Diit 49 - RUAC KUƆTH IN RƐL RƆ

Ŋa̱th yio̱o̱ni ɛ dɔ̱ɔ̱r

(Dit gan Kora)

¹ Liɛŋɛ nɛmɛ, yɛn nɛy diaal! Liɛŋɛ jɛ, yɛn nɛy diaal tin cieŋ rɛy ɣɔaa,

² yɛn nɛy tin di̱t kɛnɛ tin tiɛtni, nɛy tin ria̱ŋ ria̱a̱ŋ kɛnɛ can!

³ Ɣän bä lat ni rieet pɛlä, kä bi lɔcdä lat ni ruac ŋäcä ŋɔaani.

⁴ Kä ɣän bä ji̱thdä pa̱l piny kɛ rieet cäätdä, kä bä ruacdä lat kɛ thom.

⁵ Ɛŋu dëë dual kɛ ɣä mɔ, mi wä gua̱a̱th rikni wä ben, mi wa ɣä go̱l ɛ nɛy ti ji̱ nyuɔɔni,

⁶ nɛy tin ŋa̱thkɛ ni ria̱ŋdiɛn kä liakɛ rɔ̱ kɛ di̱t riäŋädiɛn?

⁷ Kɛ thuɔ̱k thilɛ ram mi dëë tëk raam mi dɔ̱diɛn luɛl, kiɛ derɛ Kuoth moc duɔ̱ɔ̱r mi luɛlɛ tëkdɛ.

⁸ Kɛ ɣöö luël teekä bɛcɛ, thilɛ mi dëë raan ɛ kɔk tëk,

⁹ mi dëë kɛ tëk raan amäni cäŋ kɛl, mi dëë jɛ pën lia̱a̱.

¹⁰ Kä nɛ̈nkɛ nɛy tin pɛl a li̱wkɛ, kä nɛy tin dɔa̱a̱r kɛnɛ nyɔapni li̱w kɛ kɛɛl, kä bikɛ ria̱ŋdiɛn ba̱ny nɛy ti kɔ̱ŋ.

¹¹ Kä cär lɔaacdiɛn ba dhɔriɛn amäni cäŋ kɛl, ba gua̱a̱th cieŋädiɛn ri̱cni diaal, ɛ cäŋ ca muɔ̱n cɔl kɛ ciöötkiɛn.

¹² Kä ram mi riäŋ kä thil ca̱r ce̱tdɛ nikɛ ley mi ci li̱w.

¹³ Nɛmɛ ɛ jɛn guut nɛɛni tin ŋa̱thkɛ ni ria̱ŋdiɛn, kɛnɛ ji̱ kɔariɛn tin ŋa̱thkɛ ni ruacdiɛn.

¹⁴ Kɛn bikɛ li̱w ce̱tnikɛ dët, kä lia̱a̱ ɛ jɛn bia yieendiɛn ɔ, Kä bɛ kɛ dhiɛl ni kɔ̱kä, bi pua̱nykiɛn dhiap rɛy kɔ̱kä, kä dhɔriɛn bɛ te ni jɔɔkni.

¹⁵ Duundɛ ɣöö bi Kuoth tëkdä luɛl, bɛ ɣä kän bumä li̱eth.

¹⁶ Cu dual kɛ ram mi ci ria̱ŋ, mi reep kuak dhɔaarɛ rɔ̱.

¹⁷ Kɛ ɣöö mi wäkɛ wä li̱w thilɛ mi ba naŋ, /ci ria̱ŋdiɛn bi wä kɛɛl kɛ kɛ.

¹⁸ Cäŋ ni min tɛth lo̱ckiɛn min ŋotdɛ teekä, kɛ ɣöö liakɛ raan, kɛ ɣöö cɛ rɔ lät kä mi gɔaa,

¹⁹ bikɛ rɔ mat rɛy ri̱cni gua̱nikiɛn, tin /ca buay bi met nyɔk kɛ nën.

²⁰ Kä ram mi riäŋ kä thil ca̱r, ce̱tdɛ nikɛ ley mi ci li̱w.