Diit 72 - RUAC KUƆTH IN RƐL RƆPal kɛ kui̱ lua̱k Kua̱r (Dit kɛ kui̱ Thɔ-lo-mon) 1 Kämni kuäär lukdu min thuɔ̱k lö Kuoth, kämni cuŋku gat kua̱r. 2 Dɔ̱ŋ bɛ nɛɛku luk kɛ cuŋ, kä bɛ canku luk kɛ thuɔ̱ɔ̱k. 3 Ɛ ji̱ muɔ̱ɔ̱n diaal jëkɛ tin diaal tin görkɛ, kä akɛ cieŋ kɛ ciaaŋ cuŋni! 4 Ɛ kuäär gaŋ cuɔ̱ɔ̱ŋ nɛɛni tin can, kä a jɛ käm nɛy tin thil lua̱ŋ cuɔ̱ɔ̱ŋdiɛn, kä a jɛ duääc nɛy tin ciaŋkɛ naath ɛ jiäk! 5 Ɛ jɛ tëk min ŋot cäŋ kɛ lɛ̈p, kä ŋot pay kɛ buay, rɛy ri̱cni diaal! 6 A kuäär ce̱tnikɛ nhiaal mi ci juaac demikä, a jɛ ce̱tkɛ nyuɛ̈ɛ̈r ti ci piny wac! 7 Ɛ cuŋ te thi̱n kɛ ni̱n teekädɛ, kä ɛ mal te wa̱nɔ ce̱tnikɛ min /ŋot pay kɛ lɛ̈p. 8 Ɛ ruecdɛ jiɛy ni yieer a wä yieer, ɛ lɛnɛ jiɛɛn ni Kiir Yu-pɛ-ree-tidh amäni pek ɣɔaa. 9 Ɛ nɛy tin cieŋ rɛy dɔaar guɔŋkɛ rɔ̱ nhiamdɛ, kä bi ji̱ tɛ̈rɛ bil ni tur! 10 Ɛ kua̱r Tar-cic kɛnɛ ji̱ dhuɔ̱li nöŋkɛ jɛ tho̱lbo̱k, kä ɛ kua̱r Cɛba kɛnɛ Thɛba nöŋkɛ jɛ muc! 11 Ɛ kua̱r diaal guɔŋkɛ rɔ̱ nhiamdɛ, kä ɛ döör diaal la̱tkɛ jɛ ikä! 12 La luäkɛ nɛy tin thil lua̱ŋ mi ca cɔl, kɛnɛ nɛy tin can tin thilɛ ram mi luäkɛ. 13 Bɛ tekɛ nhök kɛ ram mi thil lua̱ŋ kɛnɛ can, kä bɛ ram in thil lua̱ŋ kän li̱th. 14 Bɛ tëkdiɛn kän kä nɛy tin ji̱ ciaŋ jiääkä kɛnɛ nɛy tin ji̱ köör, kɛ ɣöö tëkdiɛn gɔaaɛ waaŋdɛ. 15 Ɛ kuäär jäny kɛ tëk, a jɛ ka̱mkɛ da̱a̱p Cɛba! Ɛ naath pal kɛ kui̱dɛ ni ciaŋ, kä ɛ puɔ̱th tekɛ jɛ gua̱thni diaal! 16 Kä ɛ mun tekɛ bɛl ti ŋuan, kä ɛ pääm wuɔ̱thkiɛn thiäŋ kɛ bɛl, akɛ tekɛ dɛy ce̱tkɛ dɛy Lɛ-ba-nɔn, kä ɛ wi̱i̱ thiäŋ kɛ naath ce̱tkɛ kak mi ci thia̱a̱ŋ kɛ bɛl! 17 Ɛ ciöt kua̱r jɔc amäni cäŋ kɛl, ɛ kɛ̈kdɛ te thi̱n ce̱tkɛ cäŋ! Kä ba döör diaal poth kɛ kui̱dɛ, kä bikɛ jɛ cɔli mi ca poth. 18 Ɛ liak tekɛ Kuoth Nhial ni Kuoth I-thɛ-rɛl, min lät ti ga̱ykɛ naath ni kärɔa. 19 Ɛ liak tekɛ ciötdɛ min bum amäni cäŋ kɛl, kä ɛ buaydɛ thiäŋ wi̱c muɔ̱ɔ̱n kɛɛliw! Inɔnɔ inɔnɔ! 20 Nɛmɛ ɛ jɛn thuɔ̱k pali Dee-bid gat Jɛthi. |
Nuer Bible © Bible Society in South Sudan 1998,2012.
Bible Society in South Sudan