Diit 61 - RUAC KUƆTH IN RƐL RƆ

Pal kɛ kui̱ ga̱ŋ

(Dit Dee-bid)

¹ Liŋ läŋdä lö Kuoth, kä liŋ palä.

² Ɛ cäŋ ta̱a̱ ni peek ɣɔaa, ɣän bä ji̱ la cɔalä, bä ji̱ cɔl guäth in ta̱a̱ luär. Naŋni ɣä wi̱i̱ pa̱a̱m mi bäär,

³ kɛ ɣöö ɛ ji̱n gääŋdä ce̱tdi kɛ duel mi bum mi gäŋ ɣä kä ji̱ tɛ̈rä.

⁴ Jakni ɣä kä cieŋ rɛy luaakdu amäni cäŋ kɛl, a jëkä ka̱n kä ji̱ piny gɔ̱ɔ̱ku.

⁵ Kɛ ɣöö ci ya̱cdä liŋ lö Kuoth, kä ci ɣä ka̱m la kämi nɛy tin luɔ̱thkɛ ciötdu.

⁶ Ku ni̱n teekä kua̱r jakä ŋuan. Ɛ tëkdɛ jäny rɛy ri̱cni ti ŋuan!

⁷ A jɛ ku ruëc amäni cäŋ kɛ nhiam Kuɔth, kä ɛ nhökdu kɛnɛ gɔɔydu gaŋkɛ jɛ.

⁸ Ɣän bä ji̱ ku puany kɛ diit ni ciaŋ, Ɣän bä ji̱ ka̱m muckä tin cä yac i̱ bä ka̱m ji̱ ni ciaŋ.