Diit 66 - RUAC KUƆTH IN RƐL RƆ

Liak gɔɔyä Kuɔth kɛ ji̱ I-thɛ-rɛl

(Dit tuarä)

¹ Puanyɛ Kuoth kɛ diit tɛthkä lɔaac yɛn ji̱ wec muɔ̱ɔ̱n diaal,

² kɛ̈tdɛ diit bumä cio̱tädɛ, ka̱mɛ jɛ liak puɔnyä!

³ Jio̱kni Kuoth i̱, “Lätku ga̱ykɛ naath! Ti̱i̱kɛ buɔ̱m mi diit mi jak ji̱ tɛ̈ru kä guɔŋkɛ rɔ nhiamdu.

⁴ Pal ji̱ wec muɔ̱ɔ̱n diaal ni ji̱, kä puanykɛ ji̱ kɛ diit, kä liak kɛn ni ciötdu.”

⁵ Bia nɛ̈nɛ min ci Kuoth ɛ la̱t, lätkɛ tin ga̱ykɛ naath kɛ kui̱ nath.

⁶ Cɛ yiër jak kä kööt, ɛ cu naath kir ŋok kɛ ciökiɛn. Kɛ kui̱c ɛmɔ ɛ lɔcdan tɛth kɛ Kuoth,

⁷ min bi ruëc kɛ buɔ̱mdɛ amäni cäŋ kɛl, kä tiit waŋdɛ döör, ɛ nɛy tin lökɛ jɛ /ca rɔ liak.

⁸ Liakɛ Kuothdan lö naath, a liɛŋkɛ jiööth tin puanykɛ jɛ,

⁹ cɛ kɔn jak kä tëk rɛy nath, kä /kenɛ kɔn jak kä tëth.

¹⁰ Kä kɛ ɣöö ci nɛy ɣɔ̱n lö Kuoth, ci kɔ lɛy ce̱tnikɛ ciɛk in bo̱r.

¹¹ Kä ci kɔ jak kä yiankɛ, kä cikɔ moc kɛ rik ti thiak thiaak,

¹² kä ci naath jak kä jäl wuɔ̱thnikɔ, cakɔ cuɔt maac kɛnɛ rɛy pi̱i̱ni, kä täämɛ cikɔ nööŋ guäth riäŋä.

¹³ Ɣän bä ben luaakdu kɛ muc tin waŋkɛ, kä bä ji̱ ka̱m min cä yac,

¹⁴ min cä lat kɛ thokdä guäth ëë ta̱a̱ kɛ riɛk.

¹⁵ Ɣän bä ji̱ thöp muc ti cuath cuaath ti waŋkɛ, kɛɛl kɛ muc thääk deet rɔɔmni. Kä bä muc thääkni kɛnɛ böwni thöp ji̱.

¹⁶ Bia lieŋɛ yɛn nɛy diaal tin luɔ̱thkɛ Kuoth, bä min cɛ lät kä ɣä ben la̱t yɛ.

¹⁷ Cua̱ jɛ cɔl kɛ thokdä, kä cua̱ jɛ liak kɛ lɛpdä.

¹⁸ Kä mi tëë kɛ duer mi te lɔɔcdä, /ci Kuäär ɣä dëë liŋ.

¹⁹ Kä kɛ thuɔ̱k ci Kuoth ɣä liŋ, cɛ jɔw palädä liŋ.

²⁰ Ɛ liak tekɛ Kuoth, kɛ ɣöö /kenɛ palä lo̱k kä /kenɛ nhökdɛ min thil pek woc kä ɣä!