Diit 74 - RUAC KUƆTH IN RƐL RƆ

Pal kɛ kui̱ lua̱k kä gua̱n tɛ̈r wec

(Dit A-thap)

¹ Ɛŋu mi päl i̱ kɔ amäni cäŋ kɛl lö Kuoth? Kä ɛŋu mɔ ci gakdu ben kä detku mɔ ce̱tnikɛ tol ɔ?

² Car nɛɛku tëë ci kuëny rɔɔdu ni wal, nɛy tëë ci luɛl kɛ ɣöö bi kɛn ɛ ji̱ thuɔk duëëlu. Kä car Päm Dha-yɔn min la gua̱a̱th ëë ci kɔŋ cieŋ thi̱n.

³ Jälɛ bɛ ɛn gua̱a̱th ɛ ci da̱kɛ, gua̱n tɛ̈r cɛ ti diaal ya̱r rɛy luaak Kuɔth.

⁴ Ci ji̱ tɛ̈ru köök rɛy luaakdu min rɛl rɔ, ɛ cikɛ bɛ̈rikiɛn cuŋ thi̱n.

⁵ Kä ce̱tkɛ nikɛ nɛy ti waa jiɛn jɔp ruup kɛ jiöpnikiɛn.

⁶ Ɛ cikɛ jiɛn tin ca dööp thok luaak ŋuɔ̱k kɛ jiöpni kɛnɛ kɔcɔakni.

⁷ Ci kɛn luaakdu cu cua̱th kɛ mac, cikɛ gua̱a̱th cieŋädu ya̱r.

⁸ Kä ruackɛ kamnikiɛn wäkɛ i̱, “Ɛ puc bakɔ kɛ joc.” Cikɛ gua̱th pali Kuɔth diaal cu waŋ rɛy wec.

⁹ /Ci nɛy nyuuthnikɔ lɛ nɛn, kä cɛ cu thil go̱o̱k ti ci duɔth, kä cɛ cu thil ram mi ŋäcɛ kä kɔ, ɛn nɛmɛ bɛ mäni nɛy.

¹⁰ Kä bɛ kulɛ ɛ mäni nɛy lö Kuoth bi gua̱n tɛ̈r ji̱ dɔlɔ? Ɛ bi kɛn ji̱ ku kuëth amäni cäŋ kɛl?

¹¹ Kä ɛŋu ci la̱th ni tetdu luɔ̱ɔ̱c jɔkɔ, ɛŋu mɔ ci la̱th ni tetdu jɔkdu mɔ?

¹² Duundɛ ɣöö ji̱n Kuoth ɛ ji̱n Kuäärä ni walkä, lätdi ni lät känä rɛy ɣɔaa.

¹³ Curi yiër da̱a̱k kɛ buɔ̱mdu, kä curi ley yiëri tin dit wuɔ̱thkiɛn töl.

¹⁴ Kä ɛ ji̱n ɛ nëë riac wi̱c nyaaŋ, kä curi jɛ ka̱m naath tin cieŋ rɛy dɔaar ɛ la mi̱eth.

¹⁵ Kä ɛ ji̱n ɛ nëë lɛ liɛl kɛnɛ löli pi̱i̱ni, kä curi kiɛr diaal jakä do̱n.

¹⁶ Kä cäŋdäär ɛ duŋdu kä wäär bä ɛ duŋdu, kä curi cäŋ kɛnɛ pay cak.

¹⁷ Kä ji̱n curi pëk ɣɔaa diaal la̱t, kä ci tɔ̱t kɛnɛ mey la̱t.

¹⁸ Car mɛmɛ lö Kuoth Nhial ɛn ɣöö ji̱ tɛ̈ru dɔalkɛ ji̱, kɛn nɛy ti dɔa̱a̱r ɛ ti dɔalkɛ ciötdu.

¹⁹ /Cu tëk nɛɛniku käm ley dɔaar, kä /cu tëk canku päl ruëëc amäni cäŋ kɛl.

²⁰ Car mat ruac ëë ci lat kɛ kɔ, kɛ ɣöö ci nɛy tin görkɛ ko̱r gua̱th diaal tin col rɛy wec thiäŋ.

²¹ Kä ɛ ga̱yku /ca lɛ ciɛŋ kɛ ciaaŋ po̱cä, kä ɛ can kɛnɛ ga̱y liakɛ ciötdu.

²² Jiɛc rɔ lö Kuoth kä bër gaŋ rɔ, kä carɛ ɛn ɣöö ca dɔl ɛ nɛy ti dɔa̱a̱r kɛ cäŋ kɛɛliw.

²³ Kä /cu ŋɛ̈ɛ̈ny ji̱ tɛ̈ru bi pa̱l ruëëc, ɛn rɔal in te thi̱n ni ciaŋ.