Diit 58 - RUAC KUƆTH IN RƐL RƆ

Pal kɛ kui̱ cuɔ̱t

(Dit Dee-bid)

¹ La yɛn cuɔ̱ɔ̱ŋ a nyooth inu lö ruëëc? La yɛn nath a luk ɛ päär?

² Ëëy, car yɛn ni ti jiäk kɛ lo̱ckun, kä lät yɛn ni nyuɔɔn kɛnɛ gak gaakni wi̱i̱ muɔ̱ɔ̱n.

³ Kä ji̱ nyuɔɔni tekɛ nyuɔɔn ni gaatädiɛn, a lät kɛn ni ka̱a̱cni ni kuɛɛkädiɛn.

⁴ Kä kɛn tekɛ kɛ lueŋ mi ce̱tkɛ lueŋ thɔa̱a̱l, ce̱tdɛ riir mi miŋ mi /ci li̱ŋ.

⁵ Kɛ ɣöö /cɛ jɔw raam mi ŋar kɛ jɛ bi liŋ, kiɛ /cɛ jɔw raam in puɔ̱tdɛ thom bi liŋ.

⁶ Aɣ Kuoth ku lɛckiɛn töl, ku ka̱a̱p lonyni, töl lö Kuoth Nhial.

⁷ Ku kɛ bath ce̱tnikɛ pi̱w ti ci lo̱ny jɔ̱ɔ̱r. Ɛ kɛ nuɔɔr ce̱tnikɛ juaac ti ca dɔany.

⁸ Ɛ kɛ ce̱tnikɛ luɛk cöm mi ci thia̱ŋ, kɛnɛ gat mi ca thɔ̱r mi /ken cäŋ met nɛn.

⁹ Kɛ pɛ̈th mi leny ni leth cukä kä mac kuiiyni, inɔ bi Kuoth ji̱ nyuɔɔni ŋuɔk jɔ̱ɔ̱r kɛ pɛ̈th.

¹⁰ Bi ji̱ cuŋni lɔcdiɛn tɛɛth mi wa ji̱ nyuɔɔni nɛn cakɛ duäc, mi wä ciökiɛn lak rɛy riɛm ji̱ nyuɔɔni.

¹¹ Kä bi naath ɛ laar wäkɛ i̱, “Ɛ puc, kɛn ji̱ cuŋni tekɛ kɛ muc, kä ɛ puc te wi̱c muɔ̱ɔ̱n kɛ Kuoth mi luk jɛ.”