Diit 77 - RUAC KUƆTH IN RƐL RƆ

Ti̱em lätni Kuɔth tin bum

(Dit A-thap)

¹ Ɣän cä Kuoth cɔl kɛ ɣöö bɛ ɣä luäk, cä Kuoth cɔl ɛlɔ̱ŋ kɛ ɣöö bɛ ɣä liŋ.

² Kɛ cäŋ rikädä cä Kuäär ni Kuoth go̱r, cä tetkä tar nhial kɛ wäär ɛ thil cuɔ̱c, kä cuɛ thil mi buum ti̱eydä.

³ Kä mɔ cä Kuoth car ɔ, la lɔcdä a jiɛth, mɔ cä wee tiɛɛmä jɛ mɔ, la dualä.

⁴ Kä curi ɣä jak kä ji̱n, cua̱ dual ɛ bä ruac kui̱c.

⁵ Kä cua̱ ni̱n tëë wal car, cua̱ wä tim ni run tëë ci wä ni wal.

⁶ Cua̱ diitkä tim kɛ wäär, cu lɔcdä ca̱r, kä cua̱ rɔ thiec i̱,

⁷ “Ɛ bi Kuäär ni Kuoth nɛy ku lo̱k amäni cäŋ kɛl, a /cɛ gɔɔydɛ bi lɛ nyɔk kɛ nyuɔ̱th?

⁸ Ɛ ci nhökdɛ min thil pek ku thuɔ̱k? Kä bɛ cua̱ jɛn guut ruaacnikɛ gua̱thni diaal?

⁹ Ɛ ci Kuoth kɔ̱a̱c lɔaacdɛ ku pa̱l ruëëc? Ɛ bi gakdɛ pälidɛ kä ku jak kä thil?”

¹⁰ Kä cua̱ wee i̱, “Min ŋɔ̱ɔ̱ŋä ɛlɔ̱ŋ, ɛ ɣöö Kuoth Nhial in Dit ni jɛn, ci buɔ̱mdɛ rɔ gɛr.”

¹¹ Ɣän bä lät Kuɔth Nhial tim, kɛ thuɔ̱k ɣän bä lätkɛ tëë wal tin ga̱ykɛ naath car.

¹² Kä bä lätkɛ diaal nyiath, kä bä lätku tin buɔ̱m buɔ̱ɔ̱m tim.

¹³ Kä dupku lö Kuoth rɛl gɔɔydiɛn rɔ, kä ɛ kuoth in mith päär kɛ Kuothda mɔ?

¹⁴ Ɛ ji̱n Kuoth in lät ti ga̱ykɛ naath, kä nyuth buɔ̱mdɛ naath.

¹⁵ Kä kɛ tetdu min bum curi nɛɛku kän, kɛn kuay Je-kɔb kɛnɛ Jo-thɛp.

¹⁶ Mëë ci pi̱w ji̱ nɛn lö Kuoth, mëë ci kɛn ji̱ nɛn, cukɛ dual, cuɛ kɛ lath amäni piny yiëri.

¹⁷ Cu pua̱a̱r nhiaal jak kä dɛm, kä cu nhial ma̱a̱r, kä cu bääriku biɛɛr kui̱ni diaal.

¹⁸ Cua ma̱a̱rku liŋ rɛy thuɔ̱ɔ̱l, kä cu biɛɛru ɣɔw mɛr ni kɛɛliw, kä cuɛ piny lath.

¹⁹ Kä duɔ̱ɔ̱pdu rɛɛtdɛ ni yier, dupku wäkɛ nikɛ rɛy pi̱i̱ni ti ŋuan, kä ŋotdɛ /ca gua̱th ciökniku nɛn.

²⁰ Kä ci nɛɛku bo̱th ce̱tnikɛ det kɛ tet Muthɛ kɛnɛ Ä-ron.