Diit 60 - RUAC KUƆTH IN RƐL RƆ

Pal kɛ kui̱ känä döör

(Dit Dee-bid ëë kiitdɛ mëë tëë ko̱o̱r Ä-ram-na-ɣä-ra-yim kɛnɛ Ä-ram-dho-baa kɛnɛ gua̱a̱th ëë luny kɛ ji̱ I-thɛ-rɛl jɔk ɛ ci kɛ ji̱ Ɛ-dɔm ti bathdɔɔri wäl rɛw näk rɛy täpä milɛkä)

¹ Ci kɔ lo̱k lö Kuoth, ci kɔ kɔŋ jakä juɔckɛ, ɛ puc ji̱n ci kɔŋ ŋɛ̈ɛ̈ny kɛ kɔ, kä täämɛ ku luny kä kɔ!

² Ji̱n curi piny jakä lathɛ, kä curi jɛ moc kɛ kɔ̱a̱k ti ɣööŋ, kä täämɛ ku jɛ luɔc gɔɔyädɛ kɛ ɣöö jɛn ba̱kɛ.

³ Kä curi nɛɛku jakä cuc ɛlɔ̱ŋ. Curi moc ni kɔ kɛ kɔaŋ mi cu yɔ̱ŋ ni kɔ.

⁴ Kä curi nɛy tin luɔ̱thkɛ ji̱ moc kɛ nyuuth kɛ ɣöö bikɛ rɔ̱ kä riɛk.

⁵ Kän kɔ kɛ buɔ̱mdu kä palä, dɔ̱ŋ bi nɛy tin nhɔki kään.

⁶ Kä cu Kuoth ruac ni rɛy luaakdɛ wëë i̱, “Kɛ tɛ̈th lɔaac, ɣän bä Cɛ-kɛm da̱a̱k, kä bä lo̱o̱l Cu-koth dääk kä nɛɛkä.

⁷ Gil-yad ɛ duŋdä, kä Ma-na-thɛ ɛ duŋdä bä, kä Ɛ-pa-rim ɛ kum kuäärädä, kä Juda ɛ jɛn kɛɛt kuäärädä.

⁸ Kä bä Mo-ab jak kä lääk kuaknikä kä bä wa̱a̱rikä la̱th kä Ɛ-dɔm, kä bä ki̱et kɛ buɔ̱m kä Pi-li-thɛt.”

⁹ Kä ɛŋa mi bi ɣä naŋ däär wec in bum? Kä ɛŋa mi bi ɣä buath kä Ɛ-dɔm?

¹⁰ Ɛ cikɔ ku lo̱k kɛ thuɔ̱k lö Kuoth ɛ /ci bi lɛ wä kɛɛl kɛ rɛmda lö Kuoth?

¹¹ Ku kɔ mal luäk kä gua̱n tɛ̈r, kɛ ɣöö thilɛ luäk ran luɔt.

¹² Kɛ ɣöö te Kuoth kɛɛl kɛ kɔ bakɔ ji̱ tɛ̈ra joc, kɛ ɣöö ɛn Kuoth bɛ ji̱ tɛ̈ra näk.