Diit 34 - RUAC KUƆTH IN RƐL RƆ

Dit puɔnyä gɔɔyä Kuɔth

(Dit Dee-bid)

¹ Ɣän bä Kuoth Nhial puany gua̱thni diaal, bi liakdɛ te thokdä ni ciaŋ.

² Bi yiëëdä Kuoth Nhial liak, bi can ɛ liŋ kä bi lo̱ckiɛn tɛɛth.

³ Bia liakɛ Kuoth Nhial kɛɛl kɛ ɣä, biaa puanynɛ ciötdɛ kɛɛl!

⁴ Cä Kuoth Nhial thiec kɛ luäk, kä cuɛ ɣä loc, kä cuɛ ɣä kän kä tin diaal tin dualä kɛ kɛ.

⁵ Kä nɛy diaal tin guɛckɛ jɛ tɛth lo̱ckiɛn, kä /cikɛ bi met tekɛ pöc.

⁶ Cu can ɛmɛ ciöt, kä cu Kuoth Nhial jɛ liŋ, kä cuɛ jɛ kän rɛy riknikɛ diaal.

⁷ La puɔ̱t jääk Kuɔth Nhial gekä nɛɛni tin luɔ̱thkɛ jɛ, kä bɛ kɛ kän.

⁸ Ɣɔ̱n Kuoth Nhial bi gɔɔydɛ nɛn! Tɛ̈th lɔaac akɛ nɛy tin lua̱kɛ rɔ jɛ!

⁹ Luɔ̱thɛ Kuoth Nhial lö nɛɛkɛ, kɛ ɣöö nɛy tin luɔ̱thkɛ jɛ thilɛ mi go̱o̱r kɛn ɛ!

¹⁰ Kä loony la cuckɛ kä la näk buɔthkɛ, duundɛ ɣöö nɛy tin görkɛ Kuoth Nhial bikɛ tekɛ ŋɔak diaal ti gɔw.

¹¹ Bia lö gaatkä, bia liɛŋɛ ɣä, ɣän bä yɛ ŋi̱eec kɛ luth Kuɔth Nhial.

¹² Ɛŋa kä yɛ mɔ nhɔk tëkɔ, mi bi tëk kɛ ni̱n ti ŋuan kɛ ɣöö bi lɔcdɛ kulɛ tɛɛth kɛ ti gɔw?

¹³ Tit lɛpdu kɛ lat kä ti jiäk, kä /cu ruac kacä lat.

¹⁴ Ri̱t rɔ kä jiäk, lätni ni gɔy, go̱r ni mal, kä guurni ni jɛ.

¹⁵ Kuoth Nhial guicɛ ji̱ cuŋni, kä liŋɛ luliɛn.

¹⁶ Kä Kuoth Nhial lo̱kɛ nɛy tin la̱tkɛ jiäk, la jakɛ kɛ̈kdiɛn kä ruec wi̱i̱ muɔ̱ɔ̱n.

¹⁷ Mi ci ji̱ cuŋni thiec kɛ luäk, la liŋ Kuoth Nhial kɛ, kä la luäkɛ kɛ rɛy riknikiɛn diaal.

¹⁸ Kuoth Nhial thia̱kɛ kɛ nɛy tin ci lo̱ckiɛn baath, kä la luäkɛ nɛy tin ci thil ŋa̱th.

¹⁹ Rik akɛ ji̱ cuŋni, duundɛ ɣöö la luäk Kuoth Nhial kɛ rɛydiɛn kɛn diaal.

²⁰ Bɛ cɔ̱wkiɛn diaal tit, thilɛ kɛl mi bi tööl thi̱n.

²¹ Duer bɛ ji̱ nyuɔɔni näk, kä nɛy tin lökɛ ji̱ cuŋni bakɛ luk.

²² La luɛl Kuoth Nhial tëk ja̱a̱ŋnikɛ, thilɛ nɛy ti lua̱kɛ rɔ̱ jɛ, ti ba luk.