Diit 37 - RUAC KUƆTH IN RƐL RƆ

Ta̱a̱ gua̱n nyuɔɔni kɛnɛ ta̱a̱ gua̱n cuŋni

(Dit Dee-bid)

¹ /Cu gak kɛ kui̱ nɛɛni ti ji̱ nyuɔɔni, /cu tekɛ tiɛɛl kɛ kui̱ nɛɛni tin la̱tkɛ jiäk!

² Kɛ ɣöö bikɛ rɔɔl niɛ täämɛ ce̱tnikɛ juaac, bikɛ li̱w niɛ täämɛ ce̱tnikɛ juaac ti tɔ̱ɔ̱c.

³ Ŋäthni Kuoth Nhial, kä lätni ni gɔy, bi tëkdu jääny muun, kä bi tekɛ mal.

⁴ Go̱r tɛ̈th lɔaac kä Kuoth Nhial, bɛ ji̱ ka̱m tin go̱o̱r lɔcdu kɛ.

⁵ Kämni rɔɔdu Kuoth Nhial, ŋäthni jɛ, bɛ ji̱ luäk.

⁶ Bɛ cuŋku jak kä riawkɛ ce̱tnikɛ bak ɣɔaa, kä bɛ thuɔ̱ɔ̱ku jak kä buɔy ce̱tnikɛ cäŋ ca̱ŋda̱a̱r.

⁷ Pälni rɔɔdu piny, kä lipni Kuoth Nhial, /cu gak kɛ ram in jek ria̱ŋ, kɛnɛ ram in lät ca̱a̱p ti jiäk.

⁸ Päl gak, kä päl ŋɛ̈ɛ̈ny. A lɔcdu /ci jiäk, jiääk lɔaac bɛ naŋ ni ji̱ rɛy rikä.

⁹ Kɛ ɣöö ba ji̱ nyuɔɔni woc, kä bi nɛy tin ŋa̱thkɛ ni Kuoth Nhial mun ka̱n ala duŋdiɛn.

¹⁰ Kɛ gua̱a̱th mi tɔt, /ci ji̱ nyuɔɔni bi ŋot thi̱n, a cäŋ guici kɛ, /cikɛ bi te wa̱nɔ.

¹¹ Duundɛ ɣöö bi nɛy tin mua̱l mua̱a̱l mun ciɛŋ, bikɛ te rɛy malä mi di̱i̱t.

¹² La cäp gua̱n nyuɔɔni gua̱n cuŋni kä mi jiääk, kä la yio̱nyɛ jɛ thokdɛ kɛ gak,

¹³ duundɛ ɣöö cu Kuoth Nhial gua̱n nyuɔɔni dɔl, kɛ ɣöö ŋäcɛ jɛ ci ni̱nkɛ thia̱k.

¹⁴ Cu ji̱ nyuɔɔni mutnikiɛn ka̱n kä cukɛ bäärikiɛn rialikä, kɛ ɣöö ba can näk kɛnɛ nɛy tin thil lua̱ŋ, kä ba nɛy tin ji̱ cuŋni näk.

¹⁵ Duundɛ ɣöö bi mutnikiɛn yiath ni lo̱ckiɛn, kä bi bäärikiɛn töl.

¹⁶ Gɔaa ni mi tɔt kä gua̱n cuŋni kä ria̱ŋ ji̱ nyuɔɔni mi di̱i̱t.

¹⁷ Kɛ ɣöö ba buɔ̱m ji̱ nyuɔɔni woc, duundɛ ɣöö bi Kuoth Nhial gua̱n cuŋni rɔm.

¹⁸ Kuoth Nhial ŋäcɛ ni̱n raam in thil bɛ̈ɛ̈l, kä bi ŋɔakiɛn te thi̱n amäni cäŋ kɛl.

¹⁹ Kä /cikɛ bi dual mi wä riɛk wä ben, kä bikɛ tekɛ ti ŋuan kɛ gua̱th buath.

²⁰ Duundɛ ɣöö bi ji̱ nyuɔɔni li̱w, kä ji̱ tɛ̈r Kuɔth Nhial ce̱t gɔɔydiɛn nikɛ juaac dɔaar, bikɛ thuuk ɛ yut ce̱tnikɛ tol.

