Diit 51 - RUAC KUƆTH IN RƐL RƆ

Pal raam mi ri̱i̱t dueerikɛ.

(Dit gan Kora)

¹ A lɔcdu kɔ̱c kɛ ɣä lö Kuoth, kɛ ɣöö nhökdu thilɛ jɛ pek. Kä kɛ ɣöö kɔ̱a̱c lɔaacdu thilɛ jɛ pek, kä woc dueerkä dueerikä.

² Lak ɣä ɛ puɔth kä jiäkä, kä woc dueerkä.

³ Kɛ ɣöö ɣän ŋa̱cä dueerkä, ɣän la nɛ̈ɛ̈nä jiäk ni ciaŋ nhiamdä.

⁴ Ɛ ji̱n kä rɔaadu cä duer duerɔ, ɣän cä la̱t ni mi jiääk waaŋdu, ɛ cuɔ̱ɔ̱ŋdu ɛn ɣöö luki ɣä, kä cäŋ bi ɣä kuɛth luki ni cuɔ̱ɔ̱ŋdu pa̱ny.

⁵ Ɣän ta̱a̱kɛ duer ni mëë dapkɛ ɣä ɛ maar. Nɛnɛ duerä tëë kɛ ɣä ni jic maar.

⁶ Ji̱n go̱o̱ri ni thuɔ̱k, kɛ kui̱ ɛmɔ moc ɣä kɛ pɛl rɛy lɔaacdä.

⁷ Lak ɣä nikɛ thabuuny bä ku puath, lak ɣä, ɛ bä buay ce̱tnikɛ cak.

⁸ A liɛŋä ni gɔɔy kɛnɛ tɛ̈th lɔaac, Ɛ cɔ̱wkä tin ci nor lɔcdiɛn tɛth.

⁹ /Cu dueerkä lɛ nyɔk kɛ guec, kä woc nyuɔɔnkä diaal.

¹⁰ Jakni lɔcdä kä puɔth lö Kuoth, kä läthni yiëë in thuɔ̱k mi pay tuɔɔk lɔɔcdä.

¹¹ Cu ɣä lɛ woc nhiamdu, kä cu yiëëdu min rɛl gɔɔydɛ rɔ naŋ kä ɣä.

¹² Ku ɣä luɔ̱c tɛ̈th lɔaac känädu. Kä moc ɣä kɛ yiëë luäŋä.

¹³ Inɔ, bä ji̱ dueeri cu ŋi̱eec kɛ duɔ̱pku, kä bi ji̱ dueeri luny kä ji̱.

¹⁴ Kän ɣä kä wuth tiɛm piny lö Kuoth, luäk ɣä lö Kuoth känädä, ɣän bä ji̱ ki̱et dit kɛ kui̱ gɔɔyädu.

¹⁵ Lɛp thokdä lö Kuoth Nhial, ɣän bä ji̱ liak kɛ diit.

¹⁶ Kɛ ɣöö ji̱n thilɛ ji̱ nhök kɛ muc. Kä mi cä wëë thöpä muc in waŋkɛ, /ci lɔcdu a tɛth kɛ jɛ.

¹⁷ Muc in go̱o̱r Kuothɛ ɛ yiëë mi kɔ̱c, /ci ram mi ci rɔ ri̱t lɔɔcdɛ bi lo̱k lö Kuoth.

¹⁸ Ku mi gɔaa lät kä Dha-yɔn kɛ nhök lɔaacdu, nyɔk päny Jɛ-ru-tha-lɛm kɛ ta̱th,

¹⁹ bi lɔcdu cu tɛɛth kɛ muc tin gɔw, muc tin waŋkɛ kɛɛliw, kä ba thääk thöp wi̱i̱ yi̱kädu.