Diit 68 - RUAC KUƆTH IN RƐL RƆ

Liakɛ Kuoth in ci do̱r kän

(Dit tuarä Dee-bid)

¹ Ɛ Kuoth jiɛc rɔ, kä ɛ ji̱ tɛ̈rɛ riawkɛ dɔɔr, kä ɛ nɛy tin lökɛ jɛ kɛ bar rɔ̱ nhiamdɛ!

² Lɔkɛ ce̱tnikɛ min la tol ɛ lɔakɛ ɛ jiɔam, kä ɛ ji̱ nyuɔɔni li̱w nhiam Kuɔth, ce̱tnikɛ min la kɔl a lëër kɛ mac!

³ Duundɛ ɣöö ɛ lo̱c ji̱ cuŋni tɛth a lo̱ckiɛn tɛth nhiam Kuɔth, akɛ tekɛ gɔɔy lɔaac!

⁴ Puanyɛ Kuoth, puanyɛ ciötdɛ kɛ diit, rialɛ duɔ̱ɔ̱p mi di̱i̱t ikä kɛ kui̱dɛ ɛn ram in jäl rɛy pua̱a̱ri, jɛn min cɔalkɛ ciötdɛ Kuoth Nhial, ɛ lɔcdu tɛth nhiamdɛ!

⁵ Kuoth guäth cieŋädɛ mi rɛl gɔɔydɛ rɔ, ɛ gua̱n gatdä mi thil gua̱n kä ɛ gääŋ ciëk jɔkä.

⁶ Ci Kuoth ram mi thil gua̱a̱th cieŋä moc kɛ gua̱a̱th mi bɛ cieŋ thi̱n, cɛ ram mi te yieenä lony yieenä, duundɛ ɣöö bi nɛy tin jiäk cieŋ rɛy ca̱ŋ dɛɛkä.

⁷ Kä mëë ci wä nhiam nɛɛniku lö Kuoth mëë ci wä ja̱l rɛy dɔaar,

⁸ Cuɛ piny lath, kä cu pua̱a̱r dɛ̈m kɛ nhiaal nhiam Kuɔth, min la Kuoth Thi-nay, ni Kuoth I-thɛ-rɛl.

⁹ Ci nhiaal mi di̱i̱t ŋun lö Kuoth, ci mundu min ci cuuc luɔ̱c jɔk,

¹⁰ ci dëtku cieŋ jak kä thi̱n, kä kɛ gɔɔyädu lö Kuoth, curi can moc.

¹¹ Cu Kuoth ruac lat, kä cu ŋuan ni nɛy tin latkɛ jɛ.

¹² “Cu kua̱r kɛnɛ rɛmkiɛn rɔ̱ bar!” Kä cua tin ca pɛc da̱a̱k ciëëŋni ɛ män,

¹³ amäni nɛy tin tɔ̱ɔ̱c rɛy gɛ̈wni deet, tekɛ kɛ gɔ̱k guukä mi ca rɔth kɛ ciɛk in bo̱r, kä juätkɛ ɛ da̱a̱p in tɔ̱c.

¹⁴ Mëë wä Kuoth in leny buɔ̱mdɛ ti diaal kua̱r wä riaw kä dɔɔr, cuɛ ce̱tnikɛ pi̱w guiiyni ti ca rɔ̱ käp wi̱i̱ pa̱a̱m Dhal-mon.

¹⁵ Pääm Ba-can kɛ pääm ti di̱t, pääm Ba-can tekɛ kɛ bëër ti ŋuan!

¹⁶ Kä yɛn pääm tin ca rɔ̱ ber, ɛŋu guic yɛn päm in ci Kuoth ɛ mɛk kɛ ɣöö bɛ ruëc thi̱n ɔ ni nyi̱rä, gua̱a̱th in bi Kuoth Nhial cieŋ thi̱n amäni cäŋ kɛl ɔ?

¹⁷ Thurbiɛɛli Kuɔth kɛ bathdɔɔri ti kur kä bathdɔɔr, bathdɔɔri ni kä bathdɔɔri, Kuäär bëëkɛ kä Thi-nay wëë rɛy luaakdɛ min rɛl gɔɔydɛ rɔ.

