thɛ-rɛl,

²² kɛ ɣöö thilɛ kɛ ŋa̱th kɛ Kuoth, kä /ca buɔ̱m känädɛ ŋäth.

²³ Kä ŋotdɛ ruacɛ kɛ pua̱a̱r nhial, kä cuɛ thiekni nhial lɛp.

²⁴ Kä cuɛ kɛ wuɔ̱c mana mi ba cam ce̱tnikɛ nhiaal, kä cuɛ kɛ moc bɛl puɔ̱rä.

²⁵ Cu naath mi̱th kɛ mi̱th jaakni Kuɔth, cuɛ kɛ jäk kä mi̱th ti ŋuan.

²⁶ Kä cuɛ jiɔam kuec känyä ca̱ŋ jak kä put puɔ̱rä, kä kɛ buɔ̱mdɛ cuɛ jiɔam kuec cuëëc jak kä put,

²⁷ cuɛ kɛ wuɔ̱c ri̱ŋ ti ŋuan ti ce̱tnikɛ tup, kɛnɛ diit juäät ti ŋuan ti ce̱tnikɛ liɛt thuɔk yiëër.

²⁸ Cu Kuoth kɛ jak kä pɛn rɛy wecdiɛn, kui̱ni diaal guäth in ciɛŋ kɛn ɛ.

²⁹ Cukɛ mi̱th a bikɛ ria̱ŋ, kɛ ɣöö ci Kuoth kɛ ka̱m mëë ca go̱r.

³⁰ Duundɛ ɣöö mëë ŋotkɛ ɛ /ka̱n mëë ca go̱r ɛ kɛn ni päl, ni mëë ŋot mi̱eth ni thokdiɛn,

³¹ cu kɛ̈c Kuɔth ben kä kɛ, cuɛ nɛy tin bumnikɛn rɛydiɛn näk, kɛn ŋuɛ̈tni I-thɛ-rɛl.

³² Kä niɛ rɛy kä ti̱ti̱ ŋotkɛ kɛ mi lät kɛn dueer, niɛ lätkɛ tin ga̱ykɛ naath, /ca kɛ ŋäth.

³³ Kɛ kui̱c ɛmɔ cɛ ni̱nkiɛn jak kä thuk ɛ yut ce̱tnikɛ yiëë mi ca ŋɔk, kä cikɛ runkiɛn thuk rɛy däkä.

³⁴ Kä mɔ ci Kuoth kɛ näk ɔ, la kɛn jɛ cua̱ go̱o̱r, la kɛn dueerkiɛn a päl, bikɛ Kuoth go̱r nikɛ lɔcdiɛn kɛɛliw.

³⁵ La kɛn jɛ cua̱ tiim ɛn ɣöö Kuoth ɛ ko̱tdiɛn, ɛn Kuoth Nhial in Dit ni Jɛn ɛ luääkdiɛn.

³⁶ Duundɛ ɣöö la kɛn a pɛl ni jɛ kɛ thukiɛn, kä lät kɛn ni jɛ kac kɛ lëëpkiɛn.

³⁷ /Ci kɛnɛ nhɔk kɛ lo̱ckiɛn, kä /ca ŋäth ni mat ruacdɛ.

³⁸ Kä ŋotdɛ tëë kɛ päl lɔaac piny, kä pälɛ kɛ dueerkiɛn, kä jɛn /cɛ kɛ däk, la gakdɛ a pälɛ gua̱thni ti ŋuan, kä /ca kɛ̈cɛ ɛlɔ̱ŋ.

³⁹ La jɛ a caarɛ ɛn ɣöö kɛ naath, ce̱tkɛ kɛ jiɔam in la lɔkɛ kä /ci luny jɔk.

⁴⁰ Cikɛ rɔ̱ kulɛ luɔ̱c jɛ nikä di rɛy dɔaar, kä cikɛ lɔcdɛ jak kä jiɛth däär paan!

⁴¹ La kɛn jɛ a ɣɔ̱n kä ca ɣɔ̱n, la kɛn Kuoth I-thɛ-rɛl a jak kä ŋɛ̈ɛ̈ny.

⁴² Kä /ci kɛn buɔ̱mdɛ car kɛ wuɔ̱thkiɛn, kiɛ cäŋ ëë käänɛ nikɛ kä gua̱n tɛ̈r.

⁴³ Cäŋ ëë nyoothɛ ni lätkɛ tin ga̱ykɛ naath kä I-jëp, mëë lätdɛ ti ga̱ykɛ naath ro̱o̱l Dho-an.

⁴⁴ Cuɛ yiër ji̱ I-jëp pi̱kiɛn locni riɛm, kɛ ɣöö /cikɛ pi̱kiɛn bi maath.

⁴⁵ Kä cuɛ rɛydiɛn jäk kä luaŋ mi di̱i̱t mi cukɛ cam, kä cuɛ kɛ jäk kä guëëk ti cukɛ däk.

⁴⁶ Kä cuɛ dɛy walkiɛn jäk kä kɔ̱m, kä cuɛ bɛlkiɛn luɔ̱ny kɔryɔm.

⁴⁷ Kä cuɛ ka̱a̱k walkiɛn däk kɛ nhiaal guiiyni, kä cuɛ jiɛn ŋɔa̱a̱pdiɛn näk kɛ but.

