Diit 7 - RUAC KUƆTH IN RƐL RƆ

Pal kɛ kui̱ cuŋni

(Dit Dee-bid ëë ketdɛ Kuoth Nhial kɛ kui̱ Kuc mi la raan thuɔk duëël Ben-ya-min)

¹ Ɣän bä luäkdä jek nikä ji̱. Luäk ɣä kä nɛy diaal tin guɔ̱rkɛ ɣä, bër kän ɣä.

² Kiɛ bi kɛn ɣä rɛ̈t ce̱tnikɛ lony mi rɛt duɔ̱ɔ̱r, bikɛ ɣä yɔ̱a̱c raar guäth mi thil ram mi bi ɣä luäk thi̱n.

³ Mi cä mɛmɛ la̱t lö Kuoth Nhial ni Kuothdä, mi tëë kɛ mi jiääk mi cä la̱t,

⁴ mi cä mäthdä lät kä mi jiääk, mi cä gua̱n tɛ̈rä mac kɛ mi thil thar,

⁵ a gua̱n tɛ̈rä jooc ɣä, kä a jɛ däk ɣä a jɛ cot tëkdä ni piny, kä ɛ ti̱eydä wä ni muun.

⁶ Jiɛc rɔɔdu lö Kuoth Nhial, kä bër guic ŋɛ̈ɛ̈ny ji̱ tɛ̈rä ɛ ji̱n. Jiɛyni lö Kuothdä bër luäk ɣä, kɛ ɣöö la lätdi ni cuŋ.

⁷ A duɔl nath diaal bi ben nhiamdu, kä ku nyuur wi̱i̱ kɔam kuäärädu ni nhial.

⁸ Kuoth Nhial ɛ jɛn luk naath diaal ɔ, luk ɣä Kuoth Nhial ce̱tnikɛ cuŋkä, kä luk ɣä ce̱tnikɛ ta̱a̱ lɔaacdä.

⁹ Kä ɛ lät nyuɔɔni ji̱ dueeri ku thuuk, ku ji̱ cuŋni ka̱m cuŋkiɛn, kɛ ɣöö ɛ ji̱n ŋäc lo̱c kɛnɛ cär ɔ, lö Kuoth mi gua̱n cuŋni.

¹⁰ Ko̱tdä ɛ jɛn Kuoth, jɛn min kään ji̱ cuŋni.

¹¹ Kuoth ɛ jɛn luuk in thuɔ̱k, kä la kuɛɛthɛ ji̱ dueeri ni ciaŋ.

¹² Mi /ci kɛn rɔ̱ bi ri̱t dueerikiɛn, bi Kuoth mutdɛ thɛr, kä bɛ bäärikä diaal jakä moth ɛ moth.

¹³ Cɛ yio̱w köörɛ diaal rialikä, cɛ bäärikɛ tin bo̱l ce̱tnikɛ mac rialikä.

¹⁴ Kɛ ɣöö nɛ̈nɛ jɛ, ram mi jiääk la caarɛ ni duer, kä la cääpɛ ni rik, kä la latdɛ ni ka̱a̱cni.

¹⁵ Kä ram mi tɛt kɔ̱a̱k kɛ kui̱ nɛɛni kɔ̱kiɛn, bi pɛn ni jɛn kɔ̱kädɛ min cɛ tɛt.

¹⁶ Ci lät jiäknikɛ pɛn ni wi̱i̱dɛ, kä bi ŋɛ̈ɛ̈nydɛ jek ni jɛ.

¹⁷ Ɣän bä Kuoth la̱r tɛ̈th lɔaac, kɛ kui̱ gɔɔyädɛ, kä bä puany ni Kuoth Nhial in Di̱t ni Jɛn.