Diit 62 - RUAC KUƆTH IN RƐL RƆ

Ŋäth ni Kuoth kärɔa

(Dit Dee-bid)

¹ Jek tieeydä lɔ̱a̱ŋ kä Kuoth ni kärɔa, kä ɛ jɛn bä ka̱ndä kä jɛ mɔ.

² Ɛ jɛn kärɔa la gääŋdä kä käändä mɔ, jɛn ɛ ko̱tdä, thilɛ mi bi ɣä wany.

³ Kä bɛ ku mäni nɛy bi yɛn raan mak ɔ, ɛ bi yɛn diaal ɛ ɣɔak piny ɔ, ce̱tkɛ kal mi te lo̱o̱k lo̱o̱k mi go̱o̱r tëth?

⁴ Caar kɛn ni ɣöö ba jɛ ɣɔak piny guäth luthädɛ. La lɔcdiɛn a tɛth kɛ kac, la puɔthkɛ raan kɛ thukiɛn, kä lämnikɛn kɛ lo̱ckiɛn.

⁵ Jek tieeydä lɔ̱a̱ŋ kä Kuoth ni kärɔa, kä bä ŋäthni jɛ.

⁶ Ɛ jɛn kärɔa la gääŋdä kä käändä mɔ, jɛn ɛ ko̱tdä, thilɛ mi bi ɣä wany.

⁷ Ka̱ndä kɛnɛ luthdä bäkɛ kä Kuoth, jɛn ɛ pämdä mi bum kä ɛ luääkdä.

⁸ Ŋa̱thɛ ni Kuoth gua̱thni diaal lö naath, kä ka̱mɛ jɛ lo̱ckun, kɛ ɣöö Kuoth ɛ luääkdan.

⁹ Nɛy tin can ce̱tkɛn kɛ yiëë ran, kä nɛy tin ria̱ŋ ria̱a̱ŋ ce̱tkɛn nikɛ lɔar, mi cakɛ thɛm, ce̱tkɛn nikɛ baŋ, kɛn diaal puɔlnikɛn kä yiëë ran.

¹⁰ Ji̱n /cu ŋäth ni kar, kä /cu rɔ liak kɛ tin kualkɛ, cäŋ ci ria̱ŋ jek, /cu lɔcdu läth thi̱n.

¹¹ Mëë ci Kuoth ruac, cua̱ nɛmɛ liŋ latdɛ jɛ. Ɛn ɣöö buɔ̱m ɛ duŋ Kuɔth,

¹² kä nhök in thil pek ɛ duŋ Kua̱r ni Kuoth. Kä la culi ni raan mi ro̱ŋ kɛ lätkɛ.