Diit 65 - RUAC KUƆTH IN RƐL RƆ

Lär tɛthä lɔaac kɛ kui̱ ŋër bɛɛl ti ŋuan

(Dit Dee-bid)

¹ Liak akɛ ji̱ lö Kuoth kä Dha-yɔn, kä bakɔ ya̱cda lät kä ji̱,

² kɛ ɣöö la loc ji̱ pal! Bi nɛy diaal ben kä ji̱.

³ Mi wä lät jiäknikɔ nɛy wä puɔ̱t, päli kɔ nyuɔɔnkɔ.

⁴ Tɛ̈th lɔaac akɛ nɛy tin ci mɛk kä ci nööŋ kutdu, kɛ ɣöö bikɛ ben cieŋ rɛy kalu. Bakɔ ro̱ŋ kɛ gɔy dhɔaaru, luaakdu min rɛl gɔɔydɛ rɔ!

⁵ La kɔ a looci kɛ lät ti ga̱ykɛ naath lö Kuoth känäda, kä ɛ ji̱n la ŋa̱th wec muɔ̱ɔ̱n kɛɛliw, kɛnɛ nɛy tin te kui̱ bäpdiitni.

⁶ Kä kɛ buɔ̱mdu ci pääm rialikä, kɛ ɣöö ci rɔ kum kɛ buɔ̱m.

⁷ Kä ci muaŋ bäpdiitni jak kä bit, ci wuɔ̱w muɔŋädiɛn gok, kɛnɛ rɔal nath.

⁸ Kä nɛy diaal tin cieŋ rɛy ɣɔaa cikɛ dual kɛ lätku tin ga̱ykɛ naath, kä curi bak ɣɔaa kɛnɛ kony ca̱ŋ jak kä ki̱t kɛ tɛ̈th lɔaac.

⁹ Kä curi piny gui̱l kɛ muɔ̱cdu kɛ jɛ nhiaal, ci jɛ moc ria̱ŋ mi di̱i̱t, yiër Kuɔth cikɛ thia̱a̱ŋ kɛ pi̱w, ci naath moc kɛ bɛl ti ŋuan, curi piny cu rialikä inɔ.

¹⁰ Curi nhiaal jak kä dɛm rɛy ka̱a̱kni tin ca kuac, curi mundiɛn dua̱c piny kɛ nyuɛ̈ɛ̈r, curi kuaykɛ jak kä do̱ny.

¹¹ Kä ci gɔɔydu curi kɔ moc kɛ bɛɛl ti ŋuan, kä curi ɛ thurbiɛɛliku thiaŋ kɛ bɛl ti ŋuan.

¹² Kä ci tɔ̱a̱ri thia̱a̱ŋ kɛ wal ɣɔ̱ɔ̱k, kä cɛ pääm kum kɛ gɔɔy wal.

¹³ Kä ci rɛy tɔ̱a̱ri thia̱ŋ kɛ det, kä ci löli thia̱a̱ŋ kɛ bɛl, cu ti diaal ki̱et kɛ̈tkɛ diit tɛthkä lɔaac.