Diit 39 - RUAC KUƆTH IN RƐL RƆ

Pal kɛ kui̱ gɔɔyä kä juey

(Dit Dee-bid)

¹ Ɣän cua̱ wee i̱, “Ɣän bä lätkä tit kä bä lɛpdä tit kä duer, Ɣän thilɛ mi bä lat min te ji̱ nyuɔɔni gekädä.”

² Ɣän cua̱ biɛt ɛ til, cuɛ thil mi cua̱ lat, Cu ŋuan ni rikä ɛlɔ̱ŋ.

³ Cuɛ ku bo̱r ni lɔcdä rɛci. Mi cä ca̱r bi bo̱o̱r lɔaacdä rɔ rep, kä cu lɛ gɔaa ni ɣöö bä ruac wa̱a̱ i̱,

⁴ “Kuoth Nhial nyuth ni ɣä pek in bi li̱w kɛ ɣä, ni̱n teekädä kɛ di? Lät ni ɣä pek in bi li̱w kɛ ɣä.

⁵ Ci ni̱nkä jakä ciɛk ce̱tnikɛ pät tetdä, ci gua̱a̱th teekädä cu thil luɔt waaŋdu. Ɛ puc, ci tëk ran ce̱tnikɛ jiɔam!

⁶ Ɛ puc raan ce̱tdɛ nikɛ ti̱ep, ɛ puc, lät ran diaal kɛ lɔar. La dol kɛn ti ŋuan kä /kueckɛ ram in bikɛ cam.

⁷ “Kä täämɛ ɛŋu mi bä ŋäth lö Kuoth Nhial? Ŋa̱thdä tëë kɛ ji̱.

⁸ Kän ɣä rɛy dueerikä diaal, /cu ɣä jak kä yɔaŋkɛ ɛ dɔa̱a̱r.

⁹ Ɣän cä biɛt, /ka̱n thokdä lɛp, kɛ ɣöö ɛ ji̱n ɛ nëë lät jɛ.

¹⁰ Ku ŋɛ̈ɛ̈nydu woc kä ɣä, kɛ ɣöö ci tetdu ɣä kuɛr ni piny.

¹¹ “Kä la lueeki naath kä duääci kɛ kɛ kui̱ dueerikiɛn, la däki kuakiɛn ce̱tdi nikɛ tor. Ɛ puc, ɛ puc raan ce̱tdɛ nikɛ jiɔam.

¹² “Liŋ palä lö Kuoth Nhial liŋ wieedä kɛ kui̱ lua̱k, cu bi biɛt kä ta̱a̱ kɛ riɛk. Kɛ ɣöö ɛ ɣän ja̱lu, mi jääl, Ɛ ɣän juɔ̱r ce̱tnikɛ mëë te gua̱a̱ri.

¹³ Ku ɣä päl kɛ ɣöö dɔ̱ŋ dëë tɛ̈th lɔaac lɛ jek, kamɔ /ken yiëëdä ni jiɛɛn wi̱c muɔ̱ɔ̱n ɔ.”