⁴⁸ Kä cuɛ ɣɔ̱ɔ̱kiɛn jak kä na̱kɛ ɛ nhiaal guiiyni, kä cua detkiɛn näk ɛ ma̱a̱r nhial.

⁴⁹ Kä cuɛ ŋɛ̈ɛ̈nydɛ luɔny rɛydiɛn, gak däkädɛ min di̱i̱t, kä cuɛ kɛ jäk kä ja̱a̱k ti bikɛ däk.

⁵⁰ Cɛ duɔ̱ɔ̱p rialikä kɛ kui̱ gaakdɛ, kä /kenɛ kɛ gaŋ kä lia̱a̱, cuɛ kɛ pa̱l ɣöö bi juey kɛ näk.

⁵¹ Cuɛ key diaal näk kä I-jëp, kɛn key nath diaal cuɛ kɛ näk rɛy ti̱ecni Ɣɛ̈m.

⁵² Kä cuɛ nɛɛkɛ bo̱th ce̱tnikɛ det ti rɔɔm, cuɛ kɛ bo̱th ce̱tnikɛ det rɛy dɔaar.

⁵³ Cuɛ kɛ bo̱th kɛ mak, kɛ ɣöö cikɛ bi dual, duundɛ ɣöö cu bar ji̱ tɛ̈riɛn muɔy.

⁵⁴ Kä cuɛ nɛɛkɛ nööŋ muundɛ min rɛl rɔ, cuɛ kɛ naŋ wi̱i̱ni päämni tëë cɛ ka̱n.

⁵⁵ Kä cuɛ döör juɔc raar nhiamdiɛn, kä cuɛ ka̱mkɛ ala mundiɛn, kä cuɛ thok duëël ji̱ I-thɛ-rɛl ka̱m ti̱eckiɛn.

⁵⁶ Kä ŋotdɛ ɣɔ̱n kɛn Kuoth, kä cikɛ rɔ̱ luɔ̱c Kuoth Nhial in Di̱t ni Jɛn. Kä /ken kɛn luëëkɛ tit,

⁵⁷ duundɛ ɣöö cukɛ thil ŋa̱th, kä cukɛ lät a jiäk ce̱tnikɛ gua̱ni, ce̱tkɛ nikɛ bäär mi gɔ̱ŋgɔ̱ŋ mi /ci lot ni duɔ̱ɔ̱p.

⁵⁸ Cukɛ jakni Kuoth kä gak kɛ gua̱th palikiɛn, cikɛ jɛ jak kä tekɛ tiɛɛl kɛ kui̱ kuthni jiɛnkiɛn.

⁵⁹ Kä mëë ci Kuoth kɛ liŋ, cuɛ ŋɛ̈ɛ̈ny ɛlɔ̱ŋ, cuɛ I-thɛ-rɛl lo̱k kɛ lo̱k mi di̱i̱t.

⁶⁰ Cuɛ duelɛ min te kä Cilo päl, ɛn kɛmɛ mëë cieŋɛ thi̱n rɛy nath.

⁶¹ Kä cuɛ thanduk bumädɛ jak kä pɛ̈ckɛ, ɛn buɔ̱mdɛ cɛ jɛ jak kä naŋkɛ ɛ ji̱ tɛ̈r.

⁶² Cɛ nɛɛkɛ pa̱l ɣöö bakɛ näk kɛ mut, cuɛ gaak ɛlɔ̱ŋ kɛ nɛɛkɛ.

⁶³ Cu mac ŋuɛ̈tni wutnikiɛn pɛt, kä cu ŋuɛ̈tni nyieetkiɛn thil nɛy ti kuɛ̈nkɛ kɛ.

⁶⁴ Kä cua bööth palädiɛn näk kɛ mut, kä /ka̱n kɛ par ɛ mänkiɛn.

⁶⁵ Kä cu Kuäär ni Kuoth rɔ jiɛc ce̱tkɛ mi kerɛ ni̱n, cuɛ rɔ jiɛc ce̱tkɛ wut mi ci yɔ̱ŋ kɛ kɔaŋ.

⁶⁶ Kä cuɛ ji̱ tɛ̈rɛ dua̱c piny, kä cuɛ kɛ moc kɛ mi do̱raar.

⁶⁷ Kä cuɛ duel Je-kɔb lo̱k, kä /kenɛ thok duëël Ɛ-pa-rim mɛk.

⁶⁸ Duundɛ ɣöö cuɛ wä mɛk ni thok duëël Juda, jɛn Päm Dha-yɔn in nhɔkɛ.

⁶⁹ Cuɛ duelɛ la̱t ce̱tnikɛ päm mi bäär, ce̱tdɛ nikɛ piny in cɛ la̱t ala do̱raar.

⁷⁰ Cuɛ ja̱ŋdɛ ni Dee-bid mɛk, cuɛ jɛ ka̱n ni yien deet.

⁷¹ Cuɛ jɛ ka̱n ni yien deet cuɛ jɛ nööŋ, kä bɛ nɛɛkɛ ni ji̱ Je-kɔb ben yien, kɛn nɛɛkɛ ni ji̱ I-thɛ-rɛl.

⁷² Cu Dee-bid kɛ yien kɛ lɔc mi thil tiɛɛl, kä cuɛ kɛ bo̱th kɛ ŋäc mi ro̱ŋ.