Diit 6 - RUAC KUƆTH IN RƐL RƆ

Pal kɛ gua̱th rikä

(Dit Dee-bid)

¹ /Cu ɣä luek kä gaki lö Kuoth Nhial, kä /cu ɣä ruac kä ŋɛ̈ɛ̈nyi.

² A lɔcdu kɔ̱c kɛ ɣä lö Kuoth Nhial, kɛ ɣöö bɛc puɔ̱nydä, moc ɣä buɔ̱m kɛ ɣöö ɣän cä cuuc.

³ Kä tieeydä kɛɛliw cɛ cuuc, bɛ kulɛ amäni nɛy lö Kuoth Nhial bi ɣä luäk ɔ?

⁴ Bër luäk ɣä lö Kuoth Nhial, kɛ kui̱ nho̱kädu min thil pek bër kän ɣä.

⁵ Kɛ ɣöö /ca ji̱ dëë tim jɔɔkni, kä ɛŋa dëë ji̱ liak rɛy kɔ̱kä mɔ?

⁶ Ɣän cä cuuc kɛ wiee, ni ciaŋ kɛ wäär la thiäŋ dhaŋdä kɛ mer, la lua̱a̱ny kölkä kɛ mer wi̱i̱kädä.

⁷ Ci nyinkä tith ɛ cuät kɛ wiee, ɛ /cä lɛ nën kɛ kui̱ ji̱ tɛ̈rä.

⁸ Wuɔcɛ rɔ̱ gekädä yɛn la̱a̱t jiäkni diaal, kɛ ɣöö ci Kuoth Nhial wieedä liŋ.

⁹ Kuoth Nhial cɛ thiecdä liŋ kä cɛ palä nhɔk.

¹⁰ Ji̱ tɛ̈rä diaal bikɛ pöc kä bikɛ ga̱a̱c, kä kɛ gua̱th mi tɔt bikɛ loc jɔk kɛ pöc mi di̱i̱t.