Diit 59 - RUAC KUƆTH IN RƐL RƆ

Pal kɛ kui̱ lua̱k kä gua̱n tɛ̈r

(Dit Dee-bid ëë kiitdɛ mëë ci Thɔɔl jɛ jäkä naath ti wa jɛ lim dhɔrɛ kɛ ɣöö dëë jɛ wä näk)

¹ Kän ɣä kä ji̱ tɛ̈rä lö Kuothdä, gaŋ ɣä kä nɛy tin görkɛ makdä.

² Luäk ɣä kä nɛy tin la̱tkɛ jiäk, kä kän ɣä kä kɛn na̱a̱k nath ti̱ti̱.

³ Duundɛ ɣöö nɛnɛ bɛ bi̱i̱m kɛn ni näkdä, kɛn nɛy ti ji̱ tiilä ca rɔ̱ dol kɛ makdä, kä thil ɛ kiɛ duer mi cä la̱t lö Kuoth Nhial,

⁴ ɛ cäŋ thilɛ duer mi cä la̱t, la kɛn cua̱ riŋ wa rɔ̱ rialikä kɛ kui̱dä. Ku rɔɔdu jiɛc lö Kuoth kä bër luäk ɣä, ku jɛ ben nɛn ɛ ji̱n.

⁵ Kä ji̱n Kuoth Nhial in la Ruey Ɣɔaa, ɛ ji̱n Kuoth I-thɛ-rɛl. Jiɛc rɔ bër tɔ̱ŋ döör diaal, cu raan päl kä kɛn ji̱ la̱a̱t jiäkni tɔ̱tɔ̱.

⁶ La lunykɛ jɔk kɛ thiaŋ, ja̱lnikɛn däär wec kɛ ŋɛ̈ɛ̈ny ce̱tkɛ jio̱o̱k.

⁷ Ɛn wa̱nɔ bikɛ cu kueth nikɛn, moth lëëpkiɛn ce̱tnikɛ thɛp, kɛ ɣöö laar kɛnɛ i̱, “Ɛŋa mi liŋ kɔn?”

⁸ Duundɛ ɣöö la dɔli kɛ lö Kuoth, la lɛɛŋi kɛn döör diaal ti̱ti̱.

⁹ Kä lö buɔ̱mdä, ɣän bä guic ni ji̱, kɛ ɣöö ɛ ji̱n gääŋdä lö Kuoth.

¹⁰ Kuothdä min nhɔk ɣä bɛ wä nhiamdä, Kuothdä bɛ ɣä ka̱m juc ji̱ tɛ̈rä.

¹¹ /Cu näk nikɛ lö Kuoth, kɛ ɣöö dëë nɛɛkä jɛ pa̱l ruëëc. Ku jaknikɛ kä yi̱c kɛ buɔ̱mdu, kä luucnikɛ ni piny, lö kuäär in la ko̱tda.

¹² Kä kɛ kui̱ dueerikiɛn, kɛnɛ rieet thuknikiɛn, ɛ liakdiɛn ku kɛ käp. Kui̱ lamä kɛn ka̱a̱cni tin ci kɛn kɛ lat,

¹³ ɛ ŋɛ̈ɛ̈ny thuukɛ, thukɛ amäni mi/cɛ thil ram mi ci duɔth. Ɛ jɛn bi wi̱c muɔ̱ɔ̱n ɛ ŋa̱c kɛɛliw ɔ. Ɛn ɣöö Kuoth Je-kɔb tëë wi̱i̱ muɔ̱ɔ̱n kɛɛliw.

¹⁴ La lunykɛ jɔk kɛ thiaŋ, ja̱lnikɛn däär wec kɛ ŋɛ̈ɛ̈ny ce̱tnikɛ jio̱o̱k.

¹⁵ Ku wi̱el ni kɛn kɛ go̱r mi̱eth, bikɛ cu kuɔm mi /ken kɛ mi̱eth mi ro̱ŋ jek.

¹⁶ Duundɛ ɣöö ɣän bä diit kɛt kɛ kui̱ bumädu, nikɛ runwaŋ ɣän bä dit kɛt kɛ jɔw mi di̱i̱t kɛ kui̱ nho̱kädu min thil pek. Kɛ kui̱ kä ɣöö ɛ ji̱n gääŋdä, kä ɛ ji̱n luääkdä kɛ cäŋ rikädä.

¹⁷ Kɛ ɣöö ɛ ji̱n buɔ̱mdä ɣän bä ku puany ni ji̱ kɛ diit, kɛ ɣöö ɛ ji̱n gääŋdä lö Kuoth, ji̱n Kuoth in nhɔk ɣä.