Diit 76 - RUAC KUƆTH IN RƐL RƆ

Kuoth I-thɛ-rɛl ɛ luuk wec muɔ̱ɔ̱n

(Dit tuarä A-thap)

¹ Ŋa̱ckɛ Kuoth kä Juda, kä di̱t kɛ̈k cio̱tädɛ kä I-thɛ-rɛl.

² Te dhɔrɛ ni kä Ca-lɛm, gua̱a̱th cieŋädɛ tëë kä Dha-yɔn.

³ Ɛn wi̱ni cuɛ bääri ji̱ tɛ̈r töl kɛnɛ köötni kɛ mutni kɛ yio̱w köör.

⁴ Bum ni ji̱n lö Kuoth. kä di̱t ni gɔɔy wutädu kä päm mi tekɛ ley ti ŋuan.

⁵ Kä wäth kööriɛn ca kuakiɛn diaal yiäk, kä cikɛ niɛɛn kɛ ni̱en li̱eth, kɛn wäth köör diaal /ca tetkiɛn luäŋ kɛ kap nhial.

⁶ Kä nikɛ ŋɛ̈ɛ̈nydu lö Kuoth Je-kɔb, cu jiöŋkööri kɛnɛ ji̱kiɛn li̱w.

⁷ Kä ɛ ji̱n kärɔa lö Kuoth luɔ̱thkɛ mɔ! Kä ɛŋa dëë cuɔ̱ŋ nhiamdu mɔ mi ci ŋɛ̈ɛ̈ny?

⁸ Kä la luk ɛ latdi ni puɔ̱ɔ̱rä, la piny cua̱ dual kä bɛ cu biɛt,

⁹ mɔ ci rɔ jiɛc ɔ, lö Kuoth kɛ luk, kɛ ɣöö bi nɛy tin ciaŋkɛ ɛ jiäk wi̱i̱ muɔ̱ɔ̱n kän.

¹⁰ Kɛ thuɔ̱k ŋɛ̈ɛ̈ny ji̱ tɛ̈ru reepɛ ni kɛ̈kdu, kä duɔth nɛɛni tin ci kään kä ŋɛ̈ɛ̈nydu bikɛ ce̱tnikɛ kum wecdu.

¹¹ Tho̱pni Kuoth Nhial ni Kuothdu min ci lar i̱ bi thöp jɛ, ɛ nɛy diaal tin thia̱k nöŋkɛ jɛ muc ɛn ram in luɔ̱thɛ,

¹² ɛ jɛn la yiey ruëëcni a ŋookɔ, kä luɔ̱thkɛ ni jɛ ɛ kua̱r wec muɔ̱ɔ̱n.