Diit 71 - RUAC KUƆTH IN RƐL RƆ

Pal wutdä mi di̱i̱t

¹ Ɣän cä tëkdä lua̱k ji̱ lö Kuoth Nhial, ɛ ɣän /ca lɛ moc kɛ pöc.

² Kɛ kui̱ cuŋniku kän ɣä kä luäk ɣä, gäŋni ji̱thdu ɣä kä kän ɣä.

³ Jakni rɔ kä päm ga̱ŋdä, mi dëë la wa̱a̱ thi̱n gua̱thni diaal, lat ɣöö bi ɣä kän, kɛ ɣöö ɛ ji̱n ko̱tdä kä gääŋdä.

⁴ Käm ni ɣä raar lö Kuothdä tetni ji̱ dueeri, kuekni ɣä raar tetni ji̱ tiilä kɛnɛ nɛy tin thil cuŋ kɛ ji̱ nyuɔɔni.

⁵ Kɛ ɣöö ɛ ji̱n ŋa̱thdä lö Kuoth, ɛ ji̱n ŋa̱thdä lö Kuoth Nhial ni ŋuɛɛtädä.

⁶ Ɣän cä rɔ thieŋ ji̱ ni mëë pay ɣä dap, kä ɛ ji̱n ɛ nëë mɛɛk ɣä jic maar. Ɣän bä liak ni ji̱ ni ciaŋ.

⁷ Ɣän cä la nyuuth kä nɛy ti ŋuan, duundɛ ɣöö ɛ ji̱n gääŋdä mi bum,

⁸ Ci thokdä thia̱ŋ kɛ liakdu, latdä wuɔ̱tdu kɛ cäŋ kɛɛliw.

⁹ /Cu ɣä yiäk mi wa̱a̱ wä dɔŋ, /cu ɣä päl mi wä buɔ̱mdä thuuk.

¹⁰ Kɛ ɣöö ruac ji̱ tɛ̈rä kɛ kui̱dä, kɛn nɛy tin görkɛ näkdä duɔlkɛ kɛ kui̱dä.

¹¹ Kä ruackɛ wäkɛ i̱, “Ci Kuoth ɛ päl, juɔcɛ jɛ kä ka̱pɛ jɛ, kɛ ɣöö thil ram mi bi jɛ luäk.”

¹² Cu lɛ na̱n kɛ ɣä lö Kuoth, bër ku ɣä ben luäk kɛ pɛ̈th lö Kuothdä!

¹³ Ɛ nɛy tin gɔanykɛ ɣä ba däk kɛ pöc, ɛ nɛy tin görkɛ muɔ̱cdä buɔ̱t kuɔ̱mkɛ ɛ pöc kɛnɛ buar.

¹⁴ Duundɛ ɣöö bi ŋa̱thdä te thi̱n ɛ wee wä, kä ŋotdɛ ɣän bä ji̱ puany ciaŋ ciaŋ.

¹⁵ Ɣän bä lät cuŋniku lat, ɣän bä lät känädu diaal lat kɛ cäŋ kɛɛliw, ni min leny pekdiɛn ŋäcdä.

¹⁶ Ɣän bä buɔ̱m lätni Kua̱r ni Kuoth Nhial liak, ɣän bä liak ni cuŋku, cuŋku ni ji̱n kärɔaadu.

¹⁷ Ji̱n ci ɣä ŋi̱eec ni ŋuɛɛtädä lö Kuoth, kä ɣän ŋuɔtdä lat ni lätku tin ga̱ykɛ naath.

¹⁸ Ɛ cäŋ mi wa̱a̱ dɔŋ ɛ ci mi̱emkä low, /cu ɣä päl ruëëc lö Kuoth. Amäni mi cä buɔ̱mdu lat rɛy ri̱cni diaal tɔ̱ bi ben tɔ̱.

¹⁹ Kä cuŋku kɛnɛ buɔ̱mdu cikɛ räth ni nhial puɔ̱ɔ̱rä lö Kuoth. Ji̱n ci ti ga̱ykɛ naath la̱t, Kä ɛŋa mi cäätkɛ ji̱ lö Kuoth?

²⁰ Cäŋ ni mɔ ci ɣä jak kä nɛ̈ɛ̈nä, rik ti ŋuan kɛnɛ ti bɛ̈c bɛ̈ɛ̈c ɔ, bi tëkdä nyɔk kɛ luuc, bi jɛ luɔ̱ɔ̱c jɔk ni piny muɔ̱ɔ̱n bi ɣä nyɔk kɛ loc teekä.

²¹ Ji̱n bi luthdä rep, kä bi ɣä nyɔk kɛ mi buumi ɣä.

²² Ɣän bä ji̱ puany nikɛ thom, kɛ kui̱ gɔɔyädu lö Kuothdä. Ɣän bä ji̱ kët diit liakä kɛ thom, lö Kuoth I-thɛ-rɛl.

²³ Ɣän bä ji̱ liak kɛ diit tɛthä lɔaac, mi wa̱a̱ ji̱ wä puany kɛ diit, kä bi tieeydä ji̱ puany bä, kɛ ɣöö ci jɛ luäk.

²⁴ Kä bi lɛpdä lat ni gɔɔy luäkädu kɛ cäŋ kɛɛliw, kɛ kui̱ nɛɛni tin görkɛ muɔ̱cdä buɔ̱t, cakɛ moc kɛ pöc kɛnɛ buar.