Diit 40 - RUAC KUƆTH IN RƐL RƆ

Liak kɛnɛ pal kɛ kui̱ luäkä

(Dit Dee-bid)

¹ Ɣän cä Kuoth Nhial lip bitdä, cɛ rɔ ri̱et ɣä, cɛ lulä liŋ.

² Cɛ ɣä ka̱m raar rɛy puɔ̱ɔ̱l mi thil wat, rɛy tua̱a̱k mi dɔkdɔk, cɛ ɣä la̱th ni wi̱i̱ pa̱a̱m, cɛ ɣä jak kä cuŋ guäth malä.

³ Cɛ ɣä moc dit mi pay cak, dit puɔnyä kɛ kui̱ Kuɔthda. Bi nɛy ti ŋuan ɛ nɛn kä bikɛ jɛ luɔ̱th kä bikɛ ŋa̱thdiɛn la̱th kä Kuoth Nhial.

⁴ Tɛ̈th lɔaac akɛ ram in ŋäth ni Kuoth Nhial, min /ci guur ni ji̱ liakä, nɛy tin guɔ̱ɔ̱rkɛ ni kuth guäyni!

⁵ Ci ti ŋuan ti ga̱ykɛ naath la̱t, lö Kuoth Nhial ni Kuothda, kɛnɛ tin ci car kɛ kui̱da, thilɛ ram mi dëë ca̱a̱t kɛ ji̱! Kä mi cä wee ruacä kɛ kui̱diɛn, ŋuankɛ a /cakɛ dëë luäŋ kɛ kuën.

⁶ /Ci muc kɛnɛ luuri go̱o̱r, duundɛ ɣöö ci jak ni ji̱thdä kä ɣööŋ. Kä /keni muc tin waŋkɛ kɛnɛ muc dueeri thiec.

⁷ Kä cua̱ wee i̱, “Ɣän ɛn cä ben, ce̱tkɛ min ca jɛ gɔ̱r rɛy buɔk ŋuɔ̱tni kɛ kui̱dä.

⁸ Ɛn ɣöö bä la̱t ni ruacdu, lö Kuothdä, ŋuɔ̱tku tekɛ ni rɛy lɔaacdä.”

⁹ Ɣän cä ruac känä lat rɛy matdä mi di̱i̱t, /ken thokdä biɛt ce̱tnikɛ min ŋäci jɛ lö Kuoth Nhial.

¹⁰ Ɣän /ka̱n cuɔ̱ɔ̱ŋdu tɛ̱̈ɛ̱̈ rɛy lɔaacdä, cä ruac kɛ kui̱ cuŋniku kɛnɛ ka̱ndu kɛ naath, Kä ɣän /ka̱n nhökdu min thil pek kɛnɛ gɔɔydu met tɛ̱̈ɛ̱̈ rɛy matdä in di̱i̱t.

¹¹ /Cu kɔ̱a̱c lɔaacdu päl kä ɣä lö Kuoth Nhial, ɛ nhökdu min thil pek kɛnɛ gɔɔydu gaŋkɛ ɣä ni ciaŋ!

¹² Kɛ ɣöö ci rik ti thil pek ɣä go̱l, ci dueerkä ɣä kum, a /cä nën, ŋuanikɛn kä mi̱em wecdä, a ci lɔcdä cu baath.

¹³ A lɔcdu tɛth kɛ ka̱ndä lö Kuoth Nhial, ber luäk ɣä kɛ pɛ̈th lö Kuoth Nhial!

¹⁴ Deri kɛn nɛy diaal tin görkɛ näkdä jak kä yi̱c kä po̱c, deri kɛn nɛy tin görkɛ däkdä luɔ̱c pöc!

¹⁵ Kä deri nɛy tin yɔaŋkɛ ɣä jak kä po̱c, tin wee i̱, “Ɣöö, ɣöö!”

¹⁶ Kä dëë nɛy diaal tin görkɛ ji̱ lo̱ckiɛn tɛɛth kɛ ji̱, kä dëë nɛy tin nhɔakɛ luäkdu ruac ni ciaŋ wäkɛ i̱, “Kuoth Nhial di̱tdɛ!”

¹⁷ Kä ɣän, ɛ ɣän can mi go̱o̱r ni duɔ̱ɔ̱r, duundɛ ɣöö ku Kuäär ni Kuoth lɛ ca̱r kɛ kui̱dä. Ɛ ji̱n luääkdä kä käändä, /cu gal lö Kuothdä!