Diit 56 - RUAC KUƆTH IN RƐL RƆ

Pal ŋäthä Kuɔth

(Dit Dee-bid mëë ca jɛ käp ɛ ji̱ Pi-li-thɛt kä Gɛ̈th)

¹ Ɛ lɔcdu kɔ̱c kɛ ɣä lö Kuoth, kɛ ɣöö joc naath ɣä, kɛ cäŋ kɛɛliw la ji̱ tɛ̈r ɣä la yɔŋ.

² Kä makɛ ɣä ji̱ tɛ̈rä kɛ cäŋ kɛɛliw, nyiëëny ji̱ liakä ti ŋuan kɛ ɣä.

³ Mi cä dual lö Kuoth Nhial, ɣän la la̱thä ŋa̱thdä kä ji̱.

⁴ Kä ji̱n Kuoth in liakä ruacdɛ kä ji̱n Kuoth in ŋa̱thä, ɣän /cä dual, kä ɛŋu mi dëë raan ɛ lät kä ɣä?

⁵ La kɛn rieetkä amɛŋ kɛ cäŋ kɛɛliw, Kä cärkiɛn diaal kɛ kui̱dä kɛ ti jiäk.

⁶ La kɛn rɔ̱ cua̱ duul, kä tɛ̱̈ɛ̱̈kɛ rɔ̱, kɛ ɣöö bikɛ lätkä guic, go̱rkɛn ni dhilä piny.

⁷ Ku kɛ tɔ̱ŋ lö Kuoth kɛ lät jiäkiɛn, ɣɔk nikɛ piny kɛ ŋɛ̈ɛ̈ny lö Kuoth!

⁸ Ji̱n ŋäci rikä, kä ŋäci pek in ci wiee kɛ ɣä, Ɛ /cikɛ ku te rɛy buɔkdu?

⁹ Mi wä ji̱ tɛ̈rä loc jɔk, kɛ cäŋ in bä cɔɔl ni ji̱kɛ luäk, kɛ jɛn duɔ̱ɔ̱p ɛmɔ ɣän bä jɛ ku ŋa̱c ɛn ɣöö te Kuoth kɛɛl kɛ ɣä.

¹⁰ Jɛn Kuoth in liakä ruacdɛ, jɛn Kuoth Nhial in liakä rieetkɛ.

¹¹ Jɛn Kuoth in ŋa̱a̱thä ɣän /cä dual, kä ɛŋu mi dëë raan ɛ lät kä ɣä?

¹² Ɣän bä ya̱cdä la̱t kɛ kui̱du lö Kuoth. Ɣän bä ji̱ la la̱rä tɛ̈th lɔaacdä ni ciaŋ.

¹³ Kɛ ɣöö ji̱n ci yiëëdä kän li̱th, kä ci ɣä pën ɣöö ba ɣä joc, Kɛ ɣöö ɣän bä kulɛ ja̱l nhiam Kuɔth rɛy buɔyä muun teekä.