Diit 35 - RUAC KUƆTH IN RƐL RƆ

Pal kɛ kui̱ lua̱k kä gua̱n tɛ̈r.

(Dit Dee-bid)

¹ Gakni kɛ nɛy tin gak kɛ ɣä lö Kuoth Nhial, kä nyieenyni kɛ nɛy tin nyieenykɛ ɣä.

² Käni ko̱tdu kɛnɛ kumdu, jiɛc rɔ bër luäk ɣä.

³ Kä guath mutniku kɛnɛ bieethku kɛ kui̱ nɛɛni tin juɔckɛ ɣä, kä bër jio̱kni tieeydä i̱, “Ɛ ɣän käändu.”

⁴ Akɛ ba moc pöc kɛnɛ buar, kɛn nɛy tin görkɛ ni tëkdä. Akɛ ba luɔc jɔk kɛ yi̱i̱c wec, kɛ ɣöö lät kɛn ni mi jiääk kɛ kui̱dä!

⁵ Akɛ ce̱tnikɛ jiil mi lɔk jiɔamɛ, kä joc jääk Kuɔth Nhial kɛ lɛɛr.

⁶ A duɔ̱pdiɛn tekɛ muuth kɛnɛ cät cät, kä ɛ jääk Kuɔth Nhial wee kɛ mi jocɛ kɛ lɛɛr.

⁷ Kä min dɛɛp kɛn ni ɣä depkɛn kɛ mi thil luɔt, kä cikɛ pul mi ka̱pkɛ ɣä tɛt.

⁸ A da̱k bëë kä kɛ a kui̱c kɛn ɛ. Kä ɛ cambakdiɛn ëë cikɛn ɛ dɛɛp ni ɣä ku käp ni kɛ. Kä akɛ ku pɛn rɛydɛ, bikɛ cu nuɔɔr.

⁹ Kä bi ti̱eydä tɛ̈th lɔaac cu la̱r Kuoth Nhial, laarɛ tɛ̈th lɔaac kɛ ɣöö ca jɛ kän.

¹⁰ Kä cu cɔ̱w pua̱a̱nydä ruac i̱, “Ɛŋa mi ce̱tkɛ ji̱ lö Kuoth Nhial? Kän nɛy tin thil lua̱ŋ kä nɛy tin bumnikɛn kä kɛ, kɛn nɛy tin can kä thil lua̱ŋ känkɛ kä nɛy tin yɔaŋkɛ kɛ.”

¹¹ Kä ci nëën ka̱a̱cni rɔ̱ jiɛ̈c nhial, thiec kɛn ɣä kɛ ŋɔak ti /cä ŋäc.

¹² Kä cool kɛn gɔɔydä kɛ mi jiääk jak kɛn lɔcdä kä bath.

¹³ Duundɛ ɣöö la la̱thä ni bi̱i̱ cualä mi tekɛ kɛ juey, kä la cuɔ̱ɔ̱cä rɔ kɛ thëk mi̱thni Kä la palä a cä wi̱cdä guɔ̱l piny ɛ la tëë ni baapdä.

¹⁴ Ce̱tnikɛ mi paarä ni dämaar kiɛ määthdä. Ku yi̱i̱c ni ɣän ce̱tkɛ ram mi paar ni man, la guɔ̱ɔ̱lä ni rɔ kɛ wiee.

¹⁵ Kä mi ci riɛkdä ben, la duɔlkɛ rɔ̱ kɛ tɛ̈th lɔaac, la kɛn rɔ̱ cua̱ dol yɔaŋkɛ ɣä, nɛy ti /ca ɣä ŋäc ti kuecä, la kueth kɛn ɣä a thil pa̱k.

¹⁶ Dɔl kɛn ɣä ɛ jiäk ce̱tnikɛ nɛy ti dɔalkɛ ni ram mi goŋ, gui̱c kɛn ɣä ni ko̱o̱r.

¹⁷ Bɛ kulɛ amäni nɛy lö Kuoth Nhial bi duundu a guec ɔ? Bër luäk ɣä kɛ ɣöö mak kɛn ɣä, bër kän tëkdä kä nɛy ti ce̱tkɛ loony ti̱ti̱.

¹⁸ Kä ɛ jɛn bä ji̱ ku puany rɛy dolä nɛɛniku, kä bä ji̱ liak nhiamdiɛn.

¹⁹ /Cu ji̱ tɛ̈rä tin jiäk jak kä liakɛ rɔ̱ kɛ juɔ̱cdä, kiɛ ɛ nɛy tin lo̱kɛ ɣä baŋ /ca waŋ ɣär kɛ kui̱dä.

²⁰ Kɛ ɣöö /ca mal lat, lat kɛn ni kac kɛ kui̱ nɛɛni tin nhɔakɛ mal rɛy wec.

²¹ La kɛn thukiɛn cua̱ lɛp ni di̱t kɛ kui̱dä wä kɛ i̱, “Aɣa! Aɣa! Cakɔ jɛ nɛn kɛ nyinkɔ!”

²² Cikɛ ku nɛn lö Kuoth Nhial cu lɛ biɛt! Aɣ Kuäärä ni Kuoth Nhial cu lɛ nɔ̱a̱n kɛ ɣä!

²³ Ku rɔɔdu jiɛc bër gaŋ ɣä lö Kuäärä ni Kuoth Nhial, bër gaŋ cuɔ̱ɔ̱ŋdä lö Kuothdä kä Kuäärä ni Kuoth Nhial.

²⁴ Bër luk ɣä ɛ ji̱n lö Kuoth Nhial ni Kuothdä, ce̱tnikɛ gɔɔydu, akɛ /ca ɣä bi lɛ dɔl.

²⁵ Akɛ /ci bi lɛ ruac kä rɔ̱ wäkɛ i̱, “Canɛ min go̱o̱r lɔcdan ɛ ku jek.” Akɛ /ci bi lɛ ruac wäkɛ i̱, “Canɛ jɛ ku bät.”

²⁶ A nɛy diaal tin tɛth lo̱ckiɛn kɛ riɛkdä muɔckɛ pöc kɛnɛ nyuɔɔn wec, kä a nɛy diaal tin liakɛ rɔ̱ kɛ ɣä kuɔ̱mkɛ kɛ pöc kɛnɛ buar.

²⁷ A nɛy diaal tin görkɛ gɔɔy luɔ̱kdä, ku ki̱et kɛ tɛ̈th lɔaac wäkɛ i̱, “Kuoth Nhial di̱t ni jɛn la tɛth lɔcdɛ kɛ kui̱ gɔɔyä jäŋädɛ.”

²⁸ Kä ɣän bä cuŋku lat, kä bä ji̱ liak kɛ cäŋ kɛɛliw.