¹⁸ Kä min wi̱i̱ nhial, curi pɛ̈ɛ̈c naŋ kɛ gatɔru, kä curi muc käp kä naath, amäni nɛy tin ca rɔ̱ luɔ̱c ji̱n Kuoth Nhial bikɛ cieŋ ɛn wi̱ni.

¹⁹ Liak akɛ Kuäär ni Kuoth, min la kɔn ɛ luäk ni ciaŋ, ɛn Kuoth ɛ jɛn la käändan ɔ.

²⁰ Ɛn Kuothda ɛ Kuoth känä, ɛn Kuäär ni Kuoth ɛ jɛn bä ka̱n li̱eth kä jɛ mɔ.

²¹ Bi Kuoth wuɔ̱th ji̱ tɛ̈rɛ riac, wuɔ̱th nɛɛni tin guɔ̱ɔ̱rkɛ ni lät dueerikiɛn.

²² Kä cu Kuäär ni Kuoth wee i̱, “Ɣän bä ji̱ tɛ̈run luɔ̱c jɔk kä Ba-can, ɣän bäkɛ luɔ̱ɔ̱c jɔk ni piny baar,

²³ kɛ ɣöö bia ciökun lak kɛ riɛm ji̱ tɛ̈run, kä bi jio̱o̱kun kui̱diɛn ben lap rɛy riɛmdiɛn.”

²⁴ Ca ja̱lu nɛn ɛ nɛy diaal lö Kuoth, wä Kuɔthdä ni Kuäärä rɛy luaak.

²⁵ Wäkɛ te këët din nhiam kä, te pua̱a̱t thuɔmni jɔk, kä te la̱a̱t nyieet däär dua̱ckɛ yikyikni.

²⁶ “Liakɛ Kuoth rɛy dolä min di̱i̱t, liakɛ Kuoth Nhial lö yɛn ji̱ I-thɛ-rɛl!”

²⁷ Kä cuakɛ bo̱th ɛ thok duëël in kuiyni jɛn, thok duëël Ben-ya-min, kä cuakɛ guɔ̱ɔ̱r ɛ bööth ji̱ Juda kɛ buɔ̱ndiɛn, kä cuakɛ guɔ̱ɔ̱r ɛ bööth ji̱ Dhɛ-bu-lun kɛnɛ bööth ji̱ Nap-ta-li.

²⁸ Lar buɔ̱mdu lö Kuoth, nyoth buɔ̱mdu lö Kuoth, ce̱tkɛ mëë ci kɔŋ la̱t kɛ kui̱da.

²⁹ Kɛ kui̱ luaakdu kä Jɛ-ru-tha-lɛm, bi kua̱r ji̱ nöŋ muc.

³⁰ Däk ley ɔ cieŋ rɛy gutdä mɔ, däk ɛn buɔ̱n thääkni mɔ te rɛy rueethni nath tɔ̱. Jak nikɛ kä kɔ̱c, ba ji̱ thöp ciɛk in bo̱r, riaw döör tin nhɔakɛ ko̱r.

³¹ Kä bi ja̱a̱k ben kä I-jëp, kä bi ji̱ Kuc Kuoth pal.

³² Këtdɛ Kuoth diit lö kua̱r ɣɔaa, puanyɛ Kuäär ni Kuoth kɛ dit,

³³ jɛn ram min jäl puɔ̱ɔ̱rä, rɛy puɔ̱ɔ̱rä mëë wal. Kä cuɛ jɔwdɛ ja̱k, jɔwdɛ min bum.

³⁴ Latdɛ buɔ̱m Kuɔth, min te kuäärɛ kä I-thɛ-rɛl, kä te buɔ̱mdɛ ni puɔ̱ɔ̱rä.

³⁵ Kä gääyi naath lö Kuoth rɛy luaakdu, ɛn Kuoth I-thɛ-rɛl la kämɛ nɛɛkɛ buɔ̱m. Ɛ liak wä kä Kuoth!