Diit 45 - RUAC KUƆTH IN RƐL RƆ

Dit kɛ kui̱ kuën kua̱r

(Dit gan Kora)

¹ Rieet ti gɔw ca lɔcdä thiäŋ, min cakä ciök ti̱ti̱ kɛ kui̱ kua̱r, cu lɛpdä ce̱tnikɛ galam raam mi gɔ̱r.

² Gɔaani ji̱n ɛlɔ̱ŋ kä wutni, kä ji̱n ŋäci ruac gɔaa, kɛ kui̱c ɛmɔ ci Kuoth ji̱ poth amäni cäŋ kɛl.

³ Yiɛni thɛpdu lɛtdu lö wääth köör, nyoth gɔɔydu kɛnɛ buɔ̱mdu.

⁴ Kɛ buɔ̱mdu juc naath, kɛ kui̱ thukä kɛnɛ cuɔ̱ɔ̱ŋ, kɛ buɔ̱mdu lätni ti ga̱ŋkɛ naath!

⁵ Ɛ bääriku tin muɔth muɔɔth yiathkɛ lɔc ji̱ tɛ̈r kua̱r, ɛ naath tëth ciökniku.

⁶ Kä bi kɔm kuäärädu te thi̱n amäni cäŋ kɛl lö Kuoth. Kä kɛɛt kuäärädu ɛ kɛɛt cuŋni.

⁷ Nhɔki ni cuŋ kä lo̱ki mi jiääk. Kɛ kui̱c ɛmɔ ci Kuoth ni Kuothdu ji̱ kuany rɛy mäthniku, kä cɛ ji̱ yi̱r kɛ liɛɛth tɛthä lɔaac,

⁸ kä bieyniku cakɛ moc wal ti kɔap kɔaap. Rɛy dhɔaar kua̱r in ca la̱t kɛ tuɔ̱ŋ guɔ̱ri pua̱tkɛ ji̱ thom mi tɛɛth lɔcdu thi̱n.

⁹ Kä te nyiee kua̱ri rɛy määnku tin nhɔki, kä kui̱c cuëëcdu cuŋ ciek kua̱r in ci rɔ moc kɛ da̱a̱p O-për thi̱n.

¹⁰ Liŋɛ lö nyal, päli ji̱thdu piny, päli nɛɛku kɛnɛ dhɔr guur ruëëc,

¹¹ bi Kuäär lɔcdɛ tɛɛth kɛ gɔɔydu, luthni jɛ kɛ ɣöö ɛ kuääru ba.

¹² Kä bi ji̱ wec Dhor ji̱ ben gui̱l kɛ muc, kä bi nɛy tin ria̱ŋ ria̱a̱ŋ

¹³ ji̱ ben gui̱l kɛ ti gɔw ti gööl. Nya kua̱r gɔaaɛ ɛlɔ̱ŋ, ca bi̱i̱dɛ köc ni da̱a̱p.

¹⁴ Cua jɛ nöŋ kuäär ɛ te bi̱i̱ biɛɛlidɛ puɔ̱ɔ̱nydɛ, kä guɔ̱ɔ̱rkɛ jɛ ɛ mäthnikɛ kä cuakɛ nöŋ jɛ.

¹⁵ Cukɛ ben kɛ tɛ̈th lɔaac min wäkɛ dhɔr kua̱r.

¹⁶ Bi tekɛ gaat lö kuäär ti bi gua̱a̱th guuri guäl, kä bikɛ jak kä ruëëc wi̱i̱ muɔ̱ɔ̱n kɛɛliw.

¹⁷ Bä ciötdu jak kä tiɛmkɛ rɛy ri̱cni diaal, kɛ kui̱c ɛmɔ ba ji̱ liak ɛ naath amäni cäŋ kɛl.