Diit 48 - RUAC KUƆTH IN RƐL RƆ

Buay kɛnɛ buɔ̱m Dha-yɔn

(Dit gan Kora)

¹ Kuoth Nhial di̱tdɛ, kä ro̱ŋ ni jɛn kɛ liak, rɛy wec Kuɔthda, päämdɛ min rɛl rɔ.

² Gɔaaɛ kä tëë ni nhial kä ɛ tɛ̈th lɔaac wec muɔ̱ɔ̱n kɛɛliw. Ɛ Päm Dha-yɔn te kui̱c caam ɔ, ɛn wec Kua̱r in Di̱i̱t.

³ Kä Kuoth tëë rɛy wec in di̱i̱t, kä cɛ rɔ nyoth ala gääŋdɛ.

⁴ Mëë ci kua̱r rɔ̱ mat guäth kɛl, cukɛ wec ben mak.

⁵ Kä mëë cikɛ wec nɛn, cukɛ ga̱a̱c, cukɛ dual kä cukɛ rɔ̱ bar,

⁶ Cu dualkɛ käp ɛn wi̱ni, cukɛ riɛk ce̱tnikɛ ciek mi tekɛ mäc.

⁷ Kä kɛ jiɔam kuec känyä ca̱ŋ, curi babuuri Tar-cic riaw kä dɔɔr.

⁸ Ti̱ti̱ kɛ tëë cakɔ liŋ, kä täämɛ cakɔ kɛ nɛn rɛy wec Kuɔth Nhial in la Ruey Ɣɔaa, rɛy wec Kuɔthda, bi Kuoth ɛ gaŋ amäni cäŋ kɛl.

⁹ Rɛy luaakdu lö Kuoth, carkɔ nhökdu min thil pek.

¹⁰ Kä ciötdu lö Kuoth, Kä ci liakdɛ cop wi̱i̱ muɔ̱ɔ̱n kɛɛliw. Kä buɔ̱mdu puɔ̱tdi jɛ ni naath.

¹¹ Ɛ Päm Dha-yɔn tekɛ tɛ̈th lɔaac! Kä ɛ wi̱i̱ Juda lo̱ckiɛn tɛth kɛ kui̱ luɔ̱kdu!

¹² Wër jäli kä Dha-yɔn, wër jälɛ, kä kuɛn wi̱i̱kɛ,

¹³ guic pa̱nynikɛ agɔaa, wër guic ti̱eckɛ tin buɔ̱m buɔ̱ɔ̱m, bikɛ la̱t ri̱c tɔ̱ bi ben tɔ̱,

¹⁴ ɛn ɣöö Kuoth ɛmɛ, ɛ Kuothda amäni cäŋ kɛl. Kä jɛn bɛ la gääŋda mi do̱raar.