Diit 73 - RUAC KUƆTH IN RƐL RƆ

Bok Diɔ̱k ( Diit 73—89 ) Thuɔ̱ɔ̱k Kuɔth

(Dit A-thap)

¹ Kɛ thuɔ̱k Kuoth gɔaaɛ kɛ ji̱ I-thɛ-rɛl, gɔaaɛ kɛ nɛy tin buɔy lo̱ckiɛn.

² Duundɛ ɣöö ɣän, ci ŋa̱thdä gul thil, ci ŋa̱thdä gul cak thuɔ̱k.

³ Cua̱ tekɛ tiɛɛl kɛ ji̱ liakä mëë cä nɛy ti ji̱ nyuɔɔni nɛn gɔw ŋɔakiɛn.

⁴ Kɛ ɣöö thilɛ kɛ riɛk mi bɛc, puɔl pua̱nykiɛn kä puɔthkɛ.

⁵ Thilɛ kɛ rik ce̱tkɛ nɛy tin kɔ̱ŋ, kä thilɛ kɛ mi bɛc ce̱tkɛ nɛy tin kɔ̱ŋ.

⁶ Kɛ kui̱c ɛmɔ läthkɛn liak ŋuääk ce̱tnikɛ tik, kä ciɛŋ kɛn ko̱r ce̱tnikɛ bi̱i̱.

⁷ Ci nyinkiɛn käny raar kɛ thiɔl, kä ci lo̱ckiɛn thia̱a̱ŋ kɛ dɔ̱ɔ̱r.

⁸ Dɔl kɛn ni naath kä lat kɛn ni ti jiäk, ni liakä lat kɛn ni ɣöö ba nɛy tin kɔ̱ŋ ciɛŋ a jiäk.

⁹ Lat ni ruac mi jiääk kɛ kui̱ Kuɔth, kä ci ruacdiɛn wi̱c muɔ̱ɔ̱n thiäŋ.

¹⁰ Kɛ kui̱c ɛmɔ cu nɛɛ Kuɔth guɔ̱ɔ̱r nikɛ, kä cu naath ŋäth ni min lat kɛn ɛ.

¹¹ Kä cukɛ wee i̱, “Kä bi Kuoth ɛ kulɛ ŋa̱c i̱di? Ɛn Kuoth in Di̱t ni Jɛn tëë kɛ ŋäc?”

¹² Kä nɛnɛ, nɛmɛ ɛ jɛn ta̱a̱ ji̱ nyuɔɔni, ni ciaŋ tekɛ malä, kä reep ria̱ŋdiɛn ni rɔ.

¹³ Ɣän cä lɔcdä jak kä gɔaa baaŋ, kä thilɛ mi jiääk mi cä la̱t.

¹⁴ Ɣän cä cuuc kɛ cäŋ kɛɛliw, kä la dua̱ckɛ ɣä kɛ runwaŋni diaal.

¹⁵ Kä mi cä wee i̱, “Bä ruac inɔ,” derɛ ce̱tkɛ ɣöö /ci ɣän te rɛy ganku.

¹⁶ Kä mëë cä ɣɔ̱n ɛn ɣöö bä kɛn ti̱ti̱ diaal ŋa̱c, cuɛ la la̱t mi cuuc ni ɣä baaŋ,

¹⁷ amäni mëë cä wä rɛy luaak Kuɔth, cua̱ gua̱th in bikɛ wä guut thi̱n ku lɛ ŋa̱c.

¹⁸ Kɛ thuɔ̱k bikɛ la̱th guäth mi tekɛ rik, kä bikɛ jak kä tëth ɛ bikɛ nuɔr.

¹⁹ Kä cukɛ cu duɔ̱p nikɛ gua̱a̱th mi tɔt, kä cuɛ cua̱ jɛn riawdiɛn inɔ!

²⁰ Cukɛ cu ce̱tnikɛ min la raan ɛ ker ni̱n kɛ läk, kä kɛ jiëcdu kɛ rɔ lö Kuäär, bikɛ cu riaw.

²¹ Kä mëë ci lɔcdä jiath, kä ci ca̱rä jiääk,

²² cua̱ la dɔ̱a̱r kä cua̱ ŋɔak kui̱c, cua̱ lät ce̱tkɛ ley kɛ ji̱.

²³ Kä cua̱ ŋot bä ta̱a̱ kɛɛl kɛ ji̱, kä curi tet cuëëcdä käp.

²⁴ Kä curi ɣä bo̱th kɛ ruacdu, kä kɛ kɔrɛ bi ɣä naŋ rɛy buɔyä.

²⁵ Kä ɛŋa mi tekɛ ɣä nhial ɛ /ci mua ji̱n? Kä thilɛ mi göörä wi̱i̱ muɔ̱ɔ̱n ɛ ni ji̱n.

²⁶ Dëë puɔ̱nydä kɛnɛ lɔcdä thil lua̱ŋ, duundɛ ɣöö Kuoth ɛ jɛn buɔ̱m lɔaacdä kä ɛ duŋdä mi do̱raar.

²⁷ Ɛ nɛy diaal tin nɔ̱a̱n kɛ ji̱ li̱w, kä däk nɛy diaal tin /ci gɔw kɛ ji̱.

²⁸ Duundɛ ɣöö kɛ ɣä gɔaaɛ ɛn ɣöö thie̱e̱kä kɛ Kuoth, kä cä Kuäär ni Kuoth jak kä gääŋdä, kä bä lätkɛ diaal lat.