²¹ La ŋuäl gua̱n nyuɔɔni, kä /cɛ jɛ bi luɔc jɔk, duundɛ ɣöö jɛn gua̱n cuŋni la muc ni jɛn.

²² Bi nɛy ti ca poth ɛ Kuoth Nhial mun ciɛŋ ala duŋdiɛn, kä ba nɛy tin cɛ lam ŋuɔk raar.

²³ Ciɛŋ nath lätkɛ Kuoth Nhial, kä ɛ jɛn lät duɔ̱p nɛɛni tin nhɔkɛ mɔ.

²⁴ Cäŋ ba kɔa̱a̱th kɔ̱thikä, /cikɛ bi tëth kɛ wuɔ̱thkiɛn, kɛ ɣöö rɔm Kuoth Nhial tetkiɛn.

²⁵ Mëëdan ɛ ɣän ŋuɛ̈t, kä täämɛ cä dɔŋ, kä ŋotdɛ /ka̱n ji̱ cuŋni nɛn a ca pa̱l ruëëc, kä /ken gaatkiɛn mi̱eth met liem.

²⁶ La muckɛ ce̱tnikɛ pek lɔaacdiɛn kä luëlkɛ naath ikä baaŋ, kä la gaatkiɛn puɔ̱th cua̱ jek.

²⁷ Päl jiäk, lätni ti gɔw, bi cu cieŋ kɛ mal amäni cäŋ kɛl.

²⁸ Kɛ ɣöö nhɔk Kuoth Nhial ni thuɔ̱ɔ̱k, /cɛ nɛɛkɛ tin gɔw bi pa̱l ruëëc. Ba ji̱ cuŋni gaŋ amäni cäŋ kɛl, duundɛ ɣöö ba gaat ji̱ nyuɔɔni ŋuɔk jɔ̱ɔ̱r.

²⁹ Bi ji̱ cuŋni mun ciɛŋ ala duŋdiɛn, kä bikɛ jɛ ciɛŋ amäni cäŋ kɛl.

³⁰ La lat ji̱ cuŋni ni nyin pɛlä, kä lat kɛn ni ruac mi thuɔ̱k.

³¹ Kä tiit kɛn ŋuɔ̱t Kuɔth kɛ lo̱ckiɛn, kä kɛn /cikɛ bi ciɛc gekä.

³² La ji̱ nyuɔɔni ji̱ cuŋni a bi̱i̱m, go̱o̱r kɛn näkdiɛn.

³³ Duundɛ ɣöö /ci Kuoth Nhial kɛ bi pa̱l tetni ji̱ tɛ̈riɛn, kä /cɛ kɛ bi jak kä yakɛ mi waa kɛ wä luk.

³⁴ Lipni Kuoth Nhial, kä tit ni duɔ̱pkɛ, bɛ ji̱ ka̱m luth kɛ ɣöö bi mun ka̱n, kä bi ji̱ nyuɔɔni guic guäth in tekɛ riɛk.

³⁵ Ɣän cä ram mi jiääk mi bum bum nɛn, cɛ rɔ ciec piny ce̱tnikɛ luɔ̱r Lɛ-ba-nɔn.

³⁶ Kä kɛ gua̱a̱th mi tɔt cuɛ rɔɔl, cuɛ cu thil, cua̱ jɛ go̱r, kä cuɛ thil gua̱a̱th mi dëë jɛ jek thi̱n.

³⁷ Ŋäcni ram mi thil bɛ̈l, kä tit ram mi tekɛ cuŋ, kɛ ɣöö bi ram mi tekɛ mal tekɛ ŋa̱th kɛ nhiam.

³⁸ Duundɛ ɣöö ba ji̱ dueeri däk, kä bi ji̱ nyuɔɔni li̱w kɛ nhiam.

³⁹ Ka̱n ji̱ cuŋni bëë kä Kuoth Nhial, kä ɛ buɔ̱mdiɛn kɛ gua̱a̱th rikni.

⁴⁰ La Kuoth Nhial kɛ a luäk kä la käänɛ kɛ, la käänɛ kɛ kä ji̱ nyuɔɔni, kä la luäkɛ kɛ, kɛ ɣöö la kɛn rɔ̱ a luäk jɛ.