Diit 50 - RUAC KUƆTH IN RƐL RƆ

Muc tin go̱o̱r Kuoth kɛ

(Dit A-thap)

¹ Cu Kuoth in leny buɔ̱mdɛ ti diaal ni Kuoth Nhial ruac, cuɛ wi̱c muɔ̱ɔ̱n cɔl nikä käny ca̱ŋ ɛ wä nikä kony ca̱ŋ.

² Kä Dha-yɔn, wec in gɔaa, cu buay Kuɔth ben ni thi̱n.

³ Ci Kuothda ben, kä /cɛ bi biɛt, te mac mi pɛt naath nhiamdɛ, kä te jiɔam mi leth gekädɛ.

⁴ Cuɛ pua̱a̱r kɛnɛ piny cɔl, kɛ ɣöö bɛ nɛɛkɛ ben luk.

⁵ Cuɛ wee i̱, “Bia ma̱tdɛ rɔ̱ ɣä yɛn nɛɛkä tin gɔw, tëë ca mat ruac lat kɛ ɣä kɛ tho̱p mucä!”

⁶ Ci pua̱a̱r cuŋkɛ lat, kɛ ɣöö Kuoth puɔ̱nydɛ ɛ luuk nath!

⁷ “Liɛŋɛ jɛ lö nɛɛkä, ɣän bä ruac, kä lö I-thɛ-rɛl bä la neen kɛ kui̱du. Ɛ ɣän Kuoth ni Kuothdu.

⁸ Kä /ci ɣän yɛ luek kɛ kui̱ mucnikun, muckun tin waŋkɛ tekɛ nhiamdä ni ciaŋ.

⁹ Ɣän /cä muc thääkni bi nhɔk dho̱rikun, kiɛ thääk deet böwni lueeknikun.

¹⁰ Kɛ ɣöö ley dɔaar diaal kɛ nyinkä, kɛnɛ ɣɔ̱k tin te wuɔ̱thni päämni ti bathdɔɔr.

¹¹ Kä ŋa̱cä diit nhial diaal, kä tin diaal tin tëk kɛ nyinkä.

¹² “Kä mi ci buɔth ɣä näk, /cä yɛ dëë thiec, kɛ ɣöö ɣɔw kɛnɛ tin diaal tin te thi̱n kɛ nyinkä.

¹³ Ɛ kua̱ ri̱ŋ thääkni a camä, kiɛ la maathä rim thääk deet?

¹⁴ Thöpɛ ni Kuoth muc tɛthkä lɔaac, kämni Kuoth in Dit ni Jɛn min ci yac.

¹⁵ Kä cɔl ni ɣä kɛ gua̱a̱th rikä, ɣän bä ji̱ luäk, kä bi ɣä cu liak.”

¹⁶ Duundɛ ɣöö kɛ kui̱ ji̱ nyuɔɔni cu Kuoth wee i̱, “Ɛ cuɔ̱ɔ̱ŋ ŋukä lat yɛnɛ ŋuɔ̱tkä mɔ, mɔ lat yɛn mat ruacdä mɔ?

¹⁷ Kä yɛn lo̱ki ŋi̱i̱cdä, ɛ yor yɛn ni rieetkä jɔkdu.

¹⁸ Mi cia wään nɛn, bi rɔ̱ cu ma̱t jɛ, kä bi cu te ni kɛɛl kɛ dho̱o̱m.

¹⁹ “La cua̱ lat ni mi jiääk, kä bi lɛpdu cu lat ni kac.

²⁰ Kä la cua̱ latdi ni dämuɔɔr jɔ̱ɔ̱r, kä cäki gatmuɔɔri ikä.

²¹ Kɛn ti̱ti̱ cikɛ la̱t kä biɛtdä, ŋäci ni ɣöö ɛ ɣän ram mi ce̱tkɛ ji̱. Duundɛ ɣöö ɛn täämɛ luëëkä ji̱ kä bä ji̱ gɔny ni nhiamdu.

²² “Tiɛtdɛ nɛmɛ, yɛn nɛy tin pa̱lɛ Kuoth ruëëc, kiɛ bä yɛ da̱k ni piny, kɛ thilɛ ram mi bi yɛ luäk!

²³ Kä nɛy tin nööŋkɛ muc tɛthkä lɔaacdiɛn liakɛ ɣä, kä rialkɛ dupkiɛn ikä ɣän bäkɛ ka̱m ka̱m Kuɔth!”